YEREMIA 10
10
Monsombah pilogot
1O mian nu Israel, potombihing mae na potuunon nu Tumpu toka hi belemiu. 2Ia notatae, “Bolimo mombau kabiasa'an nu to bansa-bansa sangga'at ka' boli tolokengkeng na montoa tanda-tanda aita' ilangit anu nunu kabuhuk nu bansa haha aijo'. 3Adat nu bansang haha aijo' madi' hondo ko gunanyo. Aha montaa' kau' i alas ka' opoki bau hi tukang kau' da bau patong nu pilogot. 4Lapas mae patong aijo' nu opakeimo nu aha nu mosoni' tiba salaka, lantas opaku'imo da mahoson ka' madi' manabu'. 5Patong pilogot haha aijo' sumo mian na lupanyo anu opo una' i ale' nu kantimun. Aha madi' moko ala motatae, madi' moko ala tololangkas, ka' tionyo ahi' ohangkat. Boli okabuhuk na aha kalana aha madi' moko ala mombau anu ma'idek hi belemiu; ka' mule' mombau anu ma'ima madi' ahi' nu poko ala nu aha.”
Monsombah Tumpu
6Tumpu anu talasanggo hondo
Belento madi' ko anu moko ala mongkakanai
sanggo nu Belento talasanggo hondo ka' balakuasa hondo.
7 #
Why. 15:4
Ihe na madi' mongka'oho' tundu'
hi Belento, tomundo' nu aha bansa iwi-iwi'?
Memang, Belento patut hondo o, adati.
Iwi-iwi' na anu pande hi aha to bansa-bansa
ka' hi aha iwi-iwi' na tomundo' nu aha,
madi' ko samian pe'e na timbali pompokakana i
tiba butong nu Belento o, Tumpu.
8Ponga' ka' waweng na aha iwi-iwi'
kalana pilogot nu aha ola kau' samata-mata
madi' moko ala mompogulu' anu kogunanyo.
9Ia ilapisan nu salaka tiba mosoni'
anu binoa mae lengkat i Spanyol ka' lengkat mae i Ufas,
iwi-iwi' anu binau nu lima nu mian topo ukin tiba tukang tutuk mosoni'.
Baju'nyo hude anu mingkamumu' hondo tiba anu madi' talalo mingkamumu'
tinonun nu anu pande montonun ka' talalo ahi' pinokopianan.
10Panyo Belento, Tumpu Allah anu totu'u
Tumpu Allah anu mombee'i mae kantumuu'an, tomundo' anu sampe toka sidu-sidutu'.
De Belento pusamo tano' gayu'anmo
de Belento motambuha'mo to bansa-bansa madi' moko ala mongahopi.
( 11Belemiu o manusia tionyo ahi' mompoto'i hi aha taalu' to pilo-pilogot anu madi' nompotimbali langit tiba tano' aijo' opateimo. Aha madi'mo daagi' tumuu' itano' aiya.)
Nyanyian bau pompuji Tumpu Allah
12Tumpu nompotimbalimo tano' kalana kakuasa'an-Nyo,
nombontukmo dunia kalana kapandean-Nyo
ka' nombokamo langit kalana suele kapandean-Nyo.
13Ola pinalentah-Nyo
binuhokanmo na uee aita' ilanga
Lengkat mae ipuusnyo nu tano'
pinotoka-Nyomo mae na kundom,
ka' pinojadi-Nyomo na kilat pojingkalap i uno nu ujan,
ka' sinai-Nyomo mae na mombun lengkat itampat pinompo una'an-Nyo.
14Salatan nontoamo aijo' iwi-iwi' nangalati'je na manusia
taalu' ia ponga' ahi' ka' madi' ahi' ko anu nu pisumbu-sumbu'.
To tuka-tukang anu pande montutuk mosoni madi'mo pinalesaya,
kalana patong pilogot anu binaunyo aijo' madi' ko kaliangannyo
ka' mule' madi' ko santuu'nyo.
15Pilogot haha aijo' madi'mo ko halaga'nyo,
pantasmo ahi' na oletakon ka' lewa' o, alu.
De tokamo mae na tempo'nyo aha opateimo.
16Tumpu Allah i Yakub na madi' ahi'susumo pilogot haha aijo';
Ia na nompotimbali iwi-iwi na apaa.
Sanggo-Nyo aijo'mo Tumpu Anu Mahakuasa;
Ia nompile'imo Israel da timbalimo mian anu palesayamo hi Ia.
Tinokanmo nu buhuk na lipu'
17Mian anu jojoong i Yerusalem, belemiu otumbuhi! Kalana aijo' pogompilingmo! 18Uuka aiya Tumpu momboamo iwi-iwi' na bansang Yehuda itampat pompojoongan; belemiu iwi-iwi' Nu hansunimo ingko-ingkot. Sumo aijo' na potuunon mae lengkat hi Tumpu. 19Mian anu jojoong i Yerusaem notataemo daka-daka', “Kami binelaonmo daka' hondo ka' madi'mo opoko ala opakuli'i da ma'alin. Momonanyo sinangka mami saba' kasansala'an aiya opoko ala ahi' osimbu mami, padahan madi' ahi'. 20Kemah mami na'idekmo tiba kahohon bau pompuuti singkapmo nobotu'. Madi'mo daagi' ko anu moko ala mombau kemah ka' mompaha pokona hudenyo kalana to ana-anak nambamo.”
21Aku nontaamimo, “Pinonga'mo na polaya'to haha aijo'. Aha madi'mo nomoita pokinde' hi Tumpu, aijo' na sababnyo apaa na anu nu tanga'i nu aha madi' jadi, ka' kita notuhekapmo namba iyaya mae. 22Potombihing mae! Daagi' ko lele koonyo nu aha sa'angu' na bansa isasu utara nompopobuhukmo mae. Suludadu nu aha mompojadimo kota-kota' nu Yehuda liingmo ka' madi'mo daagi' ko anu monjojoongi. Dedeng nu alas maninsulukmo kiijo' mae.”
23O Tumpu, madi' ko samian pe'e na anu mahakuasa
timbali montantukan uki'nyo kabai moko ala mosi tantukan jalan nu kantumuu'annyo.
24Doke mae na kami o Tumpu
panyo boli ahi' talalomo opolanit na mondoke mae.
Ka' boli ahi' mohukum mae kami de Belento hau-haunyomo pusa,
kalana tantu kami silakamo ingko-ingkot.
25Potudunje na kapusan nu Belento
hi aha to bansa-bansa anu madi' mongakui Belento
ka' madi' monsombah Belento.
Kalana aha nonsilakaimo mian anu palesayamo hi Belento ingko-ingkot
ka' mule nohansunimo lipu' mami.
Currently Selected:
YEREMIA 10: LAILOE
Highlight
Copy
Compare
Share
Want to have your highlights saved across all your devices? Sign up or sign in
