YESAYA 5
5
Nyanyian anu mompantis sangalu ka' mule' ale' nu anggur
1 #
Mat. 21:33, Mrk. 12:1, Luk. 20:9 Potombihing mae na nyanyianku
anu mompantisakon ale' nu anggur nu sangalungku.
Sangalungku ko ale' nu anggur
isohipi' nu puge'nyo anu molumba'.
2Nu pansun na tano'nyo
ka' nu paha alini na batunyo.
Sinu'annyomo na anggur anu pinile'annyomo
ka' binaunyomo na laigan tangka-tangkas bau ponjagaian.
Kinekenyomo sa'angu' na bolo' da pombauan
tampat pompao'an nyo anggur,
lantas nu tanda'imo na bua'nyo maha,
panyo bua'nyo anu ola anggur anu malosing.
3Jadi uuka aiya sangalung-Ku notataemo,
“Belemiu iwi-iwi' anu jojoong
i Yerusalem tiba i Yehuda,
putusi na ulusannyo pa' mosia na ale' nu anggur-Ku tiba Aku.
4Daagi' apaa mule' na anu tionyo ahi' Ku bau,
panyo ma'isa Ku bau na ale' nu anggur-Ku aijo'?
Kadaka' ia nimbua'mo anggur anu malosing,
ka' madi' ahi' nimbua' anu matami' susumo
anu ingima-imanan-Kumo?
5Sumo uuka na Aku mombau ale' nu anggur-Ku aijo'.
Balabat anu montikubi mae aijo' Ku gautakonmo,
pagan mesen anu montingki'i mae Ku hobo'akonmo,
lantas Ku pokilayamo da nu ideimo nu binatang anu mahangas
ka' lewa' mompahampeja'akon.
6Ku pojohokmo da nutumuu'imo nu hemput nu alas.
Anggurnyo madimo lewa' Ku patagi na sumpenyo
ka' mule' madi'mo lewa' Ku sube'i na hemputnyo.
Pakalaus Ku pobakasmo da nu kalumbungimo nu hemput anu kohii'nyo,
ka' mule' iwi-iwi na kundom Ku tewa'mo da bolimo montudunakon ujan.”
7Kalana ale' nu anggur nu Tumpu Anu Daka na Kuasanyo
aijo'mo aha mian nu Israel,
ka' aha mian nu Yehuda
aijo'mo na anggur anu sisinu'an-Nyomo.
Aijo'mo hi aha na pontaha'imanian-Nyo ka'adilan
panyo ola mule' ahi' kabuhingison.
Aha na Nu taha'imani montoongi totu-totu'u anu hondo
padahan ola mule' ahi ko anu aijo' hi aha na momoita ka'adilan.
Palabuatan ma'idek anu binaumo nu manusia
8Silakamo na belemiu anu lewa'mo nongoli ka' lewa'mo nongagoi ale' da bau pontuangi apaa na anu nu belemiu! Madi' pin mingkotmo na tampat nu aha mian sangga'at sahingga me belemiu na jojoong ilipu' aiya. 9Ihongongku Tumpu Anu Daka' na Kuasanyo binasumpa'mo, “Iwi-iwi na laigan anu to daka-daka' haha aiya ka' mule' anu to ima-ima' haha aiya iwi-iwi' aijo' longkangmo madi'mo ko anu monjojoongi. 10Isi nu ale' madi'mo ko anu ohumpak, ale' nu anggur anu ko ewanyo sampulu' na hektar hasinnyo me sampulu' na liter na ueenyo. Sa'atu na liter na bine' nu gandum hasinnyo mae ola sampulu' na liter na gandum.”
