IBRANI 10
10
1Atulan nu agama Yahudi ola mombee'i gambalan anu opiha-pihau' mongkona han anu ma'ima' anu tokaje mae, misa' gambalan anu sahondo-hondonyo mongkona han aijo'. Atulan aijo' madi' moko ala mompokopiani mian anu toka monsombah Tumpu ka' momboa mae anu osombahkon, mau mule' sataun-toka sataun saja' monsombahkon kolobaan anu susumo aijo'. 2Bisuannyo to mia-mian anu monsombah Tumpu aijo' totu-totu'u binelesi'mo i dosa', aha madi'mo daagi' ko pikilan montutugi dosa', ka' koloban madi'mo daagi' osombahkon. 3Panyo koloban haha aijo' anu osombahkon sataun-toka sataun ola salaku mompo'ingat mian i to dosa-dosa' nu aha, 4kalana memang baso' nu sapi' ka' baso' nu mee' lakinyo madi' moko ala mongalini dosa'.
5 #
Mzm. 40:7-9
Mokonyo aijo' salatan i Kristus ninsoopmo i dunia, Ia notataemo hi Tumpu,
“Belento madi' mongkahanda'i koloban ka' anu osombahkon;
panyo ola mule' ahi' Belento nompotoukamo butong-Ku.
6Belento madi' situju i koloban anu opotunu;
kabai koloban bau pongampuni dosa'.
7Lantas Aku notataemo, ‘Aiyamo na Aku; o Tumpu!
Aku toka da mombau anu okahanda'i nu Belento
susumo anu tinulismo i uno nu Kitab nu Tumpu mongkona butong-Ku.’ ”
8Momonanyo i Kristus notataemo, “Belento madi' mongkahanda'i koloban, ka' anu osombahkon: Belento madi' situju binatang na okolobanakon ka' opotunu salaku anu osombahkon ka' okolobanakon anu bau pongampuni dosa'.” I Kristus notatae sumo aijo', mau mule' iwi-iwi na koloban aijo' sinombahkonmo susumo koonyo nu atulan nu agama Yahudi. 9Lapas aijo' i Kristus notatae, “Aiyamo na Aku, o Tumpu Allah! Aku toka da mombau anu okahanda'i nu Belento.” Jadi Tumpu Allah nohapusmo iwi-iwi' na koloban anu pininmo aijo', ka' binolosannyomo nu koloban i Kristus. 10I Yesus Kristus nombaumo apaa na anu nukahanda'i nu Tumpu Allah ka' butong-Nyo sinombahkonnyomo, salaku koloban. Kalana Ia nonsombahkonmo sumo aijo', ka' Ia nombaumo sumo aijo' ola ninsan sampe toka sidu-sidutu'; kita iwi-iwi' pinobelesi'mo i dosa'.
11 #
Kel. 29:38
Batu-batu imam nu aha Yahudi mombau kalajanyo salaku imam sansina-sinaa, ka' saja' opo'uli-ulit na ia monsombahkon anu susumo aijo'. Panyo koloban haha aijo' madi' hondo moko alini dosa'. 12#Mzm. 110:1 Panyo i Kristus nonsombahkon poso' sa'angu' na koloban bau pongampuni dosa', ka' koloban aijo' montanggungimo sampe toka sidu-sidutu'. Noko lapas na nonsombahkon koloban aijo', i Kristus sinumuhangmo i sasu koanan nu Tumpu ka' nompalentahmo hingga-hinggat tiba Ia. 13Ka' tempo' uuka i Kristus montanda'imo sampe Tumpu mombaumo to sampo-sampo bali'-Nyo matundu'mo hi Ia. 14Jadi anu ola sa'angu' na koloban aijo', i Kristus nompokopianimo to mia-mian anu pinobelesi'mo na dosa'nyo.
15Mongkona han aijo' Roh nu Tumpu suele nonsisikakonmo hi kita. Roh nu Tumpu notatae,
16 #
Yer. 31:33
“ ‘Aiyamo na palajanjian anu kubaumo hi aha
i sina-sinaa anu tokaje mae,’ koonyo nu Tumpu,
‘Ku po'una'je na to atu-atulan-Ku i uno nu kinyonyoa nu aha,
ka' Ku tulis i uno nu pikilan nu aha.’ ”
17 #
Yer. 31:34
Tumpu mule' notatae, “Ku kolilimimo na to dosa-dosa' ka' anu binaumo nu aha na kalakuan, anu toto ide-idek.” 18Jadi to dosa-dosa' ka' anu binaumo nu aha na kalakuan anu toto ide-idek ingampunanmo, sahingga madi'mo palalu osombahkon na koloban bau pongampuni dosa'.
