IBRANI 13
13
Mosia na momposanang kinyonyoa nu Tumpu
1Tionyo ahi' komiu tataap mompaha kali-kalibosi samian ka' samian susumo to mia-mian Kristen anu moto utus. 2#Kej. 18:1-8, 19:1-3 Boli bata-bata na montalima i laigan miu to mia-mian anu ma'isa osumbu' miu. Kalana de mombaumo anu sumo aijo' daagi' kino mian madi' sinumbu-sumbu'nyo, padahan ia nontalimamo malaikat i laigannyo. 3O inau' na to mia-mian i uno nu talungku', au'aitu komiu suele kiijo' i uno nu talungku' tiba aha. Ka' to mia-mian anu lewa' okabisa'i, tionyo ahi' o inau' miu na aha au'aitu komiu suele binaumo sumo aijo'.
4Iwi-iwi' na mian tionyo ahi' mompotoa kalakuan mongadati po'osoan, mokonyo aijo' tionyo ahi' mo'ane bengkele' mompaha hongo-hongo samian ka' samian. Mian anu mombau anu mahenyu ka' mian anu masala' nu putusije nu Tumpu.
5 #
Ul. 31:6, 8, Yos. 1:5 Boli kantumuu'an miu mongka'ima'i doi na mongkuasai, panyo tionyo ahi' komiu mongoa'i sukupmo tiba apaa na anu daagi'mo hi belemiu. Kalana Tumpu notataemo, “Aku madi' mompojohok kabai mompala'i beleyum.” 6#Mzm. 118:6 Kalana aijo' kita baani ahi' na motatae,
“Tumpu na anu Montulungi mae aku,
aku madi' mabuhuk.
Apaa na anu nu poko ala nubau nu mian hi belengku?”
7Boli okolilimi na to pola-polaya' miu anu mompotoka potuunon nu Tumpu hi belemiu. Opalahatikan mosia na aha tumuu' ka' mosia na aha silaka, ka' obau sonto' na iman nu aha. 8I Yesus Kristus tataap pokakana mau naipuan mae, tempo' uuka, ka' sampe toka sidu-sidutu'. 9Boli mompojohok iwi-iwi na ngahan nu pangajalan anu madi' minsoop i akan aijo' ola mompokalilu komiu. Kinyonyoanto tionyo ahi' opohoson nu kanonongan nu Tumpu, aijo' na ma'ima'; boli ola kalana atulan haha aijo' mongkona anu o kaan. To mia-mian anu naipuan mae nombatukimo totu-totu'u atulan haha aijo' madi' nohumpak apa-apaa anu ko gunanyo.
10Kita daagi' ko mezbah sa'angu' bau ponsombahkonan koloban hi Tumpu. Ka' to ima-imam anu mokalaja i uno nu Kemah nu Tumpu, madi' ko hak mongkaan koloban anu aita' i bawo nu mezbah aijo'. 11#Im. 16:27 Baso' nu binatang anu sinombahkonmo salaku koloban bau pongampuni dosa', imam daka' na momboa i Salipi' anu Susi' hondo, panyo bangke'nyo nu binatang aijo' opapui i sambiha'nyo nu kemah aijo'. 12Mokonyo aijo' i Yesus suele sinilaka i sambiha'nyo nu tumban daka' nu kota da baso'-Nyo bau pombaso'i dosa' nu mian-Nyo anu palesayamo, hi Ia. 13Kalana aijo' imbo' da kita mamba hi Ia i sambiha'nyo nu kemah da suele opopo'ambang susumo Ia. 14Kalana aiya i dunia madi' ko tampat kajojoonganto anu sampe toka sidu-sidutu', kita molio tampat kajojoongan anu tokaje saidi' mae. 15Kalana aijo', binuka'mo i Yesus na jalan sahingga kita saja'mo ahi' mompuji-puji' Tumpu; aijo' salakumo koloban pontalima kasento hi Ia, anu osombahkonto otaloakon nu biwi bau pompopodaka' sanggo-Nyo. 16Boli okolilimi na mombau anu ma'ima' ka' mompaha tulu-tulungi, kalana aijo'mo na koloban anu momposanang kinyonyoa nu Tumpu.
17Obatuki na palentah nu to pola-polaya' miu, ka' otuluti na aha. Kalana aha saja' mompalahatikan santuu' miu, ka' aha mule' saja' ahi' mompalahatikan mosia na pakalaja'an nu Tumpu anu binaumo nu aha. De komiu montuluti aha, sanang na kinyonyoa nu aha mokalaja; de madi', tantu aha mokalaja susa' na kinyonyoa, ka' aijo' madi' mompo'untung komiu.
18Saja' odo'akon mae na kami. Otutugi mami, kinyonyoa mami totu-totu'u hodi', kalana iwi-iwi na han saja' anu totu'u na obau mami. 19Ku poita da komiu sabole-bole mondo'akon aku da Tumpu Allah sampa' monsule'akon aku minsusule' hi komiu.
Do'a bau pontudui
20Tumpu mompotumuu'mo Tumpunto i Yesus anu sini-sinilakamo. Kalana Ia sinilakamo, sahingga Ia tempo' uuka tinimbalimo Polaya'to anu Talasanggo aiya hi kita to domba-domba-Nyo. Ia sinilaka aijo' mompaka pompohosonmo palajanjian anu sampe toka sidu-sidutu' anu binaumo nu Tumpu hi kita. 21O amalakon da Tumpu anu pinolengkatan mae nu kabilahian aijo' momposukup hi komiu iwi-iwi na han anu ma'ima' anu opalalui miu da moko ala mombau apaa na anu Nu kahanda'i. O amalakon da kalana i Yesus Kristus, Tumpu na mokalaja i uno nu butongto apaa na anu Nu kahanda'i. Tionyo ahi' i Kristus o puji' sampe toka sidu-sidutu'! Amin.
Pontudui sulat
22Ku poita da komiu sabaan na mongintomakon pokinde' haha aijo' iwi-iwi' aiya, kalana sulatku aiya madi' talalo mantan. 23Tionyo ahi' osumbu' miu saba' utusto i Timotius pinobebasmo mae i talungku'. De ia aiyamo i tampatku, ku boaje na ia de aku mambamo molenga komiu.
24Potokakon na salan do'a mami toka hi iwi-iwi' na polaya' miu ka' toka hi mian iwi-iwi' anu palesayamo hi Tumpu. Talima suele na salan do'a lengkat mae hi to utu-utus anu kiijo' mae i Italia.
25O amalakon da Tumpu mombalakati to utu-utus iwi-iwi'. 37
Currently Selected:
IBRANI 13: LAILOE
Highlight
Copy
Compare
Share
Want to have your highlights saved across all your devices? Sign up or sign in
