YEREMIA 17
17
Dosa' tiba hukuman anu onabu'akonmo hi Yehuda
1Tumpu notatae, “O bansa Yehuda, dosa' nu belemiu tinulismo ikinyonyoa nu belemiu ka' isongko-songko na pasu'nyo nu mezbah nu belemiu iwi-iwi', pena besak na pinontulis ka' matanyo nu pena aijo' intan. 2Belemiu mian monsombah aijo' i mezbah-mezbah tiba ohii' nu bapilogotan anu pinotinjomo ponsomban Pilogot boune Asyera itoto sa'angu' na kau' anu tambok na honnyo, ka' mule' aita' mae ibawo nu puge'nyo iwi-iwi', 3ka' mule' ibawo nu bungkutnyo iwi-iwi' anu isambiha' nu kota'. Kalana iwi-iwi' na tampat anu ponsomban pilogot anu pipinotinjomo nu belemiu isongko-songko na lipu' ka' mule' kalana iwi-iwi' na dosa' anu bibinaumo nu belemiu, sahingga Ku posidamo na sampobali' nu belemiu da mongatomo sinin na halata' tiba kakaya'an nu belemiu. 4Belemiu saidi' mae talapakisamo mombee' tano' nu belemiu anu binee'-Kumo hi belemiu, ka' Ku pojadimo na belemiu da tulutmo hi sampobali' nu belemiu ilipu' anu madi' hondo-hondo osumbu' nu belemiu. Ku baumo na aijo' iwi-iwi' kalana tambuha'-Ku talalomo kosuhu-suhut susumo apu anu noakmo ka' madi'mo opoko ala opatei.”
Ngangahan nu pangajalan
5Tumpu notatae,
“De mian mompala'imo Aku, Tumpunyo,
ka' montaha'imanimo manusia
ka' mule' montaha'imanimo kahosonannyo,
saba' Ku hukumo na ia.
6Ia sumomo ahi' sosu'anon anu tumuu' ipadang tampat anu loas,
itano' anu kuunmo, ka' iliingmo ka' nintimusonmo
madi'mo toho' nongoa'i ka'ima'an.
7Panyo mian anu montaha'imani Aku
na saja' ahi' Ku balakati.
8 #
Mzm. 1:3
Ia sumomo ahi' kau' isonibi nu kaunyo anu mo'ili,
bakatnyo mo insu'mo toka-tokamo mokiijo' i uee.
Ia na madi' ahi' mongkabuhuk tempo' nu posinaa,
honnyo saja' molunou.
Maumo ahi' lipu' nu tokaimo mae nu posinaa, ia na madi' ahi' mangada'
kalana ia na saja' ahi' mimbua'.
9Kinyonyoa nu manusia na madi' ahi' opoko ala osumbu-sumbu'
pande hondo, nu lingkudui na sinin na apaa
ka' talalo ahi' tadok na belanyo.
10 # Mzm. 62:13, Why. 2:23 Aku, Tumpu monselidiki kinyonyoa
kinyonyoa nu manusia Ku uji'.
Batu-batu mian Ku balosakon sitimbang tiba kalakuannyo,
ka' Ku bee'i hukuman sitimbang tiba palabuatannyo.”
11Sumomo ahi' tomonsi' mongokobi anu misa' nggalau'nyo,
sumo aijo'mo na mian anu tageo' na kinyonyoanyo nohumpak halata'nyo.
Toka ipohintonga'anmo nu umunnyo
mingkotmo na halata'nyo aijo' iwi-iwi'.
Ipupuusnyomo nu kantumuu'annyo, onyata'je
taalu' ia mian anu ponga' ahi' hondo.
12Laigan nu Tumpunto sumomo kajojoongan nu tomundo' anu talasanggo hondo
aita' ibungkutnyo anu matangkas salatanmo pe'e momonanyo mae.
13O Tumpu, Belentomo na bau kataha'imanan nu Israel, mian anu palesayamo hi Belento;
iwi-iwi' na anu nompala'imo Belento saidi' mae ma ambangmo.
Aha saidi' mae mingkotmo madi'mo ko anu idunia aiya
ka' mambamo idunia nu mian anu sinilakamo.
Kalana, Belento pipinolengkatan mae nu uee anu bau kantumuu'an
pinala'ianmo nu aha, o Tumpu.