Imbo' da kita mongohani Tumpu
19Yo, to utu-utus, kalana i Yesus sinilakamo sumo aijo', kita uuka aiya baanimo na minsoop i Salipi' anu Susi' hondo. 20Binuka'mo i Yesus na jalan sa'angu' anu bu'ou hi kita, aijo'mo jalan anu mombee'i kantumuu'an. Jalan aijo' montului lalanse', aijo'mo posi butongnyomo i Yesus. 21Ka' kita uuka aiya daagi'mo ko samian na Imam Daka', anu mompangakuimo pakalaja'an i Laigan nu Tumpu. 22#Im. 8:30, Yeh. 36:25 Kalana aijo', imbo' da kita mongohanimo Tumpu ka' kinyonyoanto hodi'mo ka' palesayamo totu-totu'u; ka' kinyonyoanto anu pinosusi'mo ka' madi'mo ko kasala'an o oa'i, ka' butongto pinobelesi'mo nu uee anu molino. 23Kita tionyo ahi' mintoongmo hoso-hoson i anu otaha'imaninto, anu ingakuantomo kalana Tumpu timbali opalesaya, ka' apaa na anu jinanji'-Nyomo tionyo ahi' Nupodaagi'. 24Ka' kita tionyo ahi' mompaha toa-toa samian ka' samian da kita timbali mompaha kake-kakeha'i bau pongkalibosi sangalu ka' mombau hahan anu ma'ima'. 25Kita tionyo ahi' saja' sihuk hingga-hinggat, ka' boli moluluk susumo mian sangga'at. Ka' kita tionyo ahi' saja' mompaha poho-pohoson kinyonyoa, kalana osumbu'to madi'mo daagi' pin na Tumpu tokamo.
26Kalana de lele anu totu'u lengkat mae hi Tumpu pinotokamo hi kita, panyo saja' kita mombau dosa' ototonggolakon, saba' madi'mo daagi' ko koloban anu bau pongalini dosa'to. 27#Yes. 26:11 Me sa'a-sa'angu'nyomo na anu daagi' hi kita, aijo'mo mongahopimo pomputusian nu Tumpu, ka' apu nu tambuha'-Nyo anu mongangoti to mia-mian anu mongewa Ia! 28#Ul. 17:6, 19:15 Mian anu madi' nontuluti atulan anu binee'mo i Musa, o hukum mate madi' ko ampunnyo, de ko sakisimo ohua' kabai totolu' na mian anu mompoto'i tukoonyo ia sinala'mo. 29#Kel. 24:8 Palias na koboatnyo na hukuman anu opokona hi mian anu talalomo monguesani Anak nu Tumpu. Mian aijo' monsangka madi' ko angga'nyo na baso' nu palajanjian nu Tumpu, aijo'mo i Kristus sinilaka da mompobelesi' dosa'nyo. Ia madi' mongangga'i Roh anu momombee'i balakat. 30#Ul. 32:35-36 Osumbu'to ihe na Ia anu notataemo, “Ku balosije! Ku hukumje!” ka' anu notataemo, “Tumpu momputusije mian anu palesayamo hi ia.” 31Palias na ko sansalanyo de manabu' i lima nu Tumpu Anu Tumuu'!
32Potutugakon mosia na ka'ada'annyo na to utu-utus i tempo' anu i hikuhakonmo. Tempo'nyo aitu salatan jingka nu Tumpu nonjingkai komiu, komiu nongoa'imo manjoo' hondo na kasansala'an, panyo komiu sabole-bole ahi palesaya totu-totu'u. 33Toto minsan komiu pinopo'ambang, ka' lewa' kinabisa'an madi' ma'ima' i ahop nu mian da'isan. Toto minsan komiu suele nongoa'imo sansala tiba aha anu lewa' kinabisa'an susumo aijo', 34ka' komiu suele lewa'mo nonginau' kasusa'an nu mian anu tinalungku'mo. Ka' tempo'nyo iwi-iwi' na anu miu ingagoanmo, komiu madi' notambuha', kalana osumbu' miu, daagi' ko apa-apaa anu lebe ma'ima' itina' hi komiu anu montahan sampe toka sidu-sidutu'. 35Mokonyo aijo' opohoson na kinyonyoa, kalana de komiu tataap palesaya, saba' tambonyo nu han aijo' daka' hondo! 36Komiu palalu sabaan, da komiu moko ala mombau anu nukahanda'i nu Tumpu, sahingga mohumpak anu jinanji'-Nyomo. 37#Hab. 2:3-4 Kalana i uno nu Kitab nu Tumpu tinulismo,
“Madi'mo pin;
Ia anu tokaje mae aijo',
malia-lia'mo toka;
Ia madi'mo montanda'i pipin pa'hipianje na Ia toka.
38Ka' mian-Ku anu madi'mo ko sala'nyo palesayamo ka' tumuu'mo;
panyo de daagi' ko anu aijo' hi aha na anu tolo sule',
tantu Aku madi'mo sanang hi ia.”
39Kita aiya misa' mian anu tolo sule' ka' sala' na jalan. Panyo kita mian anu pinalesayamo hi Tumpu ka' anu pinosalamatmo.
Currently Selected:
IBRANI 10: LAILOE
Highlight
Copy
Compare
Share
Want to have your highlights saved across all your devices? Sign up or sign in
