EFESUS 4
4
Posa'angu'an nu butong
1Aijo' na sababnyo aku – mian anu tinalungku'mo, anu tinalungku'mo kalana nombaumo anu pinalentahkon nu Tumpu – momoita sabole-bole hi belemiu: da kantumuu'anum sumo ahi' mian anu i lagamo nu Tumpu mo'imboa tiba apaa na makisutnyo komiu i lagamo. 2#Kol. 3:12-13 Tionyo ahi' komiu saja' mati aluk na kinyonyoa, motatae madi' ko pesa-pesa ka' sabaan. Potoa na kalibosanum montulungi samian ka' samian. 3O'usahakon totu-totu'u da tumuu' saja' dame, da posa'angu'an anu pinodaagi'mo nu Roh nu Tumpu tataap ma'ima'. 4Ola sa'angu' na butong ka' sa'angu' na Roh. Sumo aitumo mule' na komiu i laga da ola sa'angu' na anu otaha'imani ka' mule' pokakana. 5Ola sa'angu' na Tumpu, sa'angu' na kapalesaya'an, sa'angu' na palamandian, 6ka' sa'angu' na Tumpu anu timbali Tuuma nu iwi-iwi' mian. Iamo na Tumpu nu songko-songko na langa, anu nompotimbalimo iwi-iwi' ka' mongkuasai iwi-iwi'.
7Kita toto samian mohumpakmo pa' apaa na nukahanda'i nubee' i Kristus. 8#Mzm. 68:19 I uno nu Kitab nu Tumpu tinulismo,
“Salatan Ia noliba'mo i tampat anu matangkas hondo,
Ia nomboamo manjoo' na anu i hakop-Nyo;
ka' Ia nombee'imo palasen-palasen hi mian.”
9Jadi, de otaloakon “Ia noliba'mo” alati'nyo Ia momonanyo nintau'mo tinoka i tampat anu talalo i aluknyo i dunia aiya. 10Ka' Ia anu ninintau'mo aijo', Ia-iamo aijo' na noliba' tinoka i tampat anu lebe matangkas molingkudui langit iwi-iwi', sahingga songko-songko na dunia ingisian-Nyomo. 11Iamo na anu “mombee'i palasen-palasen hi mian”; sambagian i hangkat-Nyo tinimbali rasul, sangga'at tinimbali nabi; sangga'at mule' tinimbali pompolele Lele Ma'ima' aijo', ka' sangga'at mule' i hangkat-Nyo tinimbali to gulu-gulu' ka' pongatun jama'at. 12Aiya binau-Nyo da mian anu palesayamo hi Tumpu obee'i pangalati'an hondo-hondo da timbali mohongo-hongo apaa na nu pinokauhakon nu Tumpu ka' mombau posa'angu'an salaku butong i Kristus. 13Tiba jalan anu sumo aijo' kita iwi-iwi' mosa'angu'mo i kapalesaya'an anu pokakana ka' pangalati'an anu pokakana mongkona Anak nu Tumpu. Ka' kita timbalimo to mia-mian anu motu'amo na pikilan ka' kopipinnyo ko pintu-pintuangnyomo talakana' sumo i Kristus. 14Sahingga kita madi'mo po'ule' mingana-anak anu sumo nupuuhi nu mombun oboa mokiijo' mo'uuka mae nu ngangahan nu solok nu pangajalan lengkat hi to mia-mian anu pande na mongakali. Aha mompotimbali mian ponga' nu kapandean nu aha mongakali. 15Madi' sumo aijo'! Panyo ola ahi' kita tionyo momponyata' hahan anu totu'u nu kinyonyoa anu mongkalibosi hondo, sahingga i uno nu iwi-iwi' na han kita kopipinnyo timbalimo talakana' pokakana sumo i Kristus anu timbalimo kapalanto. 16#Kol. 2:19 I uno nu kapalentahan-Nyo, iwi-iwi' na bagian nu butong aijo' matopos hondo na nongatun, ka' pinaha pogantum nu to losu-losuan toto sa'angu'. Ka' de toto sa'angu' na bagian aijo' bakalaja sumo anu sahondo-hondonyo, saba' songko-songko na butong aijo', tumuu' modensu' timbali motu'a ka' mahoson kalana kalibosan.
