NOSABATMO 9
9
Potuu'on binatang natemo
1Tumpu notatae hi Musa, “Lako'mo mamba mangadap hi tomundo, ka' poto'i hi ia taalu' Tumpu, Tumpu Allah nu aha mian Ibrani, nompoto'imo: 'Pobee'mo mae na mian anu pinalesayamo hi beleng-Ku da mambamo na aha monsombah Aku. 2De belento madi' mongka'oho' mompobee' aha, 3Ku potokamo mae na panyakit anu daka' hondo mongkona iwi-iwi' na binatang potuu'on nu belemiu, ajahan, keledai, unta, sapi', domba ka' mee' nu belemiu. 4Aku madi' mompokakanakon potuu'on nu mian Israel ka' potuu'on nu mian Mesir hingga-hinggat nukona nu panyakit. Potuu'on nu mian Israel sa'angu' pe'e madi' ko anu mate. 5Aku, Tumpu, nontantukanmo dodop sinaa mombaumo han aijo'.' ”
6Dodododopnyo sina-sinaa Tumpu nombaumo susumo anu tinaloakon-Nyomo. Iwi-iwi' na potuu'on nu bansa Mesir natemo, panyo potuu'on nu bansa Israel sa'angu' pe'e madi' ko anu i nate. 7Pinokilawa i tomundo pa' apaa na anu jinadimo, lantas sinisikmo hi ia, potuu'on nu mian Israel sa'angu' pe'e madi' ko anu i nate. Panyo i tomundo tataap panggaga ka' madi' mongka'oho' mompobee' bansa aijo' mamba.
Panyakit bisun
8Tumpu notatae hi Musa ka' hi Harun, “Ala na abu' to pia-piangkakup i tampat anu pinapuanmo. Ka' i Musa tionyo monsagakon abu' aijo' hi ahop i tomundo mokiita' i mombun. 9Sahingga abu' aijo' lumapmo monsongkohi tano' nu Mesir. Anu kona hi Manusia ka' hi binatang na abu' haha aijo' timbalimo bisun ka' mobohak timbalimo bela ka' minana'mo.” 10#Why. 16:2 Lantas ingalamo i Musa ka' i Harun na abu' ka' nangadap hi tomundo. I Musa nonsagakonmo abu' aijo' nokiita' i mombun. Anu kinona hi manusia ka' hi binatang tinimbalimo bisun ka' nobohakmo tinimbali bela ka' ninana'mo.
11Anu pa ilimu' madi'mo noko ala nangadap hi Musa, kalana songko-songko na butong nu aha kahomo bisun sumomo mian nu Mesir haha aijo' sangga'at. 12Panyo Tumpu nompotimbalimo i tomundo pinanggaga ka' susumo anu tinaloakonmo nu Tumpu, i tomundo madi' mongka'oho' mompajuli potatae i Musa ka' i Harun.
Ujan eis
13Tumpu notatae hi Musa, “Lako' dodop subu-subu hondo mangadap hi tomundo, ka' potoka hi ia taalu', Tumpu, Tumpu Allah nu aha mian Ibrani nompoto'imo mae, 'Pobee'mo na mian anu pinalesayamo hi beleng-Ku da aha mambamo mae monsombah hi beleng-Ku. 14Uuka aiya Aku mompotokamo balaa' misa' ola hi aha mian anu ko pangkatnyo ka' hi layat, panyo suele hi belento, da nusumbu' nu belento taalu' madi' ko anu moko ala mompokakanai Aku i songko-songko na dunia. 15De Aku mohukum belento ka' layat nu belento, nu panyakit, tantu belemiu nohopu'mo iwi-iwi'. 16#Rm. 9:17 Panyo belemiu Ku pobee' tumuu' da timbali Ku potoa na kakuasa'an-Ku hi belemiu, sahingga sanggong-Ku talasanggo i songko-songko na dunia.
