YEREMIA 23
23
Anu otaha'imani aiya mae i ahop
1-2Tumpu Allah nu Israel notataemo, “Silakamo na belemiu o to pola-polaya' anu nonsilakaimo ka' nongga'a-ga'atakonmo mian anu palesayamo hi beleng-Ku! Belemiu sabenannyo ahi' monjagai mian anu palesayamo hi beleng-Ku, panyo madi' ahi' binau nu belemiu; belemiu nompojohokmo nosungkehet ka' nalaimo. Uuka aiya Ku hukumo na belemiu kalana belemiu nombaumo palabuatan anu ma'idek. 3Panyo tuha' nu mian anu palesayamo hi beleng-Ku po ule'mo Ku posihuk lengkat mae ilipu-lipu' anu pinomboan-Ku aha. Aha po ule'mo Ku sule'akon itano' kinahampean nu aha ka' lee' nu aha mompaka panjoo'mo. 4Aku mohangkatmo polaya' da monjagai aha. Mian anu palesayamo hi beleng-Ku madi'mo daagi' mabuhuk ka' madi'mo daagi' saja' nu lakat; madi'mo daagi' maga'a na mian anu aijo' hi aha. Aku, Tumpu notataemo.”
5 #
Yer. 33:14-16
Tumpu notatae, “Tokaje mae na tempo'nyo, Ku hangkatje na tomundo' samian anu adil lee' mae i Daud. Tomundo' aijo' saidi' mae pande na mompalentah ka' apa-apaa na obau saja' adin ka' saja' totu'u isongko-songko na lipu'. 6De ia na mompalentah, mian nu Yehuda salamatmo ka' mule' mian nu Israel tumuu'mo madi'mo ko anu mompoposia. Tomundo' aijo' osanggohimo ‘Tumpu anu momposalamat Kita’.
7Tokaje mae na tempo'nyo, mian madi'mo daagi' basumpa' atas sanggong-Ku, Tumpu Allah anu tumuu' nonomboamo mian nu Israel nosabat lengkat i Mesir, 8panyo atasmo sanggong-Ku, Tumpu Allah anu tumuu' nonomboamo mian Israel nosabat lengkat mae isa'angu' na lipu' anu isasu utara ka' mule' lengkat mae isongko-songko na lipu' sangga'at anu pinongga'a-ga'atakonan-Kumo aha. Aha po ule'mo jojoong iposi tano' kinahampeannyo.”
I Yeremia nompoto'imo mosia na to nabi-nabi
9Sumo uuka na potuunonku hi aha to nabi-nabi: Kinyonyoangku nalibosmo hondo ka' aku ilakatnyomo. Tumpu tiba potatae-Nyo anu susi' nompolonguimo mae aku susumo anu nanjoo'mo na nonginum anggur. 10Lipu'to aiya nobuke'mo nu mian anu madi' tulu-tulutan hi Tumpu. Kantumuu'an nu aha saja'mo mombau anu ma'idek ka' sinala'mo na monggunakon kakuasa'an nu aha. Kalana kutuk nu Tumpu, sahingga hemput ipadang anu mateges nanggasmo ka' songko-songko na lipu' ihumangmo.
11Tumpu notatae, “Nabi tiba imam madi'mo mongka'oho' tulu-tulutan hi beleng-Ku. Pakalaus mule' i uno nu Laigan-Ku ihumpak-Kumo na aha nombaumo palabuatan anu ma'idek. 12Kalana aijo' jalan nu aha malondomo ka' pintungmo sahingga aha tosumpunmo ka' tombahangkangmo. Ku potokamo mae na balaa' hi aha de tokamo mae na tempo'nyo pohukumanmo aha. Aku, Tumpu notataemo. 13Dosa' nu to nabi-nabi nu aha Samaria tinoang-Kumo. Aha motatae mompake atas sanggo nu Baal ka' nompotageo'mo pikilan nu Israel, mian anu palesayamo hi beleng-Ku.
