GALATIA 6
6
Mompaha tulu-tulungi
1To Utu-utus! De daagi' ko samian o humpak mombau dosa', sahanyo komiu anu tumuu' mombatuki Roh nu Tumpu mompotiju' mian aijo' minsusule' i jalan anu totu'u. Panyo komiu mompotiju' aijo' boli kopesa-pesa ka' jaga da boli sampe posi komiu tagoda mule'. 2Tionyo ahi' komiu mompaha tulu-tulungi kasusa'an nu mian, da tiba jalan anu sumo aijo' komiu montulutimo palentah i Kristus. 3De daagi' ko samian monsangka butongnyo talasanggo padahan madi', mian aijo' mombaleko'imo posi butongnyo. 4Batu-batu mian mosi palesa ahi' butongnyo pa' kalakuannyo ma'ima' kabai madi'. De ma'ima', ia timbali mongoa'i sanang i han aijo'. Panyo madi' timbali ia mompokakanakon tiba apaa na anu nubau nu mian sangga'at. 5Kalana toto samian nu posi tanggung ahi' na ulusannyo.
6Mian anu nontalimamo pangajalan i Kristus, tionyo ahi' mobagi hi gulu'nyo apaa na anu ma'ima' iwi-iwi', anu daagi'mo hi ia.
7Boli tagoda ihan anu madi' ma'ima'. Tumpu madi' timbali opahaikakon! Apaa na anu sinu'anmo, aijo'mo na anu o ala na bua'nyo. 8De mian monsu'an mombatuki sipat nu manusia, ia mohumpakje kapatean i sipatnyo aijo'. Panyo de ia monsu'an mombatuki pompotiju' nu Roh nu Tumpu, ia mohumpakje kantumuu'an kopian ka' sampe toka sidu-sidutu' lengkat mae hi Roh nu Tumpu Allah. 9Kalana aijo', boli kita ma'osa na mombau hahan anu ma'ima', kalana de kita madi' belenti, na mombau hahan aijo', kita mohumpakje hasinnyo. 10Jadi' de daagi' ko tempo' hi kita, tionyo ahi' kita mombau anu ma'ima' hi iwi-iwi' na mian, anu talalo hondo, toka hi to Utu-utusto sangko mian anu pinalesayamo totu-totu'u.
Pokinde' ka' salan do'a
11Palahatikan ima-ima' na han aiya anu tinuliskumo nu hulup anu toto daka-daka'. 12To mia-mian anu mongka'oho' mosi puji' butongnyo i hahan nu dunia, ahamo na mompagala mompakisa komiu da mombatuki atulan nu sunat. Panyo aha mombau sumo aijo' ola da aha madi' osakisa nu mian Yahudi kalana salib i Kristus. 13Mau mule' to mia-mian anu nombatukimo atulan nu sunat, madi' ahi' mompojalan atulan nu agama. Panyo aha mongkahanda'i da komiu o sunatmo, da aha timbali mombuulakon, kalana komiu nontulutimo atulan aijo'. 14Panyo aku totu-totu'u madi' hondo mongka'oho' mombuulakon apa-apaa, sambiha'nyo Tumpunto i Yesus Kristus anu sinilakamo sinalib. Kalana Ia sinilakamo sinalib, sahingga dunia madi'mo daagi' ko alati'nyo apa-apaa hi belengku. Ka' mongkona dunia aiya, aku suele sumo anu sinilakamo. 15Sinunat kabai madi' sinunat, aijo' madi' palalu. Anu palalu aijo'mo timbali manusia bu'ou. 16Kona hi to mia-mian anu tumuu' sipatnyo sumo aitu, ka' sumo aitu mule' kona hi iwi-iwi' mian anu palesayamo hi Tumpu Allah, kutaha'imani Tumpu mombee'ije ka'ima'an ka' balakat-Nyo.
17Ka' mule' bolimo ko samian pe'e na po'ule' monsusa'i aku, kalana i butongku daagi'mo kinotopia-piangkuka na ko bukuti'nyo na aku nombatukimo i Yesus.
18O amalakon da Tumpunto i Yesus Kristus saja' mombalakati to Utu-utus. Amin.
Tabea' mami, I Paulus 17
Currently Selected:
GALATIA 6: LAILOE
Highlight
Copy
Compare
Share
Want to have your highlights saved across all your devices? Sign up or sign in
