AMSAL 24
24
– 19 –
1Boli mongka'ideki mian anu ma'idek na kinyonyoanyo ka' boli mongka'ima'i mosangalu tiba aha. 2Aha ola mompopikilakon kabuhingison ka' ola mombisalakon apaa na anu monsilakai.
– 20 –
3Auan aijo' daagi kalana ko kapandean bapikin ka' pangalati'an. 4Ka' de bisuannyo daagi' ko ilimu', saba' to sali-salipi'nyo nu isije nu to paka-pakakas anu ko angga'nyo ka' to ima-ima'.
– 21 –
5Mian anu pande lebe balakuasa molingkudui mian anu mahoson; ilimu' lebe palalu molingkudui hoson nu butong. 6Kalana ma'ise pe'e mahampate tionyo ahi' ko tanga'anmo momona, anu matantu, ka' lebe manjoo' na anu mompokinde'i, lebe daka' mule' na halapan ka'untungan de mahampate anu o'ima-imani.
– 22 –
7Mian anu ponga' madi' moko ala monsumbu' kapandean bapikin. Ia madi' moko ala montaeakon apa-apaa de mian hau-haunyo mombisalakon hahan anu penting.
– 23 –
8Mian anu saja' montanga'i palabuatan ma'idek, osanggohi mian anu saja mompokalangkabut. 9Batu-batu tanga'an nu mian anu ponga' aijo' dosa'. Mian anu saja' mongalu mian sangga'at, madi'nu ka'ima'i nu mian maumo pa' ihe.
– 24 –
10De beleyum madi' sabaan i uno nu ka'ada'an anu susa'mo hondo saba' beleyum mian anu madi' moko ala mombau apa-apaa.
– 25 –
11Boli bata-bata na mompobebas mian anu binee'anmo hukuman anu osilakaimo; posalamatmo na mian anu hau-haunyo o hela' mokiijo' i tampat pompokalayo'an. 12Timbali na beleyum motatae, “Atina' misa' ulusanku.” Panyo Tumpu Allah mompalahatikan beleyum. Ia na monsumbu' ka' momputusi pikilan nu beleyum. Ia mombalosakon manusia sitimbang palabuatannyo.
– 26 –
13O anaku kaanmo na potik nu uani' kalana aijo' ma'ima'. Susumo ju' ingla ipotik nu uani' matami' na okaan, 14sumo aijo'mo na kapanden bapikin ma'ima' na nu oa'i nu santuu' nu beleyum. De beleyum pande kantumuu'an nu beleyum timbali ma'ima' aiya mae i ahop.
– 27 –
15Boli sumo mian anu ma'idek na kinyonyoanyo anu mosa'angu' mombulingi mian anu madi' tageo' na kinyonyoanyo ka' mongagoi laigannyo. 16Kalana, maumo pe'e mian anu madi tageo' na kinyonyoanyo saja' manabu', panyo saja' ia po'ule' mobula. Panyo mule', mian anu ma'idek na kinyonyoanyo timbali hansun totu-totu'u nu balaa' anu montokai ia.
– 28 –
17Boli sanang de sampo bali' nu beleyum silaka, ka' boli bilahi de ia manabu'. 18Kalana, Tumpu montoa mae kolalajang nu beleyum aijo, ka' Nu toa ma'idek, lantas madi' daagi' mohukum sampo bali' nu beleyum aijo'.
– 29 –
19Boli mongka'ideki kabai madi' sanang hi mian anu ma'idek na kinyonyoanyo. 20Mian anu ma'idek na kinyonyoanyo madi' ko anu otaha'imani na kantumuu'annyo aiya mae imihi.
– 30 –
21O anaku, okabuhuk na Tumpu ka' oholomati na tomundo. Boli mobobatukan tiba mian anu madi' situju hi aha. 22Mian anu sumo aijo' ola sangkinihap timbali mohopu', kalana balaa' anu nupotoka nu Tumpu Allah kabai tomundo misa' han anu ola dengke-dengke.
To pia-piangkuka mule' na pokinde'
23To mia-mian anu pande hondo toho' notatae sumo uuka: Mian kopian madi' timbali maboat i sambiha'.
24De mian anu ko kasala'annyo nu poto'i madi' ko sala'nyo, saba' mian kopian aijo' mohumpak kutuk ka' nu tundai nu mian iwi-iwi'. 25Panyo de mian kopian aijo' mohukum mian anu ko sala'nyo saba' ia mohumpak kantumuu'an ma'ima' ka' oholomati.
26Pontaami anu totu'u aitumo na tanda posangaluan anu totu-totu'u ma'ima' hondo.
27Boli pe'e beleyum mo'osoa de ma'isa pe'e beleyum momposadia ale'nu beleyum ka' ko polioanmo.
28Boli timbali sakisi hi mian sangga'at de madi' ko anu osumbu sumbu' na han nu palakala aijo, bolimo mule' mombaleko'i ia. 29Boli motatae, “Aku tionyo mombalosakon ia apaa na anu binaunyomo hi belengku!”
30Aku toho' notulu i ale' ka' ale' nu anggur nu samian anu moluluk ka' mule' ponga'. 31Anu tinoangku i kiijo' ola ahi' sosu'anon anu ko hii'nyo ka' padang. 32Salatan pinalahatikankumo ka' lewa' tinutuganku na han aijo', i humpaku mo na pangajalan sumo uuka. 33#Ams. 6:10-11 Tiba tatundu' ka' hoyot sasiangoni', ka' sumuhang nonsolung limaka' nilawe saasaingoni', 34kakulangan ka' kasiasi toka mae montumbuhi sumomo tololang anu ko toongon mae bau pompatei.
Currently Selected:
AMSAL 24: LAILOE
Highlight
Copy
Compare
Share
Want to have your highlights saved across all your devices? Sign up or sign in