Kantumuu'an anu bu'ou hi Kristus
17Mokonyo aijo' tiba sanggo nu Tumpu, aiyamo na anu ka'oho' kutaloakon ka' kupokeman: bolimo daagi' tumuu' sumo to mia-mian anu madi' monsumbu' Tumpu, ka' mompopikilakon anu madi' mingkaliangan. 18Pikilan nu aha pinintungmo. Aha madi'mo monsumbu' kantumuu'an anu binee' nu Tumpu. Kalana aha madi' ko anu nu pisumbu-sumbu' nu aha mongkona Tumpu. Aha sumo aijo' kalana bangilan. 19Aha madi'mo daagi' ko kinyonyoa ma'ambang, sahingga iwi-iwi' na napisu nubau nu aha, ka' tumuu' mombau anu ma'idek yayamo pongka'oho' nu kinyonyoanyo.
20Panyo i Kristus Yesus anu sinumbu'mo miu misa' sumo aitu! 21Komiu nohongomo mongkona Ia! Ka' salaku anu saja' mombatuki Ia, komiu pinogulu'mo singkona mongkona sipat-sipat nu Tumpu anu daagi' hi Ia! 22#Kol. 3:9 Mokonyo aijo', ukatakonmo na mian anu nanau'mo tiba jalan pikilan nu kantumuu'an anu nanau'mo anu hau-haunyo ingide'anmo han anu oka'ima'i anu mompoponga'. 23Tionyo ahi' kinyonyoa ka' pikilanum opotimbali bu'ou iwi-iwi'. 24#Kej. 1:26, Kol. 3:10 Tionyo ahi' komiu tumuu' salaku mian bu'ou anu pinotimbalimo nombatuki jalan pikilan nu Tumpu; aijo'mo, tabiat anu totu'u, hodi' ka' susi'.
25 #
Za. 8:16
Kalana aijo' to Utu-utus iwi-iwi' bolimo baleko'. Pombaumo gau' anu hodi' hi samian ka' hi samian, kalana kita iwi-iwi' bubuu'mo ninsoop bagian butong i Kristus. 26#Mzm. 4:5 De komiu pusa, boli mompobee' pusaum aijo' monsaduakon komiu baladosa'. Boli sansinaamo na pusa, 27da Ibilis madi' mohumpak kasampatan. 28Mian anu biasa mombuling, bolimo daagi' ia mombuling. Sahanyo ia mokalaja keke-keke, da hasin nu kalajanyo ia mohumpak kaanon ka' timbali montulungi anu kakulangan. 29De komiu basisik, boli montaeyakon potatae anu mahenyu. Anu otaeyakon potatae anu mompokopiani ka' anu montulungi mian sangga'at. Potatae sumo aijo' mompodaagi' ka'ima'an hi to mia-mian anu mohongo. 30Boli momposusa' kinyonyoa nu Roh nu Tumpu. Komiu nohumpakmo tanda sap nu Roh da timbali anu nu Tumpu. Roh aijo' mule' salaku sa'angu' na tanda matantu saba' Sinaa Pompobebasan tokamo mae hi komiu. 31Alinakon na anu o'oa'i moko pasakit na kinyonyoa mongingu ka' pusa. Bolimo daagi' mahaloboo'an ka' solaa' monguduli. Bolimo daagi' ko kinyonyoa mongka'ideki kabai ko kinyonyoa sangga'at anu sumo aijo'. 32#Kol. 3:13 Ola ahi' kinyonyoa na obau mano-manonong ka' mompahakali-kalibosi samian ka' samian, ka' mompaha ampu-ampuni pokakana sumo Tumpu singkona nongampunimo komiu hi Kristus.
Currently Selected:
EFESUS 4: LAILOE
Highlight
Copy
Compare
Share
Want to have your highlights saved across all your devices? Sign up or sign in
