AYUB 3
3
I Ayub notusa'mo hi Tumpu Allah
1 #
Yer. 20:14-18
Lapas aijo' i Ayub notataemo ka' nontotobi'akonmo posi butongnyo, mosia ka' ia pinohampemo, ia notataemo,
2-3O Tumpu Allah, kutukiakonmo mae na sinaa pinompohampean aku,
ka' pihi-pihi salatan tinangku nontampu'unimo pinoboa nongkandung aku!
4O Tumpu Allah, popintungakonmo mae na sinaa aijo',
ka' bolimo mae o'inau' nu Belento sahingga madi'mo otoa;
bolimo mae nupobee' nu belento
na jingka monjingkai mae.
5Potimbalimo na sinaa aijo' mo'itom totu-totu'u,
pikat taha-tahahumo, madi'mo ko anu otoa-toa;
saputmo nu kundom ka' mombun anu kahando'mo ujan
pense'akon mae nu jingka anu majingka hondo.
6Sahanyo bolimo ko malomnyo i bilangan
nu taun ka' bilangan nu bitu'on;
bolimo daagi' o'inau',
ka' bolimo obilang.
7Bakasmo da malom me saja' kapikatan
madi'mo ko ka'ima'an nu kinyonyoa, madi'mo ko kalame'an.
8O mian anu lewa' basando ka' anu Mongkuasai ambai
sumpa'akonmo mae ka' kutukimo mae na sinaa aijo';
9Bolimo na mandala' ohani mopatas monjingkai mae,
bolimo opobee' mae na mandala' monjingkai mae!
Bakasmo da pihi aijo' ola palasuma na montanda'i
toka mae na sinaa ka' anu saidi' ame otaha'imani.
10Kutukiakon na pihi anu momposilaka
tempo'nyo aku i hampe'akonmo nu tinangku ka' pinobakas mo da monta'up sansala.
11Kadaka' aku madi' sinilakamo ahi' i uno nu kompong nu tinangku,
kabai kinodo'mo ahi' na nyawangku tempo'nyo aku pinohampemo?
12Kadaka' aku tinanggogolanmo nu tinangku ka' tinangkungnyomo,
ka' pinosusunyomo i susunyo?
13De maluannyo tempo'nyo aijo' aku sinilakamo,
sahingga aku i hoyotmo ka' ningkainmo,
14susumo to tomu-tomundo ka' anu daka' na kuasanyo naipuan mae,
anu po'ule'mo nompotinjo laigan nu tomundo anu tempo'nyo naipuan mae.
15Aku tinohoyotmo susumo anak mo'ane nu tomundo
anu nongisimo laigannyo nu pakakas salaka.
16Kadaka' aku madi' i hampeakon ka' madi'mo ko nyawanyo
da binobogonmo na aku i hoyot ka' madi'mo ko anu ku sumbu-sumbu?
17Kiijo' mae i uno nu hagum,
mian anu toto ue-uesan amdi'mo monguesani.
Ka' mian anu nalaweno na nokalaja
timbalimo minkain.
18Ka' mian anu i hakopmo sanangmo na kinyonyoanyo,
madi'mo lewa' mohumpak pondoke hi mian anu monjagai.
19Kiijo' mae iwi-iwi' na mian pokakana:
mian anu talasanggo tiba mian anu madi' talasanggo.
Ka' to posa-posaihon opobebasmo.
20Kadaka' manusia opojohokmo da saja' tumuu' sansala?
Kadaka' jingka obee'mo hi mian anu susa'?
21 #
Why. 9:6
Hagum ka' halata', hagum na anu nuka'ima'i nu aha,
montanda'i kasilakan panyo madi' toho' toka mae.
22Kabilahian o'oa'ije
de aha silakamo ka' olamunmo.
23Kantumuu'an nu aha aiya mae i ahop sinoku'mo nu Tumpu Allah
iwi-iwi' na jalan pa' moya tinikuban-Nyomo.
24Aku motusa' aijo'mo na pombolosi anu ku kaan,
aku me saja' motusa'.
25Iwi-iwi' na anu ku bata-batai mongkonamo mae aku,
iwi-iwi' na anu ku kabuhuk nontokaimo mae aku.
26Aiya hi belengku madi'mo ko ka'ima'an
aku mongoa'i sansala' madi'mo ko kamingkotannyo.
Currently Selected:
AYUB 3: LAILOE
Highlight
Copy
Compare
Share
Want to have your highlights saved across all your devices? Sign up or sign in
