ESTER 5
5
I Ester nolagamo i tomundo ka' i Haman da mamba mongkakaan hi ia
1I sinaa kino itolunnyomo na ia binapuasa', i Ester po'ule'mo nompusok baju'nyo salaku bengkele' nu tomundo lantas nambamo nokiijo' tinuminjo i popasan nu laigan nu tomundo i ahop nusabatan anu lewa' kasuhangan i tomundo. I Tomundo tempo'nyo aitu aijo' suha-suhang i kasuhangan nu tomundo mongahopi sabatan aijo'. 2Salatan i tomundo' nontoamo i Ester Bengkele'nyo tinjo-tinjo aijo' i sambiha'nyo, ia nolibosmo hi ia ka' nontangkakonmo tokonnyo moso-mosoni' nokiijo' hi Ester. Jadi nokiijo'mo na i Ester, ka' kinanyangnyo na pusnyo nu tokon aijo'. 3Lantas pinokilawamo i tomundo, “Mosia Bengkele'ku? Apaa na anu nu kahanda'i? Poto'i mae. Mau mintonga' na kalaja'anku na nu poita ku bee'mo.”
4Tinaaman i Ester, “De Belento Tomundo sanang da pihi uuka belento Tomundo ka' i Haman toka mae mongkaan anu pinosadiangkumo mompokaan belento Tomundo.”
5I tomundo nompoto'imo hi Haman da sampa toka mae, da aha mamba hi Ester aijo'. Jadi nambamo na aha nongkaan hi Ester aijo'. 6Salatan aha nonginumo anggur, pinokilawamo i tomundo, “Uuka poto'imo mae pa'apaa na nu kahanda'i. Maumo pa'apaa na nu poita ku bee'mo, maumo mintonga' na kalaja'anku!”
Tinaaman i Ester, 7-8“De belento Tomundo sanang mombee' mae anu ku kakaase aiya, yo belento Tomundo ka' i Haman po'ule' toka mae mongkaan anu ku bau dodop malom. Tempo'je mongkaan aijo' na ku poto'i apaa na anu ku kakaase hi Belento.”
I Haman binatanga'mo mompatei i Mordekhai
9Lengkat mae hi Ester Bengkele' i Tomundo nongkaan aijo' sinanangmo na kinyonyoa i Haman ninsusule'. Panyo salatan tinokamo i sabatan daka' i laigan nu tomundo tinoanyomo na i Mordekhai anu madi' tinuminjo nontabea'i ia, ia notambuha'mo hondo. 10Panyo pagalamo sinabaanakonnyo lantas ia ninsusule'mo i laigannyo. Tinoka kiijo' i laigannyo, pinokaunyomo na to sanga-sangalunyo da toka mae ka' ilaganyomo na i Zeres, bengkele'nyo, da ko susuhang tiba aha. 11Lantas i Haman nolabi-labimo na notatae hi aha ka' nontakabunakonmo kakaya'annyo, konjoo'nyo nu to ana-anaknyo to momo'ane, pangkatnyo anu daka', anu binee' i tomundo, ka' mule' pangkatnyo anu matangkas aijo' anu molingkudui anu ko pangkatnyo sangga'at. 12Ia notatae mule', “I Ester bengkele' nu tomundo ola nolaga aku ka' i tomundo namba nongkaan anu ola pinadalakonnyo hi kami, ka' dodop pihi kami po'ule' mule' nulaga. 13Panyo iwi-iwi' aijo' madi' ko kaliangannyo de daagi' ku toa na i Mordekhai, aha mian nu Yahudi aijo', sumuhang i sabatan daka' i laigan nu tomundo.”
14Nohongo potatae aijo' bengkele'nyo ka' iwi-iwi' na to sanga-sangalunyo nombee'imo pikilan sumo uuka, “Pokaumo na mian mombau ohi' tangka-tangkas uampulu' ka' ohua' na meten. Lantas dodop subu-subu pomoitamo kaloasan hi tomundo da opokalayo'mo na i Mordekhai i ohi' aijo'. Tiba jalan anu sumo aijo' sanangmo na kinyonyoa nu beleyum mamba mongkaan.” Pikilan anu binee' nu aha aijo' ma'ima' hondo na tinutugan i Haman, kalana aijo' i sampamo nokibau ohi' bau pompokalayo'an aijo'.
Currently Selected:
ESTER 5: LAILOE
Highlight
Copy
Compare
Share
Want to have your highlights saved across all your devices? Sign up or sign in
