MAZMUR 77
77
Bau pohase' de susa'mo
1Anu mongkapalai panyanyi. Ingala i lagu nu nyanyian: i Yedutun. Mazmur i Asaf.
2Pinohosonkumo na aku notatae nongkakase hi Tumpu;
pinohosonkumo na aku notatae nongkakase, ka' ia nohongomo mae aku.
3Tempo'nyo sinusa'mo hondo, aku binalado'amo hi Tumpu;
Sampahu-pahu ku hangkat na limangku mokiita' hi Ia madi' aku ma'osa,
panyo kinyonyoangku madi'mo mongka'oho' ohase'.
4De tonginau'mo na aku hi Tumpu, ku poto'imo na anu ku kahanda'i
de ku potutugakonmo, kinyonyoangku mompaka lusemo.
5Nu pobikayaonmo mae nu Tumpu na aku da madi' moko ala to hoyot pihi
kinyonyoangku madi'mo sanang sahingga madi'mo moko ala motatae.
6Mompotutugakon kantumuu'anku sansina-sinaa anu i hikuhakonmo,
saja' ku inau' ka' ku potutugakon na kantumuu'anku itaun-taun anu i hikuhakonmo.
7De pihimo sola'mo ku potutugakon,
ka' lewa' ogogisa' i uno nu kinyonyoa.
8“Pa' toka-tokamo sidu-sidutu' na Tumpu madi'mo mae monginau'
ka' madi'mo daagi montalima?
9Pa' Ia madi'mo mongkalibosi kami?
Pa' madi'mo daagi' Ia mongganapi palajanjian-Nyo?
10Pa' kinolilimanmo nu Tumpu na mongkalibosi?
Pa' notambuha'mo na Ia, sahingga madi'mo daagi' ko kalibosan?”
11Lantas aku notataemo, “Aiyamo na anu monsakiti kinyonyoangku,
tukoongku Anu Matangkas na Kuasa-Nyo madi'mo daagi' balakuasa.”
12Aku tinolo'inau'mo hi palabuatan-palabuatan nu Belento Tumpu,
nompotutugakonmo hahan anu binaumo nu Belento ka' okabangangi tempo'nyo naipuan mae.
13Aku nompopikilakonmo iwi-iwi' na anu binaumo nu Belento,
ka' nompopikilakonmo anu binaumo nu Belento anu madi'mo ko gampa-gampanyo.
14O, Tumpu, iwi-iwi' na palabuatan nu Belento susi' hondo,
ihe na anu sumo Tumpu mami, anu daka' hondo na kuasa-Nyo?
15Belentomo na Tumpu anu nombaumo hahan anu okabangangi,
kuasa nu Belento, pinonyata'mo nu Belento hi to bansa-bansa.
16Kalana Belento mahoson sahingga pinobebasmo nu Belento na mian anu palesayamo hi Belento,
tulunan i Yakub ka' i Yusuf.
17Nontoa Belento, o, Tumpu, uea nabuhukmo,
memang lananyo nu ambai suele i lakatnyomo.
18Kundom nontudunakonmo mae ujan, gohung dinolundunganmo;
kilat pinojo-pojohonjitmo iyaya mae.
19Gohung pinoli polintupo, kilat pinokalapitmo,
dunia ginayu'anmo ka' i lakatnyomo.
20Belento i lumajangmo nontulu bokon,
i lumajang i ndalangon, panyo lawo nu Belento madi' tinoa-toa.
21Susumo anu lewa' molaya' potuu'on, Belento nontakamo mian anu palesayamo hi Belento,
nonggunakonmo i Musa tiba i Harun.
Currently Selected:
MAZMUR 77: LAILOE
Highlight
Copy
Compare
Share
Want to have your highlights saved across all your devices? Sign up or sign in