14 #
Kej. 18:20, Yeh. 16:49 Panyo mule' ahi' i Yerusalem tinoang-Ku to nabi-nabi nombaumo palabuatan anu lebe ma'idek mule'. Aha binaleko'mo ka' nasala'mo ka' mule' nonsangaja'imo mian anu mombau palabuatan anu ma'idek sahingga madi'mo daagi' ko samian na kahanda' balatobat. Ku anggap na aha iwi-iwi' na'idekmo susumo mian anu jojoong i Sodom tiba i Gomora.”
15Tumpu Anu Mahakuasa notatae, “Saidi' mae Ku bee'mo hi to nabi-nabi anu jojoong i Yerusalem aijo' sosu'anon anu mapakat da okaan tiba lasung anu o inum kalana aha nonsaduakonmo to mia-mian isongko-songko na lipu' madi'mo noholomati mae Aku.” 16Kona hi aha mian anu jojoong i Yerusalem, Tumpu Anu Balakuasa notataemo, “Boli mompotombihing potatae nu to nabi-nabi anu ola mompoto'i hahan anu otaha'imani padahan ola lekos. Aha ola mompoto'i posi pikilan anu nu potutugakon nu aha misa' ahi' potuunon-Ku. 17Kona hi to mia-mian anu madi' ka'oho' mompotombihing potataeng-Ku, aha saja' montaloakon, ‘Belemiu salamatmo.’ Ka' hi toto samian anu panggaga hondo aha montaloakon, ‘Beleyum madi' mule' mohumpak balaa'.’ ”
18Aku motatae, “Madi' kosamian pe'e na nabi haha aijo' monsumbu' apaa na anu i uno nu pikilan nu Tumpu. Madi' ko anu aijo' hi aha toho'mo nohongo ka' mangalati' apa-apaa na anu tinanga'an-Nyomo; madi' mule' ahi' ko anu mompalahatikan kabai mompajuli potatae-Nyo. 19Tambuha' nu Tumpu sumomo ahi' antong anu nonsantipmo to mia-mian anu ko palabuatannyo ma'idek. 20Tambuha'-Nyo madi' momohokot de ma'isa pe'e iwi-iwi' jadi na anu tinanga'an-Nyomo. Saidi' mae imihinyo mian anu palesayamo hi Tumpu mangalati'je totu-totu'u han aijo'.”
21Tumpu notatae, “Makeke hondo na nabi haha aijo', padahan Aku madi' nompokau aha. Aha mompake atas sanggong-Ku na mompoto'i kaleba padahan madi' ko potuunon anu pinoto'ing-Ku hi aha. 22De bisuanyo nu sumbu' nu aha apaa an anu uutu i uno nu pikilan-Ku, tantu pinoto'imo nu aha hi mian anu palesayamo hi beleng-Ku sinin na anu tinaloakon-Kumo. Sahingga mian anu palesayamo hi beleng-Ku tantu balatobatmo madi'mo daagi' mombau ka' mule' madi'mo mombau kalakuan nu aha anu ma'idek.