11Silakamo na belemiu! Lengkat pe'e daagi subu sampe malom belemiu ola sola' bala inum inumon anu mokopalangu ka' lewa' malangu. 12I bau-bauon nu belemiu ko onyi' nu kasapi', gambus, gandang ka' mule' puloit ka' mule' inumon anggur. Panyo belemiu madi' mompajuli apaa na anu kinalajamo nu Tumpu tiba anu binau-Nyomo. 13Kalana aijo' mian anu palesayamo hi beleng-Ku anu pinonga'mo oboamo salaku mian anu ihakop. To pola-polaya' tiba aha mian da'isan saidi' mae mateje nu ohop ka' mule' mate nu megot. 14Nganga' nu kapatean tolo anga'mo ewa-ewa kalana moloyomo aha mian to pola-polaya' i Yerusalem tiba mian da'isan anu binalame-lame'mo nombau bau-bauon.
15Toto samian opopo ambangmo ka' anu buulon madi'mo ohalagai. 16Panyo Tumpu Anu Daka na Kuasanyo mombaumo anu totu'u salaku pompotoa-Nyo katalasanggoan nu kakuasa'an-Nyo. Ia momputusi bansa-Nyo nu ka'adilan-Nyo salaku pompotoanyo kasusi'an-Nyo. 17Ikota' anu ihansunmo saidi' mae mee' tiba domba mongototmo hemputnyo ka' mule' madi'mo kakulangan i anu okaan.
18Silakamo na belemiu anu me saja' mombau dosa! 19Belemiu notatae, “Bakasmo da Tumpu anu susi' nu aha Israel mali-lia' mae mombau katantuan! Bakasmo da Nu pojadimo na anu tinanga'an-Nyomo da otoanto ka' mule' osumbu'tomo.”
20Silakamo na belemiu anu monggeo-geo'akon han anu totu'u tiba anu ma'idek, anu i uno nu lahasia tiba anu memang osumbu', anu mapakat tiba anu matami'!
21Silakamo na belemiu anu mongakui butongnyo mapaham ka' mule' pande!
22Silakamo na belemiu anu pa inum anggur! Belemiu baani hondo ka' talapuji' de opogogalo'akon na inumon anu moko palangu! 23Panyo ola kalana mohumpakmo doi anu abu pontamboi, sahingga belemiu mompobebasmo anu kokasala'annyo ka' mombanta mian anu madi' kokasala'annyo da madi' pokonai ka'adilan. 24Belemiu madi'mo montalima pangajalan nu Tumpu Anu Daka' na Kuasanyo ka' mongalumo palentah nu Tumpu anu susi' nu aha Israel. Kalana aijo' susumo hat tiba hemput anu manggasmo mo'angot na nu kaan nu apu, sampe toka kaiyong ibaka-bakatnyo na belemiu mahutakmo ka' mule' bunga-bunga nu belemiu suele manggasmo ka' nu puhakonmo nu mombun ingko-ingkot. 25Tumpu montambuha'imo bansa-Nyo. Ia binalasiapmo da mohukumo aha. To Bungku-bungkutnyo gayu'anmo; bangke' nu mian anu sinilakamo motanatamo susumo duhehe i tutuus jalan. Panyo Tumpu daagi' tataap motambuha' ka' mule' daagi ahi' mohukum.
26Tumpu molagamo bansa anu majo'on ka' aha tokamo mae malia-lia'! 27Aha saja' mosadia mahampate ka' madi' monsumbu' malawe. Aha madi' toho' hoyot kabai matatundu'. 28Hihis nu pana'nyo matajom ka' anu pompeletakonnyo me kokogia' opeletakon. Konuku nu ajahannyo mokuut susumo behese' ka' mule' loda nu karetanyo jokot na tumoyo sumomo ahi tombusisi'. 29To sulu-suludadunyo molohuu' susumo singa anu sala'je nonsa'u kaanonnyo lantas pinopadeka'akonnyomo ka' madi' ko anu moko ala mongagoi aijo' hi ia.
30Toka isinaa aijo' songko-songko na Israel kahongoanmo na ais nu anu mahampate sumomo buhok nu bokon da ko daka'nyo.
Soba toa songko-songko na lipu' aijo' pinikatmo ka' mule' nompaha genso-gensotmo. Jingka pinikatmo hondo.
Currently Selected:
YESAYA 5: LAILOE
Highlight
Copy
Compare
Share
Want to have your highlights saved across all your devices? Sign up or sign in
