NOSABATMO 11
11
I Musa nongkila-kilamo anak tumpe silakamo
1Tumpu notataemo hi Musa, “Aku mompotokamo mae sa'angu' na balaa' mule' hi tomundo Mesir ka' hi layatnyo. Lapas aijo' nu pobee'je na belemiu mamba. Pakalaus belemiu iwi-iwi' nu laa'mo mompala'i tampat aiya. 2Kalana aijo' basale'mo tiba bansa Israel; pokau na aha momoita mainan mosoni' ka' salaka hi anu mompaha ohani laigan nu aha.” 3Nupotimbalije nu Tumpu na mian nu Mesir da mongkanonongi aha mian nu Israel. Ka' i Musa timbalimo mian anu talalo hondo o'angga'i nu aha anu ko pangkatnyo ka' songko-songko na layat nu Mesir.
4I Musa notataemo hi tomundo, “Sumo uuka na Tumpu notatae, 'Kila-kila tonga' pahu Aku mololomo tano' nu Mesir. 5Batu-batu anak tumpe mo'ane i Mesir tionyo mate, lengkat pe'e hi anak nu tomundo Mesir toka-toka hi anak nu posaihon boune anu monggiling gandum. Anak nu to potu-potuu'on anu momona inganakakon, iwi-iwi' tionyo mate suele. 6I songko-songko na Mesir o hongomo na tando' anu tahahumo, susumo anu ma'isa toho' jinadi ka' madi'mo po'ule' jadi. 7Panyo hi aha mian nu Israel, mau manusia mau pe'e potuu'on madi' opoposia. Sahingga osumbu'je miu taalu' Aku, Tumpu, nonggihanakonmo mian nu Mesir ka' mian nu Israel madi' pokakana.' ” 8Ahennyo i Musa notataemo, “Iwi-iwi' na aha anu ko pangkatnyo anu mokalaja hi belento Tuanku tionyo toka ka' tolodadupu i ahopku ka' momoita da aku ka' bansangku mompala'imo lipu' aiya. Lapas aijo' mambamo na aku.” I Musa sinumpumo hondo lantas pinala'iannyomo na i tomundo.
9Tumpu notataemo hi Musa, “I tomundo madi' mompajuli potatae nu beleyum, da Aku mombau lebe manjoo' na anu okabangangi hi songko-songko na Mesir.” 10I Musa ka' i Harun nombaumo iwi-iwi' na anu okabangangi aijo' i ahop nu tomundo, panyo Tumpu nompotimbalimo ia pinanggagamo, sahingga ia madi' mongka'oho' mompobee' aha mian nu Israel mompala'i lipu'nyo.
Currently Selected:
NOSABATMO 11: LAILOE
Highlight
Copy
Compare
Share
Want to have your highlights saved across all your devices? Sign up or sign in