17Mau mule' sumo aijo', belento daagi' ahi' kobubuun ka' madi' mongka'oho' mompobee' mian anu pinalesayamo hi beleng-Ku mamba. 18Dodop subu-subu, susumo anu toho'mo jinadi, Aku mompotokamo mae ujan eis anu mabohos hondo, anu ma'isa toho' jinadi i Mesir naipuan pe'e mae sampe uuka aiya. 19Jadi palentahkon da iwi-iwi' na potuu'on ka' iwi-iwi' na anu nu belemiu, anu i sambiha'nyo oboa i tampat anu koongon. Iwi-iwi' na mian ka' potuu'on anu i sambiha'nyo ka' madi' okoongi tionyo mate nukona nu ujan eis.' ” 20To pia-piangkuka na aha mian anu ko pangkatnyo nabuhukmo i potatae nu Tumpu. Aha nomboamo to posa-posaihon ka' potuu'on nu aha pinosoop i uno nu laigan da koongon. 21Panyo sangga'at madi' nompajuli apaa na anu pinoto'imo aijo' ka' nompojohokmo to posa-posaihon ka' potuu'on nu aha i padang.
22Lantas Tumpu notataemo hi Musa, “Tangkakon na lima nu beleyum mokiita' da ujan eis tudun i songko-songko na tano' nu Mesir. Ujan aijo' mongkonamo manusia, potuu'on ka' iwi-iwi' na sosu'anon i ale'.” 23I Musa nontangkakonmo tokonnyo nokiita' sahingga Tumpu nompotokamo mae gohung ka' nontudunakonmo ujan eis, ka' kilat nontuda'mo dunia. Tumpu nompotokamo 24#Why. 8:7, 16:21 ujan eis mabohos hondo galo-galo' kilat mototamian. Aijo'mo na ujan eis anu talalo hondo mabohos i sisikon nu aha Mesir. 25I songko-songko na lipu' ujan eis aijo' nongideimo iwi-iwi' apaa na anu i ale', tibamo manusia ka' potuu'on. Iwi-iwi' na sosu'anon i ale' na'idekmo ka' to kau-kau' singkapmo notua'. 26Ola da'erah nu Gosyen kajojoongan nu aha mian nu Israel na madi' kinona nu ujan eis.
27Lantas i tomundo nolagamo i Musa ka' i Harun ka' notatae, “Aku binaladosa'mo. Tumpumo na anu totu'u, aku ka' layatku nombaumo sale'. 28Balado'amo hi Tumpu; kami sinampemo na nongoa'i sansala kalana gohung ka' ujan eis aiya. Ku pobee'mo na belemiu mamba. Bolimo belemiu jojoong i aiya.”
29Notataemo na i Musa hi Tomundo, “Malia-lia'je ku do'akon de aku tokamo i sambiha'nyo nu kota, ku tangkakonje na limangku mokiita' hi Tumpu. Gohung madi'mo lumontup ka' ujan eis madi'mo tudun, da nusumbu' nu belento Tuanku taalu', dunia aiya anu nu Tumpu. 30Panyo ku sumbu' saba' belento Tuanku ka' aha mian anu ko pangkatnyo ma'isa ahi' mabuhuk hi Tumpu Allah.”
31Anu sinu'an rami ka' jelai ningkotmo naidek, kalana rami hau-haunyomo nimbuhakmo ka' jelai hau-haunyomo ko batunyomo. 32Panyo gandum ka' bua' anu ko batunyo madi' na'idek kalana misa' pe'e lonunyo.
33Lantas i Musa nompala'imo i tomundo ka' nambamo nosabat i kota; ikiijo' mae ia nontangkakonmo limanyo ka' binalado'amo hi Tumpu, sahingga tempo'nyo aitu madi'mo kino gohung, ujan eis ka' ujan. 34Salatan i tomundo nontoamo apaa na anu jinadimo ia po'ule' mule' binaladosa'. Ia ka' aha mian anu ko pangkatnyo tataap ahi' panggaga. 35Susumo anu pinoto'imo i Musa apaa na anu tinaloakonmo nu Tumpu, i tomundo madi' mongka'oho' mompobee' mian nu Israel mamba.
Currently Selected:
NOSABATMO 9: LAILOE
Highlight
Copy
Compare
Share
Want to have your highlights saved across all your devices? Sign up or sign in
