TITUS 2
2
Pangajalan anu totu'u
1Panyo beleyum, Titus, tionyo ahi' beleyum mongajanakon pangajalan anu matantu. 2Opokinde'i na mian to momo'ane anu langkai'mo, da aha boli sampa tagoda nu apa-apaa, pande ka' tumuu' sumo mian anu pantas otabe'i. Aha tionyo ahi' suele montoongi pangajalan anu totu'u anu nolengkat mae hi Tumpu, mongkalibosi tala-talakana', ka' sabaan na mongoa'i sansala. 3Sumo aitu mule' tionyo ahi' beleyum mompokinde'i to bou-boune anu bengkele'mo da kalakuan nu aha sosok tiba apaa na anu patut hi mian anu tumuu' samata-mata bau kapentingan nu Tumpu. Aha madi' timbali mompitana'i mian sangga'at ka' madi' timbali katagean i inumon anu moko palangu. Aha tionyo ahi' mongajanakon hahan anu ma'ima', 4da tiba jalan anu sumo aijo' aha timbali mompogulu' to bou-boune anu ma'isa bengkele' mongkalibosi osoanyo ka' to ana-anaknyo, 5timbali pande, tumuu' susi' ka' timbali tina nu auwan anu ma'ima', anu tulu-tulutan hi langkai'nyo. Tiba jalan anu sumo aijo' madi'mo ko mian anu mompisala'i lele lengkat mae hi Tumpu.
6Sumo aitu mule', pokinde'i na to oli-olitau da aha timbali sinsumbu'. 7I uno nu iwi-iwi na han, tionyo ahi' beleyum timbali sonto' nu kalakuan anu ma'ima'. De beleyum mongajan, beleyum tionyo ahi' jujun ka' totu-totu'u na kinyonyoa. 8Potatae nu anu sinsumbu' na opake da madi' nupoko ala nu pisala'i nu mian, da sampo bali'um timbali ma'ambang kalana madi' ko hahan anu ma'idek, anu timbali tewa' nu sisik nu aha na kita.
9To posa-posaihon tionyo ahi' tulu-tulutan hi tuannyo, ka' momposanang kinyonyoanyo i iwi-iwi' na han. Aha madi' timbali monggagakon, 10kabai montomang. Tionyo ahi' aha saja' mompotoa sipat anu ma'ima' ka' tulu-tulutan, da kalana sipat nu aha aijo' mian mompuji pangajalan mongkona Tumpu anu Momposalamat kita.
11Kalana Tumpu nompotoamo balakat-Nyo kalana kahanda' momposalamat iwi-iwi' mian. 12Balakat nu Tumpu aijo' mompogulu' kita da madi'mo daagi' kita tumuu' mompaha sala' tiba pongka'oho' nu Tumpu ka' madi'mo montuluti anu nu ka'ima'i nu dunia. Kita pinogulu' da tumuu' i uno nu dunia aiya, da monsumbu' boli sampa tagoda nu apa-apaa, jujun ka' tulu-tulutan hi Tumpu. 13Uuka aiya kita hau-haunyomo montanda'i Sinaa anu o ima-imaninto aijo'; i Sinaa aijo' dunia montoaje i Yesus Kristus anu talasanggo; aijo'mo Tumpu Anu Matangkas na Kuasanyo ka' Tomundo anu Momposalamat kita. 14#Mzm. 130:8, Kel. 19:5, Ul. 4:20, 7:6, 14:2, 1Ptr. 2:9 Ia nongkulubanakonmo butong-Nyo kalana kahanda' mompobebas kita da iwi-iwi' na anu ma'idek bolimo obaunto, ka' mompotimbalimo kita mian anu binebasmo madi'mo ko dosa'nyo ka' samata-mata iamo na tumpu-Nyo, ka' makekemo na mombau anu ma'ima'.
15Ajanakon na iwi-iwi' aijo', ka' opokinde'i, ka' otewa' na anu ma'idek hi batu-batu mian anu mohongo beleyum ka' da nupajuli nu aha. Boli mompojohok samian pe'e montoa beleyum madi' ko angga'nyo.
Currently Selected:
TITUS 2: LAILOE
Highlight
Copy
Compare
Share
Want to have your highlights saved across all your devices? Sign up or sign in
