KAJADIAN 35
35
I Yakub tiba aha iwi-iwi' nambamo nokiijo' i Betel
1 #
Kej. 28:11-17
Daagi' kino sansinaan Tumpu Allah nompoto'imo hi Yakub, “Akumo na Tumpu Allah anu nanintoa hi beleyum tempo'nyo beleyum nalaimo nompala'imo mae utus tu'a nu beleyum i Esau. Lako'mo lia-lia' mamba i Betel. Jojoongmo kiijo' mae ka' potinjo na mezbah sa'angu' ponsomban Aku.”
2-3Lantas pinoto'imo i Yakub hi aha sa'anakan ka' hi iwi-iwi' na mian anu galu-galum tiba ia, “Kita mambamo lengkat i aiya ka' mokiijo'mo i Betel. Ikiijo' mae aku mompotinjomo mezbah ponsomban Tumpu Allah anu nontulungimo mae aku tempo'nyo aku kinasusa'anmo ka' anu nonjagaimo mae aku iyaya na kinalambananku. Jadi alin na patong nu to pilo-pilogot anu lengkat mae i salipu'an anu daagi' hi komiu; bau na adat pompobelesi butong ka' pusok na baju' anu belesi'.” 4Lantas binee'mo nu aha hi Yakub iwi-iwi' na patong nu pilogot anu lengkat mae i salipu'an anu daagi' hi aha ka' anti-anting nu aha. Iwi-iwi' na balang haha aijo' i lamunmo i Yakub i patu nu kau' daka' koko kota nu Sikhem.
5Salatan i Yakub ka' aha iwi-iwi' sa'anakan nambamo, Tumpu Allah nompobuhukmo anu jojoong i kota haha aijo' iwi-iwi', sahingga aha nabuhukmo, jadi aha madi'mo nololoi' i Yakub ka' sangalunyo iwi-iwi'. 6Lantas aha tinokamo i tano' Kana'an i kota Betel anu u'utu mae osanggohi Lus. 7Ikiijo' mae i Yakub nompotinjomo mezbah ka' sinanggohannyo na tampat aijo' “El Betel”, kalana Tumpu Allah nanintoamo hi ia ikiijo' mae tempo'nyo ia nalaimo mae nompala'i utusnyo tu'a. 8Ikiijo' mae suele i Debora, boune anu mongkalesang i Ribka, sinilakamo lantas i lamunmo i patu nu kau' daka' aijo' sasu salatan kota aijo'. Mokonyo aijo' kau' aijo' sinanggoahanmo “Kau' Pinohangian.”
Tumpu Allah nombalakatimo i Yakub kiijo' i Betel
9Salatan i Yakub ninsusule'mo mae lengkat i Mesopotamia, Tumpu Allah nanintoa mule' hi ia ka' nombalakatimo ia. 10#Kej. 32:28 Tumpu Allah notataemo hi ia, “Beleyum madi'mo osanggohi i Yakub, panyo osanggohimo i Israel.” Sumo aijo' na Tumpu Allah nonsanggohimo ia i Israel. 11#Kej. 17:4-8 Lantas po'ule' notatae na Tumpu Allah, “Akumo na Tumpu Allah Anu Daka' hondo na kuasanyo. Pinganakmo na beleyum ka' milee' manjoo'. Beleyum molee'akonmo to bansa-bansa ka' timbalimo tuuma nu mompolee' nu to tomu-tomundo'. 12Lipu' anu binee'-Kumo hi Abraham ka' hi Ishak, Ku bee'mo hi beleyum ka' hi lee' nu beleyum.” 13Lapas aijo' pinala'ianmo nu Tumpu Allah na i Yakub. 14#Kej. 28:18-19 I tampat nu Tumpu Allah notatae hi Yakub aijo', pinotinjonyomo sa'angu' na batu salaku bau pontandai. Lantas batu aijo' sinombahkonnyomo hi Tumpu Allah aijo'mo dinudu'annyomo nu anggur ka' lanya' nu zaitun i batu aijo'. 15Tampat aijo' sinanggohannyomo “Betel”.
I Rahel sinilakamo
16Lapas aijo' i Yakub ka' iwi-iwi' na miannyo nompala'imo Betel. Salatan aha madi'mo talalo majo'on na mokiijo' i Efrata, tinokamo na tempo'nyo i Rahel mompohampemo anak. Panyo anaknyo susa' na hampe. 17Salatan talalomo hondo nong'oa'i, notataemo na sando anu mompohampe, “Pohoson na kinyonyoa nu beleyum, Rahel, anak nu beleyum aiya mo'anemo mule'.” 18Panyo i Rahel tinokamo na ukunnyo, ka' salatan ia kahanda'mo nompopupus napasnyo, sinanggohannyomo na anak aijo' i Ben-Oni panyo tuumanyo nonsanggohi ia i Benyamin.
19Salatan i Rahel sinilakamo, ia i lamunmo i sohipi' nu jalan anu mamba i Efrata, anu tempo' uuka aiya osanggohi Betlehem. 20I Yakub nompotinjomo sa'angu' na batu salaku bau pontandai, ikiijo', ka' sampe sinaa aiya pinolamunan i Rahel daagi' ko tandanyo nu batu aijo'. 21Lapas aijo' i Yakub nolausakonmo lajangnyo, lantas nompotinjomo kemahnyo i sa'angu' na tampat moliu-liu laigan tangka-tangkas kiijo' i Eder. 22#Kej. 49:4 Hau-haunyo aha kiijo' i tampat aijo' i Ruben nongkamale'imo i Bilha, ambahue' nu tuumanyo. Han aijo' i hongomo i Yakub, sahingga ia pinusamo hondo.
To ana-anak i Yakub
(1Taw. 2:1-2)
I Yakub kino anak sampulu' ka' ohua' na mo'ane. 23To ana-anak i Lea aijo'mo i Ruben (anak tumpe i Yakub), i Simeon, i Lewi, i Yehuda, i Isakhar ka' i Zebulon. 24To ana-anak i Rahel aijo'mo i Yusuf ka' i Benyamin. 25To ana-anak i Bilha, posaihon i Rahel aijo'mo i Dan tiba i Naftali. 26To ana-anak i Zilpa, posaihon i Lea aijo'mo i Gad ka' i Asyer. To ana-anak haha aijo' i hampe mae i Mesopotamia.
I Ishak sinilakamo
27 #
Kej. 13:18
Lantas tinokamo na i Yakub hi Ishak tuumanyo, i tampat kinajojoongannyo i Mamre koko Hebron. (U'utu mae i Abraham kai'nyo suele sinilakamo kiijo' mae). 28-29Salatan umunnyo i langkai'mo hondo, sina'atumo ka' uwalumpulu'mo na taun, i Ishak sinilakamo lantas i lamunmo nu to ana-anaknyo, aijo'mo i Esau ka' i Yakub.
Currently Selected:
KAJADIAN 35: LAILOE
Highlight
Copy
Compare
Share
Want to have your highlights saved across all your devices? Sign up or sign in
