KAJADIAN 43
43
To utu-utus i Yusuf nambamo i Mesir tiba i Benyamin
1-2Kasusa'an i anu okaan i Kana'an kino susa-susa'nyomo, ka' salatan aha sa'anakan i Yakub nongingkotimo iwi-iwi' na gandum anu binoa lengkat mae i Mesir, notataemo na i Yakub hi to ana-anaknyo, “Lako'mo mule' mamba mongoli gandum anu okaanto.”
3Lantas i Yehuda notataemo hi ia, “Gubernur nu Mesir nompokinde'imo mae totu-totu'u ia notatae, kami madi' timbali mangadap hi ia de kami madi' momboa utus ise' mami aitu. 4De kita tuuma mompobee' utus ise' mami mombatuki, kami mongka'oho' mamba mongoli anu okaan. 5Panyo de madi' opobee' nu belento tuuma na i Benyamin mombatuki, kami madi'mo mongka'oho' mamba, kalana i gubernur kiijo' notataemo, ia notatae, kami madi' timbali mangadap de utus ise' mami madi' mombatuki.”
6I Yakub notatae, “Kadaka' komiu nomposusa'mo aku nompoto'imo hi mian itina', komiu daagi' ko utus ise'?”
7Aha nontaami, “Mian kiijo' saja'mo nontetengi mongkona kami ka' mongkona kita sa'anakan, ia notatae, 'Daagi' tumuu' na tuuma miu? Pa' komiu daagi' ko utus ise' mo'ane sangga'at?' Jadi tinaamanmo mami ahi' apaa iwi-iwi' na anu pinokilawanyomo. Te pinoko ala sinumbu' mami na ia mompalentah kami moki boa mae utus ise' mami aitu?”
8Lantas i Yehuda notataemo hi tuumanyo, “Pobee' mae na anak aitu mombatuki, ka' akuje na mangaku montoa ia. Kami sampamo mamba lia-lia' da madi' ko samian pe'e na anu aiya hi kita na silaka nu ohop. 9Akumo na bau tolosnyo ka' kita tuuma timbali montuntut ia hi belengku. De ia madi'mo po'ule' ku sule'akon mae ma'i-ma'ima', akumo na montanggung hukumannyo sidu-sidutu' i kantumuu'anku. 10De kita madi' lewa' talalo pinin na nontanda'i, tantu kami uuka aiya pinduanmo na lewa' namba.”
11Lantas tuuma nu aha notataemo, “De memang tionyo ahi' sumo aijo'mo, yo boa na hasin anu talalo hondo ma'ima' i lipu' aiya o isi i uno nu kalung miu haha aijo' salaku palasen hi gubernur itina': Kismis, juu', lampa-lampa, bua' nu baya'u ka' bua' nu badam. 12Oboa suele na doi lipat pinduan, kalana doi anu i humpak i uno nu kalung nu belemiu aijo' tionyo po'ule' osule'akon nu belemiu. Ugaat aijo' sinangkalingamo. 13Boamo na utus ise' nu belemiu aitu ka' malia-lia' po'ule' sule'akon mae. 14O amalakon da Tumpu Allah Anu Daka'hondo na kuasanyo mompotimbali gubernur itina' molibos hi belemiu sahingga ia mongka'oho' monsule'akon mae i Benyamin ka' i Simeon hi belemiu. Mongkona aku aiya, de aku memang madi'mo ahi' ko to ana-anakku yo bemanau'.”
15Lapas aijo' to utu-utus i Yusuf nomboamo palasen haha aijo' ka' doi i lipat pinduan, lantas nambamo i Mesir tiba i Benyamin. Salatan tinokamo ikiijo' aha nangadapmo hi Yusuf. 16Salatan i Yusuf nontoamo i Benyamin ka' to utu-utusnyo tu'a, notataemo na ia hi posaihonnyo anu mongkapalai ulusan nu laigannyo, “Boa na mian haha aitu i laiganku. Aha mongkaanmo hingga-hinggat tiba aku sinaa aiya, kalana aijo' kolotmo na binatang potu'on sa'angu' ka' toukaimo itina'.” 17Posaihon aijo' nontulutimo palentahnyo aijo' ka' nomboamo to utu-utus i Yusuf i uno nu laigan nu gubernur.
