YESAYA 27
27
1 #
Ayb. 41:1, Mzm. 74:14, 104:26 Tempo'nyo aijo' Tumpu monggunakonmo bajak-Nyo anu ko aja'nyo ka' ma katajom hondo kalana kahanda'mo mohukum ulo anu lewa'mo nombialos kahanda'mo mombutu', ka' mule' kahanda'mo mompatei talenga'nyo nu ulo i ambai.
2Tempo'nyo aijo' Tumpu motataemo,
“Panyanyimo nyanyian anu mongibalatakon ale'-Ku nu anggur anu ma'ima'an.
3Aku, Tumpu, na ponjagainyo;
sansina-sinaa na ia Ku dudu'i,
sinaa ka' pihi ia Ku jagai da boli ko anu toka mae mompoposia.
4Aku madi'mo daagi' motambuha'.
De bisuanyo ko hemput kabai kuhat anu ko hii'nyo,
Aku na mompatei
ka mompapui sampe mingkot.
5Panyo de aha anu monsampobali' mian anu palesayamo hi beleng-Ku molio da Ku jagai na aha,
sahanyo aha baladamemo tiba Aku,
sampamo, baladame tiba Aku.”
6Tempo' anu aiya mae o, ahopi,
bansa Israel pokakanamo susumo kau'
mimbakatmo ka' ko pintu-pintuangnyomo ka' mule' monsongkohimo
tano' aiya anu koko buanyo.
Tumpu mohukumo bansa-Nyo
7Tumpu mohukum mian anu palesayamo hi Ia, madi' sumo koboatnyo nu hukuman anu nu pokona hi mian anu monsampobali' aha. Ia madi' mompatei mian anu palesayamo hi Ia, susumo ia nohukumo sampobali'-Nyo. 8Tumpu nohukumo mian anu palesayamo hi Ia aijo'mo nomboa aha pinojoong ilipu' nu mian anu isalipu'an. I laa'-Nyomo na aha nu mombun anu ma'idek lengkat mae isasu kabete'an. 9Panyo dosa' nu aha Israel ola timbali o, ampuni de mazbah nu to pilo-pilogot ogiling sampe hansun susumo tilon. Iwi-iwi' na anu bau pompapuan kamangian ka' anu molambangakon Pilogot boune Asyera tionyo ahi' suele ohansuni.
10Kota' anu kobentengnyo aijo' ilingmo ka' pinala'ianmo susumo padang tampat anu mateges anu madi' ko anu monjojoongi. Gombuan nu potuu'on lewa' mongotot ka' milawe ikiijo' ka' mongingkoti hon nu panga' nu kau'. 11De to panga-panga'nyo manggasmo ka' mopato'mo tokamo mae nu ala nu to bou-boune da bau kau' anu oposun.
Bansa aijo' madi' ko anu nu pisumbu-sumbu', sahingga Tumpu anu nompotimbalimo ia madi'mo daagi' mongkalibosi aha.
Tumpu po ule'mo nompotinjo bansa-Nyo
12Tempo'nyo aijo' Tumpu momposihukmo bansa-Nyo toto sa'angu' lengkat mae i Kaunyo nu Efrat toka-toka ipotempasan tiba Mesir. Nu posi po iwi'mo na aha susumo mian mompo iwi'mo batu nu gandum da madi' maninggalo' tiba ota'nyo.
13Tempo'nyo aijo' opo onyi'mo na tolompet daka-daka' bau polaga mule' da minsusule'mo mae na aha mian nu Israel anu binoamo i Asyur tiba i Mesir. Aha tokamo mae i Yerusalem da monsombahmo Tumpu aita' i puge'-Nyo anu susi'.
Currently Selected:
YESAYA 27: LAILOE
Highlight
Copy
Compare
Share
Want to have your highlights saved across all your devices? Sign up or sign in
