YESAYA 7
7
Sa'angu' na potuunon toka hi Tomundo' Ahas
1 #
2Raj. 16:5, 2Taw. 28:5-6 I Tomundo' Ahas anak mo'ane i Yotam makumpu i Uzia. Tempo'nyo ia nompalentah Yehuda, jinadimo na pahampatean. I Rezin tomundo' nu aha Siria nahangewamo i Pekah anak mo'ane i Remalya tomundo' nu aha Israel tinokamo mae nontumbuhi Yerusalem. Panyo madi' pinoko alanyo na kota' aijo'.
2Salatan tomundo' nu aha Yehuda nohongomo taalu' suludadu nu aha Siria ninsoopmo i daerah nu aha Israel anu monsangaja'i ia, ia ka' bansanyo nabuhukmo hondo, sahinga aha ilakatnyomo sumomo kau' anu ginayu'mo nu mombun.
3Tumpu notataemo hi Yesaya, “Boa na anak nu beleyum i Syear Yasyub ka' lako' pompahapia i Tomundo' Ahas. Beleyum singkabotje ipuusnyo nu kolam sasu buannyo tampat babaso'an hude. 4Poto'i hi tomundo' da ia tataap mogogau panyo boli ahi' bata-bata. Boli ia mabuhuk kabai bingung. Tambuha' i Tomundo' Pekah tiba i Tomundo' Rezin tiba suludadu nu aha mian Siria haha aijo' ola susumo ohua' na lo'uton nu apu anu kotibuknyo, jadi madi' ahi' moko ala mompoposia. 5Siria nosa'angu'mo tiba Israel tiba tomundo'nyo. 6Aha mongka oho'mo motumbuhi Yehuda ka' lewa'mo nonggala-gala miannyo da aha mosa'angu'mo hi aha Siria tiba Israel lantas mohangkatmo anak momo'ane i Tabeel da timbali tomundo'.
7Panyo Aku, Tumpu, mompoto'i, saba' han aijo' madi' mule' koko timbali, 8kalana Siria madi' lebe mahoson molingkudui Damsyik puso nu kota'nyo, ka' Damsyik madi' lebe mahoson molingkudui i Tomundo' Rezin. Sadangkan i uno nu tempo' anompulu' ka' olima' nataun, Israel nobagi-bagimo sahingga madi'mo noko ala tinotahan salaku sa'angu' na bansa. 9Israel madi' lebe mahoson molingkudui Samaria puso nu kota'nyo, ka' mule' Samaria madi' lebe mahoson molingkudui i Tomundo' Pekah.
De belemiu madi' totu-totu'u palesaya hi beleng-Ku memang belemiu madi'mo moko ala totahan.”
Nompoto'imo tanda Imanuel
10Tumpu nompotoka mule' potuunon sangga'at toka hi Ahas: 11“Poita da Tumpu Allah nu beleyum mombee'i mae sa'angu' na tanda hi beleyum pa' lengkat mae i dunia nu mian anu sinilakamo i aluknyo kabai lengkat mae aita ilangit.”
12Tinaaman i Ahas, “Aku madi' mongka'oho' momoita tanda. Aku madi' mongka'oho' monsobai Tumpu.”
13Lantas i Nabi Yesaya notataemo, “De sumo itina', potombihing mae lee' i Tomundo Daud! Ma'isa sukup na belemiu monguji' kasabanan nu manusia sahingga belemiu monguji mule' kasabanan nu Tumpu Allah?
14 #
Mat. 1:23
Uuka aiya posi Tumpumo na mombee'i tanda hi belemiu samian na langkoyang poboa'mo ka' mompohampemo samian na anak mo'ane anu osanggohimo Imanuel. 15Salatan Ia daka'mo ka' timbalimo montantukan kaputusannyo, lipu' aijo' mohumpakmo kantumuu'an anu ma'ima'. 16Kalana ma'isa pe'e tinoka itempo'nyo ohua' na lipu' anu nu palentah nu to tomu-tomundo' nunu kabuhuk nu beleyum aijo' opala'imo sahingga madi'mo ko miannyo anu monjojoongi.
17Tumpu mompotokamo mae tomundo' nu aha Asur lantas beleyum ka' belemiu salaigan ka' mule' mian da'isan nu beleyum mongoa'imo sinaa anu talalo hondo manjoo' na kasusa'annyo ka' mule' sansala nulingkudui apaa na anu toho'mo ingoa'an salatanmo pe'e kalaja'an Israel ka' Yehuda nobagi-bagimo.
18-19Tempo'nyo aitu Tumpu nolagamo aha mian nu Mesir tiba aha mian nu Asyur lantas ohua' na bansa aijo' tinokamo mae susumo sampahas na lalo tiba uani' mongkampuhi' iwi-iwi na bangka'nyo tiba bungkutnyo anu ma'ampi ka' suele iwi-iwi' na olot nu batu gahanggan. Kuhat anu kohii'nyo ka' tampat anu hemputon nu songkohimo nu aha.
20Tumpu montamboimo tomundo' Asyur da mompobelesi' Israel susumo samian na anu lewa' mongkiis, mongkiismo iwi-iwi' bulu nu ubak tiba bulu nu butong.
21Tempo'nyo aitu de kosamian na anu mompotuu' sapi' sa'angu' anu daagi' bata'nyo ka' ohua' na mee', 22juu' nu susunyo anu ohumpak ipotuu'on haha aijo' labi-labimo na nu inum nu aha mian anu daagi' tinontuha' ilipu' aijo'. Memang aha monginumo susu ka' juu' nu uani'.
23Tempo'nyo aitu ale' nu anggur iwi-iwi' toto sa'angu' na ale sinu'anan samadala na pu'unnyo nu anggur anu angga'nyo samadala na doi salaka sa'angu' na ale' me hemput anu kohii'nyo na montumuu'i. 24Mian anu mamba ikiijo' tionyo ahi' momboa pompelet tiba hihisnyo kalana songko-songko na lipu' aijo' ningkuhatmo ka' kinohii'nyomo. 25Ka' mule' aita' mae idaerah nu bungkutnyo anu biasanyo okalaja ka' osu'ani, suele uuka aiya tinimbalimo kuhat ka' kinohii'nyomo sahingga mian madi'mo baani na mamba ikiijo'. Tano' aijo' memingguna bau tampat pongototan nu sapi' tiba domba.”
Currently Selected:
YESAYA 7: LAILOE
Highlight
Copy
Compare
Share
Want to have your highlights saved across all your devices? Sign up or sign in
