NOSABATMO 17
17
Uee nosabat mae i batu daka'
(Bil. 20:1-13)
1 #
Bil. 20:2-13
Lapas aijo' iwi-iwi' na aha mian nu Israel nompala'imo padang bola Sin ka' nolali-lalinmo lengkat i sa'angu' na tampat mamba i tampat sangga'at susumo anu pinalentahkonmo nu Tumpu. Daagi' kino sinaa sa'angu' aha nombaumo kemah i Rafidim, panyo ikiijo' madi' kino ueenyo anu o inum. 2Lantas aha nososonmo hi Musa ka' notatae, “Bee'i mae na kami uee anu o inum.” Tinaaman i Musa, “Kadaka' komiu nososonmo ka' monsobaimo Tumpu?”
3Panyo mian haha aijo' talalomo hondo negot sahingga aha saja'mo nososon hi Musa. Koonyo nu aha, “Kadaka' binoamo mae nu beleyum na kami nosabat lengkat mae i Mesir? Sahingga kami, to ana-anak mami ka' potuu'on mami i natemo nu megot?”
4Lantas i Musa notataemo hi Tumpu, ia notatae, “Apaa na anu tionyo ku bau hi mian haha aiya? Pitoa, aha mongka'oho'mo mompobunu'i mae nu batu.”
5Notataemo na Tumpu hi Musa, “Laga mae to pia-piangkuka na polaya' ka' lumajangmo hingga-hinggat tiba aha aijo', belemiu na mamba momona. Boa suele na tokon anu pinake nu beleyum ponsapahi Kaunyo nu Nil. 6Aku tuminjoje i ahop nu beleyum aita' i batu anu daka' i Bungkutnyo nu Sinai. Sapahi na batu aijo' da uee mosabat sahingga to mia-mian timbalimo monginum.” I Musa nombaumo sumo aijo' sinakisian nu to pola-polaya' nu aha mian Israel.
7Tampat aijo' sinanggohanmo Masa kalana i tampat aijo' aha mian nu Israel nonsobaimo Tumpu tempo'nyo aha nompokilawa, “Pa' Tumpu monsangalui mae kita kabai madi'?” Tampat aijo' sinanggohanmo suele Meriba kalana i tampat aijo' aha mian nu Israel nososonmo.
Nahampatemo tiba aha mian nu Amelek
8Lapas aijo' mian nu Amelek tinokamo nolambanimo mae da mahampatemo tiba aha mian nu Israel i Rafidim. 9Notataemo na i Musa hi Yosua, “Pile'i to pia-piangkuka na mian anu timbali mahampate tiba mian nu Amelek. Dodop aku tuminjoje aita' i puge'nyo montoongi tokon anu pinokau nu Tumpu Allah oboa.” 10I Yosua nombaumo apaa na anu pinokaumo i Musa hi ia. Ia nambamo nahampate tiba aha mian nu Amelek, panyo i Musa, i Harun ka' i Hur, nindakomo nokiita' sampe tinokamo aita' mae i puge'nyo. 11De i Musa daagi' montangkakon limanyo, mian nu Israel untung na mahampate. Panyo de i Musa montauhakonmo limanyo, mian nu Amelek untungmo na mahampate. 12Salatan i Musa kinainmo, i Harun ka' i Hur, nongalamo sa'angu' na batu da kasuhangan i Musa. I Harun ka' i Hur, tinuminjomo sasu kewe' ka' koanan i Musa da monsakan limanyo da saja' tangka-tangka' sampe sinaa makakinsapmo. 13Ahennyo aha mian nu Amelek pinatundu'mo i Yosua.
14 #
Ul. 25:17-19, 1Sam. 15:2-9 Notataemo na Tumpu hi Musa, “Tulis na ka'untungan aiya nahampate, da saja' o inau'. Poto'i hi Yosua taalu' Aku nompateimo mian nu Amelek.” 15Lantas i Musa nompotinjomo sa'angu na mezbah ka' sinanggohannyomo “Tumpu aijo'mo na nompo untung aku Nahampate.” 16Notataemo na i Musa, “Toongi hoso-hoson na Tumpu anu nompo untung kita i pahampatean! Tumpu nahampatemo nongewa mian nu Amelek sampe toka sidu-sidutu'!”
Currently Selected:
NOSABATMO 17: LAILOE
Highlight
Copy
Compare
Share
Want to have your highlights saved across all your devices? Sign up or sign in
