MAZMUR 132
132
Pompuji' Laigan nu Tumpu
1Nyanyian mamba i tampat anu ko balakatnyo.
O, Tumpu, inau'akon na i Daud,
ka' iwi-iwi' na kasansala'annyo.
2Boli okolilimi na ia monsombah hi Belento Tumpu,
ka' mule' apaa na anu jinanji'nyomo hi Belento Anu Mahoson hondo, Tumpu i Yakub.
3-4Ia notatae, “Aku madi' milawe i laiganku
kabai hoyot i kahoyotanku,
5de ma'isa pe'e mompotouka Laigan nu Tumpu i Yakub,
bau kajojoongan nu Tumpu Anu Mahoson hondo.”
6 #
2Taw. 6:41-42
Kiijo' mae i Betlehem i hongontomo na Peti' Palajanjian,
lantas i humpakmo i padang yaar.
7Imbo' da kita mamba i kajojoongan nu Tumpu,
ka' monsombah Ia i ahop nu kasuhangan-Nyo.
8Tokamo mae ka' jojoongmo i Laigan nu Belento, o, Tumpu,
hingga-hinggat tiba Peti' Palajanjian anu momponyata' kakuasa'an nu Belento.
9O'amalakon da mian anu pinalesayamo hi Belento montaligalai kalana lame'mo,
ka' to ima-imam nu Belento saja' tumuu' montuluti pongka'oho' nu Belento.
10Kalana i Daud posaihon nu Belento
boli mule' madi' otalima na tomundo' anu pinile'anmo nu Belento.
11 #
2Sam. 7:12-16, 1Taw. 17:11-14, Mzm. 89:3-4, Kis. 2:30 Tumpu binasumpa'mo hi Daud;
Ia madi'mo mompojalo anu jinanji'-Nyomo.
Ia notatae, “Samian na anak nu beleyum Ku potimbalimo tomundo',
da mompalentah mombolosakon beleyum.
12De to ana-anak nu beleyum tulu-tulutan hi apaa na anu jinanji'-Kumo,
ka' montuluti iwi-iwi' na palentah-ngKu,
sahingga sampe toka sidu-sidutu' na lee' nu aha
mombolosakon beleyum salaku tomundo'.”
13Kalana Tumpu nompile'imo Sion;
Ia mongkahanda'i tampat bau kajojoongan-Nyo.
14Ia notatae, “I aiyamo na kajojoongan-Ku sampe toka sidu-sidutu',
Aku kahanda'mo mompalentah i tampat aiya.
15Iwi-iwi' na anu nupalalui nu aha Ku bee'i molabi-labi,
to mia-mian nu aha anu kasiasi Ku pokaan sampe mobosu.
16To ima-imam nu aha mompotoamo kasalamatan anu lengkat mae hi belengku;
aha mian manyanyimo ka' montaligalaimo kalana lame'mo.
17 #
1Raj. 11:36
I aiyamo na lee' i Daud samian, Ku potimbalimo tomundo';
kapalentahannyo Ku potataapmo.
18Kalaja'annyo saja'mo mohumpak ka'ima'an,
panyo iwi-iwi' na mian anu monsapobali' aha opopoambangmo.”
Currently Selected:
MAZMUR 132: LAILOE
Highlight
Copy
Compare
Share
Want to have your highlights saved across all your devices? Sign up or sign in