18Salatan aha binoamo i uno nu laigan i Yusuf, nabuhukmo na aha ka' nompotutugakonmo, “Kita binoa mae aiya, kalana doi anu i humpakto i uno nu kalung tempo'nyo kita tinoka mae u'utu. Aha nohakopmo kita madi' sinumbu-sumbu'to, lantas mongala keledainto ka' mompotimbalimo kita posaihon nu aha.” 19Kalana aijo', koko sabatan nu laigan i Yusuf, aha notataemo hi kapala nu ulusan nu laigan nu aha. 20“Ampun, Tuan, kami toho'mo tinoka mae nongoli anu okaan. 21-22Tempo'nyo kami ninsusule'mo kiijo' mae kahanda' da male'mo, kami nombukai kalung mami. Madi' sinangka-sangka doi mami iwi-iwi' anu pinombayan gandum kiijo' tudu-tudu i gandum. Madi' sinumbu' mami pa' ihe na nompo'isi doi aijo'. Uuka aiya po'ule'mo osule'akon mae mami hi belento Tuan. Ka' mule' daagi' po'ule' nomboa mae doi bau pongoli anu okaan.”
23Posaihon aijo' notatae, “Boli mabuhuk. Boli bata-bata. Tumpu Allah nu belemiu, aijo'mo Tumpu Allah anu osombah nu tuuma nu belemiu iamo na nomposoop doi atina' i uno nu kalung nu belemiu. Tinalimangkumo na pinombayan nu belemiu gandum aijo'.”
Lantas binoanyomo na i Simeon hi aha, 24lantas binoanyo mo na aha i uno laigan. Binee'annyo na aha uee da bau pombaso'i tengke ka' suele anu pompakan keledai nu aha. 25Lapas aijo' aha nontoukaimo palasen anu obee' hi Yusuf de ia tokamo mae sonsu'un na sinaa, kalana pinoto'imo hi aha, saba' aha mongkaanmo hingga-hinggat tiba ia. 26Salatan i Yusuf tinokamo i laigan binee'mo nu aha nu palasen haha aijo' hi Yusuf ka' dinumaladupumo nonsombahmo ia. 27I Yusuf nompokilawa lele nu aha, lantas notataemo, “Belemiu nonsisikmo hi belengku mongkona tuuma nu belemiu i langkai'mo kiijo'. Mosia na lelenyo? Ma'i-ma'ima' ahi'?”
28Tinaaman nu aha, “Posaihon nu belento Tuan, tuuma mami, ma'ima' na lelenyo.” Lantas aha dinumaladupumo nonsombah hi ia.
29Salatan i Yusuf nontoamo i Benyamin, utusnyo ise', notataemo na ia, “Jadi, aiyamo na utus ise nu belemiu anu tatampalui' aijo', anu lewa'mo sinanggo miu hi belengku? O amalakon da Tumpu Allah mombalakati beleyum, anakku.” 30Kinyonyoa i Yusuf nangada'mo kalana nolibosmo hondo ka' nongkalibosimo utusnyo ise'. Me ise-ise' madi'mo pinoko intimnyo kalana aitu monti-montik ia nambamo ninsoop i uno nu salipi'nyo ka' i humang. 31Lapas aijo' ia ni'ohupmo, lantas po'ule'mo nosabat, ka' ingintimnyomo na kinyonyoanyo, ia nompalentahmo da montoukaimo anu okaan. 32I Yusuf nongkaan i sa'angu' na meja' ola posi ia, ka' to utu-utusnyo i meja' sangga'at. To mia-mian nu Mesir anu ikiijo' nongkaan suele i meja' sangga'at, kalana aha mongoa'i madi' pantas mongkaan hingga-hinggat tiba mian nu Ibrani. 33To utu-utus i Yusuf pinosuhang mongahopi meja' i Yusuf. Binatukakon i umun nu aha toto samian, tinampu'unan lengkat pe'e hi anu tumpe sampe tinoka hi anu tampalui'. Salatan tinoa nu aha na nomposuhang susumo aijo', aha nompaha didinmo ka' binangang. 34Aha binee'anmo nongkaan anu lengkat mole hi meja' i Yusuf, ka' i Benyamin piniliman na nombee'i bagi lebe manjoo' molingkudui to utu-utusnyo tu'a. Lantas aha nongkaanmo ka' nonginumo hingga-hinggat tiba i Yusuf sampe na'osa.
Currently Selected:
KAJADIAN 43: LAILOE
Highlight
Copy
Compare
Share
Want to have your highlights saved across all your devices? Sign up or sign in
