YESAYA 30
30
Palajanjian anu madi' ko gunanyo tiba Mesir
1Tumpu notatae, “Silakamo na to pola-polaya' nu aha Yehuda kalana aha notomuhukmo mae hi beleng-Ku. Aha nontulutimo tanga'an-tanga'an anu misa' tanga'an-Ku. Aha nontandatanganimo palajanjian anu madi' sosok tiba pongka'oho'-Ku. Sahingga tinumalatambunmo na dosa' nu aha. 2Aha nambamo i Mesir madi' pe'e nomoita mae kaputusan-Ku. Aha nomoitamo da boli opoposia na aha hi aha Mesir ka' nontaha'imanimo da nutulungi i tomundo' Mesir. 3Panyo tomundo' aijo' saidi mae madi' ahi' nompalahatikan aha ka' indi nu aha da boli opoposia na aha i Mesir madi' ahi' mingkaliangan.
4Maumo ahi' to mia-mian anu sinai lengkat mae i Yehuda namba i Mesir momoita da boli opoposia tinokamo ikota-kota' Zoan tiba Hanes i daerah Mesir, 5iwi-iwi' na mian saidi' mae jadi ma'ambang kalana nontakabunakonmo bansa anu madi' kogunanyo hi aha. Anu ihumpak nu aha misa' ahi' ka untungan kabai da tinulungan mae panyo ola ahi' da pinopo ambang mae.”
6Sumo uuka na potuunon nu Tumpu kona hi aha binatang-binatang anu jojoong i tano' sasu salatan, “Tomia-mian anu sinai aijo' nompaha posake'imo keledai tiba unta nu aha anu opalasenakon, lantas nololonga'mo daerah anu manjoo' hondo na anu okabuhuk kalana kajojoongan nu singa, ulo anu kobisa'nyo ka' mule' ulo anu kopolipiknyo. Palasen haha aijo' nu palasombahkon nu aha hi sa'angu' na bansa anu madi' moko ala montulungi aha. 7Anu pinontulungi mae nu Mesir ola pinalasuma. Kalana aijo' Mesir Ku sanggohi, ‘Ulo anu madi' mompoposi’.”
Bansa anu madi' tulu-tulutan
8Tumpu nompalentahmo aku da montulis palabuatan ma'idek nu mian anu palesayamo hi Ia isa'angu' na kitab salaku bau tanda anu madi' okolilimi sampe toka sidu-sidutu'. 9Kalana, aha aijo' sa'angu' na bansa anu saja' mongka'oho' motomuhuk hi Tumpu, saja' baleko', ka' madi' mongka'oho' mompotombihing pangajalan nu Tumpu. 10Aha nontaloakon hi to nabi-nabi, “Gunggumi na nganga' nu belemiu! Boli mae mompoto'i hi kami hahan anu totu'u, panyo ola ahi' apaa na anu oka'ima'i mami ohongo. Bakas da kami ola saja' mompopikilakon anu madi' mingkaliangan. 11Lako'mo bolimo mamba mae hi kami, pongalamo jalan sangga'at. Bolimo mae sola' mongganggu kami tiba Tumpu Israel anu susi'.”
12Kalana aijo' Tumpu nu Israel anu susi' nompoto'imo sumo uuka, “Belemiu madi'mo nontalima potataeng-Ku ka' montakabunakonmo lewa monsakisa ka' mongakali. 13Kalana aijo' belemiu sinala'mo. Belemiu sumomo ahi' pagan mesen tangka-tangkas anu noleetmo lengkat mae aita' toka-toka akaong i aluknyo; monti-montiik ahi' belemiu motuamo. 14Belemiu mohintutumo susumo kuhon tano' anu moposo'mo ka' motatabumo, sahingga anu nohintutumo aijo' madi'mo ahi timbali opake mau ola ponsake'an mae oba aijo' itolukun kabai mau ola bau pontauk uee aijo' ibak nu uee.”
15Tumpu Anu Matangkas na Kuasanyo, Tumpu nu Israel anu susi', nompoto'imo hi mian anu palesayamo hi Ia, “Balatobatmo ka' potataap na kinyonyoa da belemiu Ku posalamat. Palesaya mae na Aku nu kinyonyoa anu madi' mimpio-pio' da belemiu Ku bee'ije kahosonan.” Panyo belemiu madi' ahi mongka'oho'! 16Ola mule' ahi' belemiu binatanga'mo nopalai da boli nu poposia nu sampobali' nu belemiu ka' nonsake'imo ajahan anu malia' hondo. Ma'ima'mo! Memang belemiu tionyo ahi' mopalaimo! Tinutugan nu belemiu au'aitu ajahan nu belemiu atina' sukupmo hondo na kolia'yo na ia mopadeka' padahan anu montotumputi mae belemiu na lebe malia'. 17Samadala na mian saidi' mae ola mopalai de montoamo samian na sampobali' montumbuhimo mae belemiu, ka' de ahamo olima' na montumbuhi mae belemiu iwi-iwi' mopalaimo. Anu sanggombu na suludadu nu belemiu me totahan sangkau na tiang nu bandela' aita' ipuge'nyo. 18Maumo ahi' sumo aijo' panyo Tumpu na me ahi' montatanda tempo'nyo, Ia mompotoamo kalibosan-Nyo hi belemiu. Ia memang mongkalibosimo belemiu. Kalana Tumpu aijo'mo na Tumpu anu mombau apa-apaa madi' hondo sala'. Mohumpak kabilahian na mian anu saja' mompasehakon kantumuu'annyo hi Ia.
