ROMA 15
15
Posanang na mian sangga'at boli ola posi butongum
1Kita anu totu-totu'u junjuhi' i anu opalesayanto, tionyo sabaan i kabalatan-kabalatan nu mian anu ola tudu-tudu na kapalesaya'annyo. Boli ola kita momposanang posi butongto. 2Ola ahi' kita toto samian tionyo momposanang sangko utusto da bau ka'ima'annyo, da mompaka pahoson na ia palesaya. 3#Mzm. 69:8 Kalana i Kristus suele madi' ola mompopikilakon kasanangan nu posi butong-Nyo. I uno nu Kitab nu Tumpu tinulismo sumo uuka, “Iwi-iwi' na alu anu opanjolongakon hi komiu pinotudunmo hi belengku.” 4Iwi-iwi' anu tuli-tulis i uno nu Kitab nu Tumpu, aijo' bau pompangajali kita. Kalana pangajalan anu otalimanto i Kitab nu Tumpu mompotimbali kita sabaan ka' mahoson, sahingga kita moko ala montaha'imani Tumpu. 5O amalakon hi Tumpu anu nombee'i da sabaan ka' bau pohaase hi mian, montulungi komiu da tumuu' sambuku montuluti sonto' i Kristus Yesus. 6Kalana tumuu' sambuku na kita moto Utus iwi-iwi' hingga-hinggat moko ala mompuji' Tumpu, Tuuma nu Tumpunto i Yesus Kristus.
Lele Ma'ima' toka hi to bansa-bansa anu misa' Yahudi
7Mokonyo aijo' tionyo to Utu-utus mompaha tali-talima samian ka' samian nu kinyonyoa sanang, sumo i Kristus suele nontalima komiu bau pompopodaka' Tumpu. 8Kalana, o inau', i Kristus nongajanmo mian nu Yahudi bau pomposumbu' saba' Tumpu madi' baleko' nongganapimo iwi-iwi' na janji'-Nyo hi mompolee'to. 9#2Sam. 22:50, Mzm. 18:50 I Yesus suele nompotimbalimo to bansa-bansa sangga'at nompopodaka' Tumpu, kalana ka'ima'an nu kinyonyoa-Nyo hi aha. I uno nu Kitab nu Tumpu tinulismo sumo uuka,
“Mokonyo aijo' aku mompuji'mo Kita Tumpu aijo' hi aha to bansa-bansa,
aku monyanyije pompuji' sanggon-To.”
10 #
Ul. 32:43
Daagi' mule' tinulis sumo uuka,
“Balame-lame'mo hingga-hinggat tiba mian anu palesayamo hi Tumpu anu pinile'anyomo,
o to bansa-bansa!”
11 #
Mzm. 117:1
Ka' aiya mule',
“Iwi-iwi' bansa tionyo mompuji' Tumpu,
tionyo iwi-iwi' na mian mompuji' Ia!”
12 #
Yes. 11:10
Ka' aiya suele na anu tinaloakonmo i Yesaya,
“Lengkat mae hi lee' i Isai tokaje na sala'samian
anu mompalentah to bansa-bansa;
hi Ia na bau kataha'imanan nu to bansa-bansa.”
13Tumpu aijo'mo na tampat anu otaha'imani miu. O amalakon iaje na mongisi kinyonyoaum nu iwi-iwi' na kalame'an ka' ka'ima'an, kalana komiu palesaya hi Ia, da kalana kuasa nu Roh nu Tumpu komiu mompaka taha'iman hi Tumpu.
