AYUB 1
1
I Ayub sinobanmo nu ibilis
1I tano' Us daagi' ko samian na mo'ane anu jinojoong sanggonyo i Ayub. Ia nonsombah Tumpu Allah ka' montuluti hondo Ia. Ia mian anu ma'ima' hondo na kinyonyoanyo ka' madi' hondo lewa' mombau anu ma'idek. 2Ia kino to ana-anak mo'ane aha popitu' ka' aha totolu' na boune. 3Ka' mule' ia ko to posa-posaihon manjoo' hondo, 7.000 na domba, 3.000 na unta, 1.000 na sapi', ka' 500 na keledai. Osanggomo pe'e na mian aijo', ia mian anu kaya hondo anu jojoong i da'erah sasu kabete'an.
4Aha popitu' na to ana-anak mo'ane i Ayub ko kabiasa'an saja' mombau bau-bauon i laigan nu aha toto samian mobolo-bolos. I bau-bauon aijo' aha toto-totolu' na anak i Ayub anu toto bou-boune suele ahi' olaga, lantas aha mongkakaanmo ka' monginu-inum hingga-hinggat. 5Salatan lapasmo na bau-bauon i Ayub mobulamo subu-subu ka' nonsombahkonmo koloban kona hi to ana-anaknyo toto samian da aha nu'ampuni nu Tumpu. Kalana nututugi i Ayub ihe na monsumbu'anaknyo haha aijo' binaladosa'mo ka' nongalumo Tumpu Allah mau madi' tinotonggolakon.
6 #
Kej. 6:2
Daagi' kino sansinaan to mala-malaekat kiita' i suluga' nangadapmo hi Tumpu, ka' Anu Lewa' Monggoda kiijo'mo hi aha suele hingga-hinggat. 7Pinokilawamo nu Tumpu na ia, “Lengkat mae iya na beleyum?” Tinaaman nu Anu Lewa' Monggoda, “Aku sala'je mae lewa' i namba nonsongkohi dunia ka' nolajangi tinoka-toka iyayamae.” 8Lantas pinokilawamo nu Tumpu, “Pa' totu-totu'u tinoamo nu beleyum na mianku i Ayub? I dunia aiya songko-songko madi' ko mian anu ma'ima' na kinyonyoa sumo ia. Ia monsombah Aku ka' totu-totu'u madi' lewa' mombau anu ma'idek.”
9 #
Why. 12:10
Panyo Anu lewa' Monggoda nontaami, “Memang i Ayub monsombah belento, kalana ia mohumpak balosnyo lengkat hi belento. 10Ia, aha salaigan ka' iwi-iwi' na kakaya'annyo saja' nutoakon nu Belento. Kalajanyo nubalakati nu Belento, ka' ia obee'i nu Belento manjo' hondo na potu'on, lipu' songko-sogko nusongkohimo nu potu'onnyo. 11Panyo de maluannyo iwi-iwi' na kakaya'annyo aijo' o'alamo nu Belento, tantu nutotobi'akonmo na belento!”
12Jadi pinoto'imo nu Tumpu hi Anu Monggoda aijo', “Ma'ima'mo desumo itina', baumo pa' oposiamo na kakaya'an i Ayub iwi-iwi' asan boli oko mondoke ia.” Lantas Anu Monggoda aijo' nambamo pinala'iannyomo na Tumpu.
To ana-anak ka' kakaya'an i Ayub iningkotmo
13Ilapas aijo' madi' pinin to ana-anak i Ayub hau-haunyo mombau-baoun i laigan nu utus tu'a nu aha. 14-15Monti-montiik posaihon nu aha samian tinokamo mae popopadeka' i laigan i Ayub nompoto'i, “O tuan, aha mian nu Syeba tinokamo mae nontumbuhi kami hau-haunyo sapi' iwi-iwi' mompajeko ale' ka' keledai iwi-iwi' hau-haunyo mongotot madi' majo'on lengkat i kiijo'. Pinahuhuakonmo nu aha na binatang haha aijo', ka' to posa-posaihon nu Belento tuan. Pinaha pateanmo nuaha na anu i kiijo'. Olamo aku aiya na noko ala nopalai mae da mompoto'i hi belento Tuan.”
16Daagi' hau-haunyo ia motatae, tinokamo mae mule' na posaihon anu ko ohua'nyo nompoto'i, “Iwi-iwi' na domba nu Belento Tuan tiba aha anu lewa' molaya' sinosakmo nu kilat sahingga sinilakamo iwi-iwi'. Olamo aku aiya na noko ala nopalai mae da mompoto'i hi belento Tuan.”
17Ia ma'isa ilapas na notatae, tinokamo mae mule' na posaihon anu kototolu'nyo nompoto'i, “Toto'lu na gombuan nu tololang aha mian nu Kasdim nontomangmo iwi-iwi' na unta nu Belento Tuan. Ka' nompateimo to posa-posaihon. Olamo aku aiya na noko ala nopalai mae da mompoto'i hi belento Tuan.”
18Daagi' hau-haunyo ia motatae, tinokamo mae mule' na posaihon sangga'at anu momboa mae lele, “To ana-anak nu Belento Tuan hau-haunyomo nombau-bauon i laigan nu anak nu Belento Tuan anu tumpe-tumpenyo. 19Monti-montiik tinokamo mae na tombusisi' lengkat mae i sasu padang bone' ka' nontuda'imo laigan aijo' sahingga nonsilakaimo iwi-iwi' na anak nu Belento Tuan. Olamo aku aiya na noko ala nopalai mae da mompoto'i hi Belento Tuan.”
20Lantas tinuminjomo na i Ayub ka' binea-beaknyomo na baju' nyo salaku tanda sinusa'mo hondo na kinyonyoanyo. Kiniisnyomo na ubaknyo lantas tinolodadupumo ka' notatae, 21“Aku ihampeakon ola lima sampulu' sumo aitu mule' na aku de silakamo ola butong hondo-hondo. Tumpu na nombee'mo, Tumpu mule' na mongala. Ku puji' na sanggo-Nyo.”
22Jadi, maumo i Ayub nongoa'imo iwi-iwi' na balaa' susumo aijo', ia madi' nombau dosa' ka' madi' nompisala'i Tumpu Allah.
Currently Selected:
AYUB 1: LAILOE
Highlight
Copy
Compare
Share
Want to have your highlights saved across all your devices? Sign up or sign in
