KAJADIAN 49
49
Puusnyomo nu potatae i Yakub
1Lapas aijo' i Yakub nolagamo to ana-anaknyo ka' notatae, “Imbo' sihuk mae i aiya, koko aku. Da ku poto'i hi belemiu apaa na anu o'oa'ije nu belemiu, sinaa aiya mae i mihi:
2Sihu'mo mae, na to ana-anak i Yakub,
potombihing mae na i Israel, tuuma nu belemiu.
3I Ruben, anakku tumpe,
beleyumo na kahosonanku,
bua' momona nu kabaanianku.
Beleyum baani hondo ka' mahoson hondo
molingkudui anakku iwi-iwi'.
4Beleyum dengke na mokokembong susumo uee,
sahingga misa'mo anu tongkoimoona;
kalana beleyum nongkamale'imo ambahue'ku,
beleyum nombusikimo kamale'an nu tuuma nu beleyum.
5I Simeon ka' i Lewi moto utus;
toongon anu bau pimuhuk tinimbalimo binau kabaanian nu aha.
6Aku madi' nanintuang i posa'angu'an nu aha binatanga',
ka' suele madi' ninsoop i posa'angu'an nu aha.
Kalana aha motambuha'mo sahingga aha nompateimo,
nompengko'imo sapi' kalana molio kasanangan.
7Mohumpak kutuk na tambuha' nu aha,
kalana talalomo hondo.
Mohumpak kutuk na pusa nu aha,
anu tala-talalomo ahi' nombau han anu ma'idek.
Ku ga'a-ga'atakonmo na aha
hi songko-songko na Israel.
Ku bagi-bagimo na aha
hi songko-songko na bansa.
8I Yehuda, beleyum mompateije to mia-mian anu monsampobali' beleyum,
to Utu-utus nu beleyum mompuji'mo beleyum ka' monsombah i ahop nu beleyum.
9 #
Bil. 24:9, Why. 5:5 I Yehuda sumo singa anu daagi' bata'nyo;
ia mompatei gampanyo binatang da nu kaan,
lantas po'ule' minsusule' jojoong i liangnyo;
ia uminyohatmo lantas lumukutmo,
ka' madi' ko samian pe'e na baani mohenggo ia.
10I Yehuda na montoongi tokon nu tomundo da mompalentah,
lee'nyo na mompalentah sampe toka sidu-sidutu'.
To bansa-bansa momboa hasin,
ka' monsombah i ahopnyo kalana ia okabuhuk.
11Anak nu keledainyo pinosegotnyomo i kau',
i kau' anggur anu ma'ima' hondo.
Ia mombaso'i hudenyo nu anggur,
anggur momea' susumo baso'.
12Matanyo nomea'mo kalana monginumo anggur,
bese'nyo nopute'mo kalana monginumo susu.
13I Zebulon jojoong koko ambai;
to kapa-kapan manilabumo i biwi nu bone';
toka-toka i Sidon na potempasan nu da'erahnyo.
14I Isakhar aijo' sumomo keledai anu mahoson
luku-lukut i olot nu kalanjang anu lewa' oposake' hi ia.
15Nu toa ma'ima' hondo na tampat aijo'
ka' nu toa ma'ima' hondo na lipu' aijo',
sahingga natidukumo na ia ka' sanang na oposake'i boaon,
ka' opakisa na mokalaja susumo posaihon.
16Beleyum Dan, na momputusi bansa nu beleyum
beleyum timbalimo tulunan nu bansa susumo bansa sangga'at hi aha i Israel.
17Beleyum sumomo ulo i sambiha' nu jalan,
ulo anu ko bisa'nyo i biwi nu jalan ise',
anu montubuk pantigan nu ajahan
sahingga anu monsake'i mabuhukmo.
18O Tumpu, kasalamatan anu obee' nu Belento
aijo'mo na anu kupo-kupopea'.
19I Gad, beleyum nutumbuhi nu tololang,
panyo po'ule' suele nutololangi nu beleyum na aha.
20I Asyer, anu okaan miu molabi-labih ka' to ima-ima',
beleyum na montoukai anu nukaan nu to tomu-tomundo.
21I Naftali, sumomo jonga anu lapa-lapas,
to ima-ima' na to ana-anaknyo.
22I Yusuf sumomo keledai anu daagi' bata'nyo,
keledai anu ma'ela' koko mata nu uee
lewa' mopadeka' isohipi' nu bungkutnyo.
23Nupoko idek hondo nu sampobali'nyo na montumbuhi ia,
tiba pana' ka' hihisnyo na pontumputnyo.
24Panyo i Yusuf tatap mahoson na limanyo,
tataap mahoson na pana'nyo,
kalana Daka' hondo na kuasa nu Anu monjagai ia,
Tumpu Allah i Yakub, na anu monjagai Israel.
25Tumpu Allah nu tuuma nu beleyum na montulungi beleyum;
Anu Daka' hondo na kuasanyo na mombalakati beleyum,
aijo'mo ujan lengkat mae i langit ka' uee lengkat mae i uno nu tano'.
Tiba anak ka' sapi',
gandum ka' buhaknyo.
26Balakat nu Tumpu Allah, nu tuuma nu beleyum molingkudui
kakaya'an nu to bungku-bungkutnyo anu pininmo hondo.
O amalakon da balakat aijo' toka mae iwi-iwi'
aita' i ubak i Yusuf,
aita' i siakannyo.
Iamo na anu talasanggo
molingkudui to utu-utusnyo.
27I Benyamin aijo'mo serigala anu mahangas hondo.
Daagi' subu ia monsa'umo sangko binatangnyo bau kaanonnyo.
De pihimo ia mombagi-bagiakonmo.”
28Aijo'mo na aha anu sampulu' ka' ohua' na tulunan nu bansa Israel, ka' potatae anu tinaloakonmo nu tuuma nu aha salatan nonsalando'amo hi aha toto samian kalana moga'a-ga'atmo.
I Yakub sinilakamo ka' i lamunmo
29-30 #
Kej. 23:3-20
Lapas aijo' i Yakub nompotuunmo hi to ana-anaknyo, “Gagana' uuka aku silakamo susumo mompolee'ku. Lamun na aku i sohipi' nu aha i liang anu kiijo' i Makhpela, sasu kabete'an Mamre i tano' nu Kana'an. I Abraham nongolimo liang ka' ale' koko Efron mian nu Het da bau polamunan. 31#Kej. 25:9-10, 35:29 Ikiijo anu pinolamunan i Abraham ka' i Sara, i Ishak ka' i Ribka; ka' ikiijo' suele na pinolamunanku i Lea. 32Ale' ka' liang anu daagi' ikiijo' ingolimo hi mian nu Het. Lamun na aku ikiijo'.” 33#Kis. 7:15 Noko potuun na i Yakub hi to ana-anaknyo, i nale'mo na ia lantas sinilakamo.
Currently Selected:
KAJADIAN 49: LAILOE
Highlight
Copy
Compare
Share
Want to have your highlights saved across all your devices? Sign up or sign in