I Yeremia nongkakasemo da nu tulungi mae nu Tumpu
14O Tumpu popa alin mae na aku, da aku mahosonmo. Posalamatakon mae na aku, da aku salamatmo. Olanyomo ahi' belento na anu Ku holomati hondo! 15Mian notataemo mae hi belengku, “Iyamo mae na tambuha' iwi-iwi' nu Tumpu aijo'? Sahanyo uukamo mae ahi' na pompotudunan!” 16Panyo, o Tumpu, madi' toho' aku nonsekeli da Belento mompotudunmo mae balaa' hi aha. Aku madi' mule' ahi' mongkahanda'i da aha nu tokaimo mae nu balaa'. Sinumbu'mo nu Belento na aijo', o Tumpu. Nu sumbu' nu Belento apaa na anu tinaloakonkumo. 17Boli mae Belento timbali susumo anu mompopobuhuk mae kinyonyoangku. Belentomo ahi' na tampat popalaianku de nutokaimo mae nu kasusa'an. 18O'amalakon da anu mololoi' mae ka' anu momposansala' mae aku, nu popo ambangmo nu Belento ka' nu popo buhukmo hondo nu Belento. Panyo boli ahi' mombau sumo aijo' hi belengku, o Tumpu. Potokamo mae na balaa' hi aha sampe aha hansunmo ahi' silaka iwi-iwi.
Sinaa nu Sabat tionyo ahi' oholomati
19Tumpu notataemo mae hi belengku, “O Yeremia lako' mamba i Sabatan Daka' nu mian Da'isan anu nutului nu to tomu-tomundo' Yehuda de aha mosabat kabai minsoop ikota'. Lako' mule' suele isabatan daka' sangga'at i Yerusalem. 20Potokakon na potuunon-Ku hi to tomu-tomundo' ka' iwi-iwi' na aha mian nu Yehuda ka' mule' hi iwi-iwi' na mian anu jojoong i Yerusalem anu motulu isabatan haha aijo'. 21#Neh. 13:15-22 Poto'i sumo uuka: ‘De belemiu madi', mongka'ima'i silaka bolipe'e mongato balang isinaa nu Sabat, kabai momboa oposoop montulu sabatan daka' haha aijo' i Yerusalem. 22#Kel. 20:8-10, Ul. 5:12-14 Boli mokalaja kabai momboa balang maumo pa' apaa kahanda' osabatakonmo lengkat ilaigan nu belemiu i sinaa nu Sabat. Tungka'akonmo samata-mata na sinaa aijo' hi beleng-Ku susumo anu pinalentahkon-Kumo hi mompolee' nu belemiu. 23Panyo mompolee' nu belemiu madi' mongka'oho mohongo-hongo kabai mompalahatikan apaa na anu tinaloakon-Kumo. Aha panggaga hondo ka' madi' mongka'oho' montuluti kabai opokinde'i.
24Otuluti iwi-iwi' na palentah-ngKu. Boli mongato maumo pa' balang apaa montulu sabatan daka' ikota' aiya kakona isinaa nu Sabat. Tungka'akonmo samata-mata na sinaa nu Sabat bau bahagian-Ku, ka' mombau apa-apaa isinaa aijo'. 25De belemiu totu-totu'u ahi' montuluti sinin na palentah-ngKu aijo', saba' to tomu-tomundo' tiba anu singkap ko pangkatnyo mompalentah susumo i Daud na minsoop isabatan daka' nu kota' Yerusalem. Aha tiba mian nu Yehuda ka' mule' mian anu jojoong i Yerusalem saidi' mae monsake'imo kareta nunu hela' nu ajahan sahingga kota' Yerusalem jadimo lame' hondo. 26To mia-mian tokamo mae lengkat ikota-kota' Yehuda, ka' mule' lengkat mae ikampung toto ise-ise' i Yerusalem; aha tokamo mae lengkat ida'erah Benyamin, lengkat mae ida'erah tengke nu puge'nyo, lengkat mae ida'erah nu bungkutnyo, ka' mule' lengkat mae i Yehuda bahagian salatan. Aha momboamo mae i Laigan-Ku binatang-binatang anu okolobanakon, mau anu opotuno mau anu madi' opo tunu, ka' mule' gandum anu osombahkon tiba kamangian ka' palasombahan anu bau pontalima kaseh. 27Iwi-iwi' aijo' bisa timbali de belemiu montuluti Aku ka' montungka'akonmo samata-mata sinaa nu Sabat baumo bahagian-Ku. Boli mongato balang maumo pa' apaa montulu sabatan daka' haha aijo' i Yerusalem isinaa aijo'. De olanggaimo nu belemiu na palentah-ngKu haha aijo', saba' sabatan toto daka-daka' i Yerusalem tibamo laigan iwi-iwi' nu tomundo' Ku papuimo ingko-ingkot ka' mule' apunyo aijo' madi'mo daagi' opoko ala opatei'.’ ”
Currently Selected:
YEREMIA 17: LAILOE
Highlight
Copy
Compare
Share
Want to have your highlights saved across all your devices? Sign up or sign in