Anu nonsabapi i Paulus nontulis sahingga pinokemannyo hondo
14To Utu-utus! Kusumbu' hondo daagi' manjoo' na anu ma'ima' hi komiu. Komiu suele monsumbu' iwi-iwi' aijo', ka' mule' timbali mompaha pogu-pogulu' samian tiba samian. 15Panyo mongkona hahan anu natantumo kupokeman hi komiu totu-totu'u i sulat aiya, kalana Tumpu nombee'mo kalaja aiya hi belengku. 16Ia nompotimbalimo aku posaihon i Kristus Yesus da osai hi to bansa-bansa anu misa' Yahudi. Ka' aku nompojalanmo sumo salaku imam, anu mompolele Lele Ma'ima' lengkat mae hi Tumpu, da to mia-mian anu misa' Yahudi timbalimo salaku anu osombahkon hi Tumpu Allah anu timbali Nutalima. O amalakon da Roh nu Tumpu mompotimbali aha da timbali salaku anu osombahkon samata-mata hi Tumpu. 17Jadi, kalana aku nosa'angu'mo tiba i Kristus Yesus, sahingga aku timbali mongoa'i lame' i uno nu kalajangku bau kapentingan nu Tumpu. 18Aku baani basisik sumo aijo' ola mongkona apaa na anu binaumo i Kristus hi belengku da mompotimbali to mia-mian anu misa' Yahudi mohongo-hongo Tumpu. Aku nompojalan aijo' tiba potatae, kabai mule' tiba hahan anu binaungkumo, 19ka' mule' tiba hahan anu okabangangi ka' anu ma'isa toho' tinimbali; iwi-iwi' aijo' kalana kuasa nu Roh nu Tumpu Allah. Lele Ma'ima' mongkona i Kristus pinolelengkumo iwi-iwi' hi to mia-mian nolengkat pe'e mae i Yerusalem tinoka-toka i Ilirikum. 20Anu ku kahanda'i aijo'mo mompolele Lele Ma'ima' anu lengkat mae hi Tumpu i tampat-tampat iya na anu ma'isa nohongo mongkona i Kristus. Kalana aku madi' mongka'oho' mombau kalaja opotinjo i mesen anu binau nu mian sangga'at. 21#Yes. 52:15 I uno nu Kitab nu Tumpu tinulismo,
“To mia-mian anu ma'isa toho' nohumpak lele-Nyo aijo', montoaje;
ka' aha anu ma'isa toho' nohongo, monsumbu'je.”
I Paulus montantomo mamba i Roma
22 #
Rm. 1:13
Mokonyo aijo' aku saja'mo ko anu nolingkang na mamba montoa komiu. 23Panyo u'uka aiya kalajangku i da'erah haha aijo' i ningkotmo. No tau-taunmo na kopinnyo aku nontanto mamba montoa komiu. 24Saidi' mae de aku mamba motulu i kota miu mokiijo' i Spanyol o amalakon mae da timbali singkabot tiba komiu, ka' lame' sasaingoni' tiba komiu. Lapas aijo' ku poita da komiu timbali montulungi aku mamba mokiijo' i Spanyol aijo'. 25#1Kor. 16:1-4 Panyo uuka aiya aku mongka'oho'mo mamba i Yerusalem momboa pontulungi mian anu pinalesayamo hi Tumpu kiijo' mae. 26Kalana to jama'-jama'at i Makedonia ka' i Akhaya nonsetujuimo mombee'i pontulungi to Utu-utus anu kasiasi, hi mian anu palesayamo hi Tumpu kiijo' mae i Yerusalem. 27#1Kor. 9:11 Tiba kinyonyoa sanang aha nomputusimo da mombau sumo aijo'. Memang konanyomo na aha patut montulungi to utu-utus anu kasiasi i Yerusalem aijo'; kalana mianmo nu Yahudi haha aijo', sahingga mian anu misa' Yahudi nohumpakmo to bala-balakat anu lengkat mae hi Tumpu. Jadi to mia-mian anu misa' Yahudi aijo' patut suele montulungi to mia-mian Yahudi nu to bala-balakat, susumo lapangnyo to bala-balang. 28De kupoko baumo na kalajangku aiya, ka' mombee'mo hi aha kiijo' mae i Yerusalem, pontulungi anu ilimu'mo aijo', saba' aku mambaje i lipu' Spanyol motulu i kota komiu. 29De aku toka hi komiu, tantu aku momboa manjoo' na balakat lengkat mae hi Kristus toka hi komiu.
30Tiba sanggo nu Tumpunto i Yesus Kristus, ka' tiba kalibosan anu binee' mae nu Roh nu Tumpu, kupoita sabole-boleh hi komiu da aku tiba komiu mondo'akon mae totu-totu'u aku hi Tumpu Allah. 31Balado'a da Tumpu molapasakon aku i lima nu to mia-mian anu madi' palesaya kiijo' mae i Yudea, da kalajangku momboa pontulungimo kiijo' i Yerusalem otalima nu kinyonyoa sanang nu mian anu palesayamo hi Tumpu kiijo' mae. 32Desumo aitu, maluannyo nukahanda'i nu Tumpu, aku toka hi beleyum tiba kinyonyoa sanang. Ka' aku mongoa'ije lame' tiba komiu itina'. 33O amalakon da Tumpu mombee'i mae kabilahian hi mian mombalakati komiu Utus iwi-iwi'. Amin.
Currently Selected:
ROMA 15: LAILOE
Highlight
Copy
Compare
Share
Want to have your highlights saved across all your devices? Sign up or sign in
