FILEMON 1
1
1Utusku i Filemon, sangalu sampo kanaya mami! Aku, i Paulus mian anu tinalungku'mo kalana i Kristus Yesus, tiba Utusto i Timotius, nontulismo sulat aiya toka hi beleyum 2#Kol. 4:17 ka' hi jama'at anu silimu' i laiganum; ka' suele hi utusto boune, i Apfia ka' sangalu sampo usahanto, i Arkhipus.
3Kami montaha'imani ka' mongamalakon da Tumpu Tuumanto ka' Tumpunto i Yesus Kristus mombee'i balakat ka' ka'ima'an hi beleyum.
Kalibosan ka' iman i Filemon
4De aku balado'amo ku sanggo na sanggo nu kita Utus ka' montalima kase hi Tumpu. 5Kalana i hongongkumo, taalu' kita Utus totu-totu'u pinalesayamo hi Tumpu Yesus ka' mongkalibosi iwi-iwi' mian anu pinalesayamo hi Tumpu. 6Aku balado'a mongamalakon da poto utusanto salaku to mia-mian anu pinalesayamo mohasinakon pangalati'an lebe daka' i iwi-iwi na balakat anu daagi'mo hi kita kalana nosa'angu'mo tiba i Kristus. 7Utusku i Filemon, kalibosanum kona hi iwi-iwi' mian anu palesaya hi Tumpu nompolame'mo aku, ka' nongkakeha'imo aku! Iwi-iwi' mian anu pinalesayamo hi Tumpu i lame'mo kalana kita Utus.
Poitaon toka hi Onesimus
8Mokonyo aijo', salaku mian anu moto utus anu sa'a-sa'angu' na kapalesaya'an, aku timbali ahi' mompalentah kita Utus da mombau apaa na anu tionyo obau nu kita Utus. 9Panyo kalana aku mongkalibosi kita Utus, aku ola ahi' momoita. Aku aiya samian na tu'anyo ka' uuka aiya hau-haunyo i unomo nu talungku', kalana i Kristus Yesus. 10#Kol. 4:9 Aku, i Paulus, mompotoka sa'angu' na poitaon hi beleyum mongkona i Onesimus, anakku kalana i Kristus. Kalana i uno nu talungku' aiya, aku tinimbalimo tuuma nu rohaninyo. 11U'utu mae ia madi'mo kino gunanyo hi beleyum, panyo uuka aiya ia kino gunanyomo, misa' ola hi beleyum, panyo suele hi belengku.
12Uuka aiya mian anu ku kukalibosi aijo' po'ule'mo sinaingku mamba hi beleyum. 13Sabenannyo kahanda'mo ku tewa'na ia da jojoongmo tiba aku salaku pombolosi beleyum da ia timbali montulungi aku, hau-haunyo daagi' i uno nu talungku' aiya kalana mompolele Lele Ma'ima' anu lengkat mae hi Tumpu. 14Panyo aku madi' mongka'oho' mombau apa-apaa de kita Utus ma'isa monsitujui mae. Aku lebe mongka'ima'i de kita Utus montalima ia ka' halata' ahi' na kinyonyoaum; aku madi' mongka'oho' mompakisa beleyum.
15Kugantang i Onesimus madi'mo jinojoong hi kita Utus tino pia-pian tempo' da kita Utus timbali po'ule' mule' mohumpak ia minsusule'mo ka' jojoonganmo sidu-sidutu'. 16Uuka aiya ia misa'mo ola timbali posaihon nu kita Utus; ia misa'mo ola sumo aijo'. Ia atina' sangko mian Kristen anu okanonongi. Ia kinogunanyo hondo hi belengku, lebe-lebe mule' hi beleyum! Tantu ia ko gunanyo hondo salaku posaihon ka' mule' salaku mian anu noto utusmo hi Tumpu!
17Mokonyo aijo', kalana kita Utus monganggapmo aku sangalu sangko kita Kristen, po'ule'mo talimakon na i Onesimus pokakana sumo kita Utus montalima aku. 18De ia ko kasala'an kabai ko samaya' hi beleyum, bakas akuje na montanggungiakon iwi-iwi' aijo'. 19Jadi, akumo na montulis i aiya: Aku, i Paulus mombayalije bau polunasi iwi-iwi'. (Tantu madi'mo palalu ku po'ingat, na kita Utus ko samaya' hi belengku, aijo'mo kantumuu'anum anu bu'ou salaku mian Kristen.) 20Mokonyo aijo', i uno nu sanggo nu Tumpu soba tulungi mae na aku, polame'akon mae na kinyonyoangku salaku anu moto utus hi Kristus.
21Aku nontulis sulat aiya kalana ku palesaya hondo na kita Utus tantu mombauje apaa na anu pinoitangkumo. Ka' kusumbu' tantu kita Utus mombauje anu lebe molingkudui aijo'. 22Ka' mule', tulungi posadiai salipi' na aku i laiganum, kalana kutaha'imani Tumpu montalimakonmo iwi-iwi' na do'a nu to Utu-utus ka' po'ule'mo momboa aku minsusule' hi belemiu.
Salan do'a anu pupusnyomo
23 #
Kol. 1:7, 4:12 I Epafras, anu aiya sama-sama tiba aku i uno nu talungku' kalana i Kristus Yesus, nompakatu salan do'anyo hi beleyum. 24#Kis. 12:12, 25, 13:13, 15:37-39, 19:29, 27:2, Kol. 4:10, 4:14, 2Tim. 4:10-11 Talimakon suele na salan do'a nu to sanga-sangalungku: i Markus, i Aristarkhus, i Demas ka' i Lukas.
25O'amalakon da Tumpunto i Yesus Kristus mombalakati komiu.
Tabea' mami, I Paulus 1
Currently Selected:
FILEMON 1: LAILOE
Highlight
Copy
Compare
Share
Want to have your highlights saved across all your devices? Sign up or sign in