Tumpu mombalakatimo mian anu palesayamo hi Ia
19O, belemiu anu jojoong i Yerusalem, belemiu madi'mo me saja' humang. Tumpu mongkalibosimo, ka' sampamo montaami belemiu de belemiu mongkakasemo momoita tulung hi Ia. 20Tumpu daagi' mombee'i tempo da osobai na belemiu nu soba'an anu maboat salaku bau pongajan belemiu. Panyo uuka aiya Ia na monsangalui belemiu sahingga o, oa'imo nu belemiu na Ia saja' ahi' atina' hi belemiu. 21De belemiu madi'mo montulu ijalan anu memang ahi' ojalani, aitu mae ihiku nu belemiu ohongomo na potatae-Nyo montaloakon, “Aiya ahi' mae na jalan; tuusakon na jalan aiya.” 22Iwi-iwi na patong bapilogotan nu belemiu anu ilapisan nu salaka tiba mosoni' saidi' mae o, alinmo nu belemiu susumo duhehe ka' motatae, “Lako' pala'imo na aku!” 23De belemiu motuganmo bine', Tumpu montudunakonmo mae ujan da bine' aijo' tumuu' da kohasinnyo ahi' anu opadak ka' molabi-labi. Ka' mule' potuu'on nu belemiu sadiamo na hemput padang anu ewa na tampatnyo. 24Sapi' lakinyo tiba keledai anu mompajeko ale' nu belemiu mongototmo ototon nu potuu'on anu ma'ima' hondo anu memang pinosi potoukamo. 25De tokamo isinaanyo benteng-benteng nu sampobali' nu belemiu otikumo ka' aha to mia-miannyo opateimo toto sa'angu' na bungkutnyo tiba puge'nyo mompolubatmo mae gimpangan-gimpangan nu kaunyo. 26Bitu'on majingkamo mae susumo batu nu sinaa, ka' mule' batu nu sinaa lebemo majingka pimpitunmo lipat nulingkuduimo na jingkanyo bia-biasamo, sumomo ahi' jingka nu anu pitunsinaa na oposa'angu'mo. Iwi-iwi' aijo' saidi' mae jadimo de Tumpu mombobodimo ka' mompo'alinmo iwi-iwi na bela nu mian anu palesayamo hi Ia anu saja'mo ingoa'an nu aha.
Tumpu mohukumo Asyur
27Kakuasa'an tiba Tumpu talasanggo ahi' otoamo aijo' mae majo'o-jo'on. Apu tiba tibuk aijo' bau pomponyata'nyo saba' Ia notambuha'mo. Ia motataemo tiba aha ka' potatae-Nyo aijo' mompapui susumo apu. 28Nu sai na mombun mamba pe'e momona susumo iaba' anu kotangkas-Nyo ungka'mo gogohong anu monganjuhakonmo sinin na apaa. Nu silakaimo iwi-iwi' na to bansa-bansa ka' madi'mo mompojadi sinin na tanga'an nu aha anu ma'idek.
29Panyo belemiu mian anu palesayamo Tumpu, saidi' mae lame'mo ka' lewa'mo manyanyi susumo pihi de molame'akon agama. Belemiu saidi' mae bilahimo susumo to mia-mian lumajang mojajalan tiba mian anu mompuhi puloit mamba i Laigan nu Tumpu, anu monsangaja'i Israel.
30Tumpu saidi' mae mompohongomo potatae-Nyo anu daka' hondo ka' toto samian molasaimo kuasa-Nyo anu opalias hondo. Tambuha'-Nyo saidi' mae mompotokamo mae ujan anu daka' hondo, ujan batu tiba antong anu makansang hondo. 31Aha mian nu Asyur tolokengkengmo de mohongomo potatae nu Tumpu ka' molasaimo hukuman-Nyo mabo-maboat. 32Hau-haunyo aha molasaimo pondoke-Nyo, mian anu palesayamo hi Tumpu na balasanang-sanang ahi' nu musik tiba gandang ka' mule' kasapi'. Tumpu na mahampate mongewa mian nu Asyur. 33Nai puan pe'e mae na nomposadia tampat pompapuian i tomundo' Asyur. Tampat aijo' maleeng ka' mule' bola ingisianmo kau' bau pomposuli anu pinaha potambunmo manjoo' hondo. Tumpu na saidi mae momposuli apunyo, sawo-nyo na mompuhi, pokakanamo ahi' susumo kaunyo nu belerang na kobohosnyo.
Currently Selected:
YESAYA 30: LAILOE
Highlight
Copy
Compare
Share
Want to have your highlights saved across all your devices? Sign up or sign in
