NOSABATMO 15
15
Nyanyian i Musa
1 #
Why. 15:3
Lantas i Musa ka' to mia-mian Israel nonyanyimo, nyanyian aiya bau pompuji' Tumpu,
“Aku kahanda'mo manyanyi mompuji' Tumpu
kalana Ia nohungku'imo ka' binilahimo.
Iwi-iwi' na ajahan ka' anu monsake'i
ingalin-Nyomo i uno nu ambai.
2 #
Mzm. 118:14, Yes. 12:2 Tumpu anu mahoson nontinjohimo mae aku;
Iamo na anu nomposalamatmo mae aku.
Iamo na Tumpungku, aku kahanda'mo mompuji' Ia,
Tumpu Allah anu nusombah nu mompolee'ku,
ku popodaka' na Ia.
3Tumpu aijo'mo na anu madi' opoko ala o hungku'i ka' anu baani,
Tumpu, aijo'mo na sanggo-Nyo.
4Suludadu nu aha Mesir ka' iwi-iwi' na kaletanyo
ingalin-Nyomo i uno nu ambai.
To kapa-kapala nu suludadu anu baani hondo
nolomosmo i Ambai Gelagah.
5Aha i lonyomo nu ambai anu maleeng,
ka' sumomo batu nanabu' nokaiyong i lananyo.
6O Tumpu, kahosonan nu Belento talalo hondo okabangangi,
binaumo nu Belento na anu monsampobali' nosungke-sungkehetmo.
7Tiba katalasanggoan nu Belento anu daka' hondo
Belento nohopu'imo iwi-iwi' na anu nongewamo Belento
Pusa nu Belento talalomo hondo kino juhu-juhut susumo apu
ka' nompapuimo aha susumo hat.
8Ambai pinuuhanmo nu Belento, uee ningkalulunmo tinimbalimo natangkas,
tinuminjomo hodi-hodi' susumo pagan mesen,
sahingga lana nu ambai timbalimo otului.
9Notatae na sampobali', ‘Aha ku loloi'mo ka' ku hakopmo,
kineatku na bajakku ka' pinateankumo na aha.
Lantas iwi-iwi' na halata' nu aha ingagoankumo
binagi-bagingkumo ka pinakengkumo sampe na osa.’
10Panyo ola minsan na Tumpu tolo husa
mompotokamo sinaa anu mompolugi'.
Aha tinatanomo susumo timah anu maboat
i uno nu bokon anu daka' hondo.
11Iya na Tumpu Allah sangga'at anu moko ala mohungku'i Belento,
o Tumpu Anu Talasanggo hondo ka' anu susi'?
Ihe na moko ala mombau anu okabangangi
ka' mombau palabuatan anu daka' susumo Tumpu?
12Belento nontangkakonmo lima nu Belento koanan
sahingga nohopu'mo na sampobali' i lonyomo nu tano'.
13I laya'mo nu belento na bansa anu pinosalamatmo nu Belento aiya,
kalana Belento totu-totu'u montoongi janji' nu Belento.
Tiba kahosonan anu daka' hondo, aha jinagaanmo nu Belento
ka' i laya'mo nu Belento, i tano' nu Belento anu susi'.
14-15To bansa-bansa nohongomo ka' i lakatnyomo;
mian nu Filistin ka' to pola-polaya' nu Edom ginago'mo.
Mian nu Moab anu toto babaani i lakatnyomo,
mian nu Kana'an kinulangmo na kinyonyoanyo.
16Aha talalomo hondo nabuhuk
nonsakisi'i kabaanian nu Tumpu.
Tempo'nyo mian anupinalesayamo hi Belento notulumo, sampobali' madi' noko ala nongampang;
i lau-lausmo na bansa anu pinobebasmo nu Belento.
17Lantas Israel binoamo nu Belento
namba i tampat anu pinile'anmo nu Belento da bau kajojoongan nu belento.
Aha jinojoongmo i bungkutnyo nu Belento anu susi',
i laigan anu pinosi potinjo nu Belento.
18Belentomo na Tumpu, Tomundo,
anu mompalentah sampe toka sidu-sidutu'.”
Nyanyian i Miryam
19Salatan aha mian nu Israel notaapmo i ambai, aha i lumajangmo i lananyo anu notismo. Panyo salatan to kale-kaleta nu aha Mesir tiba ajahan ka' anu sinumake' nokiijo'mo i ambai, Tumpu po'ule'mo nompotimbali ueenyo no ili sahingga aha nolomosmo.
20Lantas i Miryam samian na nabi boune, utus tu'a i Harun, nongalamo gandangnyo ka' iwi-iwi' na boune suele nohapa'imo gandangnyo nu aha ka' nonsaleleimo. 21I Miryam nonyanyi imo aha,
“Panyanyimo bau pompuji' Tumpu
kalana Ia nohungku'imo ka' binilahimo.
Iwi-iwi' na ajahan ka' anu monsake'i
ingalinnyomo nokaiyong i ambai.”
Uee mapakat
22Lapas aijo' i Musa nomboamo bansa Israel lengkat mae i Ambai Gelagah nambamo i padang bola Syur. Tolun sinaamo na kinopinnyo na aha notulu padang bola madi' hondo nohumpak uee. 23Lantas aha tinokamo i tampat anu osanggohi Mara, panyo uee ikiijo' mapakat hondo, sahingga madi' timbali o inum. Kalana aijo' tampat aijo' sinanggohanmo Mara, alati'nyo mapakat. 24Sahingga mian haha aijo' nososonmo hi Musa ka' nompokilawa, “Apaa na o inumto?” 25I Musa binala do'amo totu-totu'u hi Tumpu, lantas pinotiju'mo nu Tumpu sangkolong na kau' hi ia. Kau' aijo' i lumbu'akonmo i Musa nokiijo' i uee, lantas uee aijo' natawasmo, sahingga timbalimo o inum.
I tampat aijo' Tumpu nombee'imo atulan-atulan hi aha ka' ikiijo'mo suele na Ia nonsobai aha. 26Tumpu nompoto'imo, “Tuluti na Aku totu-totu'u, ka' obau apaa na anu koong-Ku ma'ima', obau na aijo', tuluti iwi-iwi' na palentah-ngKu. De aijo' obau nu belemiu, belemiu madi' Ku hukum nu to panya-panyakit anu Ku pokona hi mian nu Mesir. Akumo na Tumpu anu nompo'alinmo belemiu.”
27Lapas aijo' aha tinokamo i tampat sanggonyo Elim. Ikiijo' daagi' ko mata nu uee sampulu' ka' ohua', ka' kau' korma pitumpulu' na pu'unnyo. Aha nombaumo kemah koko uee aijo'.
Currently Selected:
NOSABATMO 15: LAILOE
Highlight
Copy
Compare
Share
Want to have your highlights saved across all your devices? Sign up or sign in