23Aku, Tumpu Allah anu daagi' iyaya mae na tampat, misa' ola isa'angu' na tampat. 24Madi' ko samian na moko ala momposuluk butongnyo da madi' Ku toa, kalana Aku daagi' iyaya mae na tampat: kiita' isuluga' ka' aiya idunia. 25Iwi-iwi' na anu pinoto'imo nu nabi haha aijo' sinumbu'-Kumo. Nompakemo atas sanggong-Ku na aha nombaleko'i tukoonyo nu aha potuunon-Ku tinalimamo nu aha pino ipi mae. 26Sampe toka hipian na nabi haha aijo' mompotalas pikilan nu mian anu palesayamo hi beleng-Ku mompotokamo kaleba anu ola nu posi kuku nu aha ipala? 27Tantu nu tutugi nu aha tiba ipion haha aijo' anu nu sisikakon nu aha mian anu palesayamo hi beleng-Ku timbalimo mongkolilimi mae Aku susumo mompolee' nu aha nongkolilimimo mae Aku ka' nonsombahmo Baal. 28Nabi anu nongipimo sabenannyo ahi' mompoto'i, ‘Aiya ola anu ingipi.’ Panyo nabi anu nohumpakmo potuunon lengkat mae hi beleng-Ku na tionyo ahi' mompoto'i potuunon aijo' tiba sahondo-hondonyo. Gandum madi' timbali opokakanakon tiba hatinyo. 29Potataeng-Ku sumo apu, ka' mule' sumo pombaan anu mohansuni batu! 30Ku ewamo na to nabi-nabi anu mompoto'i potuunon anu lengkat mae hi bubu' aha sangalunyo lantas osisik tukoonyo aijo' lengkat mae hi beleng-Ku. 31Aku mule' suele mongewamo to nabi-nabi anu mompoto'i posi potataenyo lantas osisik tukoonyo aijo' lengkat mae hi beleng-Ku. 32Aku, Tumpu, mongewamo nabi haha aijo' anu mompoto'i ipionnyo haha aijo' anu baleko' ahi' hondo-hondo aijo'. Aha nompotalasmo pikilan nu mian anu palesayamo hi beleng-Ku nu kabaleko'an tiba sisik-sisik anu bulon aijo' hi aha. Aku madi' nompalentah nabi haha aijo'. Aha madi' hondo-hondo ko gunanyo hi aha mian anu palesayamo hi beleng-Ku. Aku, Tumpu, notataemo.”
Tanggungan anu nu bee' nu Tumpu
33Tuhan notatae, “O Yeremia, de daagi' ko sala' samian na mian anu palesayamo hi beleng-Ku, kabai samian na nabi kabai imam mompokilawa hi beleyum, ‘Apaa na anu pinotuun mae nu Tumpu?’, tionyo ahi' nu taami nu beleyum, ‘Beleyumo na tanggungan aijo' anu nu bee' nu Tumpu; kalana aijo' beleyum oboamo’. 34De daagi' ko sala' samian na mian anu palesayamo hi beleng-Ku kabai nabi kabai imam poule' motatae, mongkona ‘tanggungan anu nu bee' nu Tumpu’, saba' ia aijo' tiba to utu-utusnyo mae Ku bee'imo hukuman. 35Panyo mule' ahi', batu-batu mian tionyo ahi' mompokilawa hi sangalunyo tiba hi' to utu-utusnyo, ‘Pa' apaa na pinontaami mae nu Tumpu?’ kabai ‘Apaa na koonyo nu Tumpu?’ 36Aha madi'mo timbali daagi' monggunakon potatae, ‘tanggungan anu nu bee' nu Tumpu’. De daagi' ko mian anu monggunakon potatae aijo', saba' Ku pojadimo na potuunon-Ku totu-totu'u da baumo tanggungan anu obee'mo hi ia. Mian anu montaloakon ‘tanggungan anu nu bee' nu Tumpu'’ ola kalana monggeo-geo'akon potataeng-Ku, Tumpu Allah nu aha, Tumpu Allah anu tumuu', Tumpu Anu Mahakuasa. 37Aha ola ahi' mompoto'i sabenanyo hi aha to nabi-nabi, ‘Apaa na pinontaami nu Tumpu hi beleyum? Apaa na koonyo nu Tumpu?’ 38De daagi' ko anu madi' tulu-tulutan hi palentah-ngKu aijo' ka' daagi' mompake potatae, ‘tanggungan anu nu bee' nu Tumpu’, 39saba' Ku tolukmo na aha ka' o'alinmo jo'o-jo'on, maumo aha maumo kota' anu binee'-Kumo hi aha tiba mompolee' nu aha. 40Ku pojadimo na aha da ma'ambangmo ka' madi'mo kohalaga'nyo sampe toka sidu-sidutu' ka' mule' uki' nu aha madi'mo nu kolilimi nu mian.”
Currently Selected:
YEREMIA 23: LAILOE
Highlight
Copy
Compare
Share
Want to have your highlights saved across all your devices? Sign up or sign in
