2 TIMOTIUS 3
3
Sinaa anu imihinyo mae
1O inau' na aiya: I sinaa anu imihinyo mae manjoo'mo hondo na kasusa'annyo. 2Mian mosi pentingkanmo butongnyo, me saja' mongkamata doi, kobubuun ka' mongka'ima'i sisik anu madi' kogunanyo. Aha mongka'ima'i mompopo'ise' mian, panggaga hi tuumanyo, madi' monsumbu' montalima kase ka' mongka'ideki hahan rohani. 3Aha madi' mongkalibosi sangko mian, madi' mongka'ima'i mongampuni, aha mongka'ima'i mombusi-busiki sanggo nu mian sangga'at, mongka'ima'i mompakisa, aha masigo ka' madi' mongka'ima'i ka'ima'an. 4Aha lebe mongka'ima'i mongkabisa'i, mohangka-hangkat posi butong, ka' madi' mimpikilan mantan. Aha lebe ma'ima' mongka'ima'i kasanangan nu dunia, panyo aha madi' montuluti Tumpu. 5Mau mule' otoa aha tulu-tulutan mompojalan apaa na koonyo nu agama panyo madi' montalima isinyo nu agama anu sahondo-hondonyo aijo'. Opimpali na to mia-mian anu sumo aijo'. 6Daagi' ko anu kiijo' hi aha anu ninsoopmo i to lai-laigan, lantas nonggodamo to bou-boune anu ma'isa talalo palesaya ka' manjoo' hondo na dosa', ka' kinuasanmo nu ngangahan na anu oka'ima'i. 7To bou-boune haha aijo' sapoi-poitanyo da o ajan, panyo madi' moko ala monsumbu' ajalan anu totu'u, anu lengkat mae hi Tumpu. 8#Kel. 7:11 Susumo i Yanes ka' i Yambres nongewa' i Musa naipuan mae, sumo aitu mule' na mian haha aijo' mombahakon ajalan anu lengkat mae hi Tumpu. Pikilan nu aha na'idekanmo, ka' palesaya nu aha madi'mo nintuus. 9Panyo madi' ko anu nu pihumpa-humpak nu aha, kalana kaponga'an nu aha nu sumbu'mo nu mian iwi-iwi', sumomo anu ingoa'an i Yanes tiba i Yambres suele.
To poki-pokinde'
10Panyo beleyum nontulutimo to aja-ajalanku, kalakuanku, ka' patuju nu kantumuu'anku. Beleyum nosi toamo mosia na aku totu-totu'u palesaya hi Yesus Kristus ka' mongkalibosi sangko mian. Beleyum mule' monsumbu' kasabalan ka' kahosonan nu kinyonyoangku. 11#Kis. 13:14-52, 14:1-7,8-20 Beleyum nontoamo aku kinabisa'anmo ka' aku sinansalamo. Beleyum nonsumbu'mo iwi-iwi' apaa na anu jinadimo hi butongku i Antiokhia, i Ikonium, ka' i Listra; ka' beleyum nonsumbu'mo iwi-iwi' anu ingoa'ankumo! Panyo Tumpu nomposalamatmo aku i han iwi-iwi' aijo'. 12Memang iwi-iwi' mian anu mongka'oho' tumuu' monsombah ka' tumuu' mosa'angu' tiba i Kristus Yesus saidi' mae okabisa'i, 13sadangkan to mia-mian anu ma'idek ka' to mia-mian anu mongakali mompaka pa'idekmo. Aha mongakali mian sangga'at padahan posi aha suele o akali. 14Panyo mongkona beleyum Timotius, tionyo ahi' beleyum tataap mintoong i aja-ajalan anu totu'u anu ingajanakonmo hi beleyum ka' nu palesaya totu-totu'u; kalana beleyum nonsumbu'mo ihe na to gulu-gulu' nu beleyum. 15Beleyum tionyo ahi' monginau', saba' daagi' pe'e ise' beleyum nonsumbu'mo Kitab nu Tumpu. Kitab nu Tumpu aijo' timbali mombee'i beleyum pangalati'an da mohumpak kasalamatan montului jalan palesaya hi Kristus Yesus. 16Iwi-iwi' anu tinulismo i uno nu Kitab nu Tumpu anu binee'mo nu Tumpu da ogunakon mongajan anu totu'u, da mompokinde'i ka' mompoko'ima'i anu sala', ka' mongajan mian da tumuu' montuluti pongka'oho' nu Tumpu. 17Tiba Kitab nu Tumpu aijo' mian anu mombau palentah nu Tumpu aijo' mohumpakmo ilimu' anu sukup anu ogunakon ingangahan nu pakalaja'an anu ma'ima'.
Currently Selected:
2 TIMOTIUS 3: LAILOE
Highlight
Copy
Compare
Share
Want to have your highlights saved across all your devices? Sign up or sign in
