2 TIMOTIUS 1
1
1-2 #
Kis. 16:1
O Timotius, anakku anu ku kanonongi! Aku, i Paulus, nontulis sulat aiya toka hi beleyum, ka' montaha'imani, da Tumpu Tuuma ka' Tumpunto i Kristus Yesus mombee'i balakat, kalibosan ka' ka'ima'an hi beleyum.
Ka' kalana pongka'oho' nu Tumpu, aku i hangkatmo tinimbali rasul i Kristus Yesus ka' sinai da mompolele mongkona kantumuu'an anu jinanji'mo nu Tumpu. Kantumuu'an aijo' tinatimantomo, kalana nosa'angu'mo tiba i Kristus Yesus.
Montalima kase ka' mompoto'i
3Aku montalima kase hi Tumpu anu binaungkumo na palentahnyo nu kinyonyoa anu ma'ima' sumo anu binaumo nu mompolee'ku naipuan mae. Aku saja' montalima kase hi Tumpu ka' ku inau' na beleyum i uno nu do'a, mau sinaa mau mule' pihi. 4Ku inau' na kasusa'an nu kinyonyoaum. Mokonyo aijo' ku kahanda'i hondo singkabot tiba beleyum da aku timbali hondo-hondo lame'. 5#Kis. 16:1 Aku tonginau' i kapalesaya'anum anu totu-totu'u hi Kristus, pokakana sumo kapalesaya'an nu kele'um i Lois ka' tinaum i Eunike. Ka' kupalesaya hondo-hondo beleyum mule' palesaya sumo aijo'. 6Kalana aijo' aku mompo'ingat beleyum da ogunakon hondo-hondo na balakat anu binee' nu Tumpu hi beleyum tempo'nyo aku nombalakatimo beleyum. 7Kalana Roh anu binee' nu Tumpu hi kita, misa' Roh anu mombau kita mabuhuk. Panyo ahi' da Roh nu Tumpu aijo' mombau kita timbali mahoson, ka' saja' mongkalibosi ka' moko ala ahi' mongkuasai butongto.
8Mokonyo aijo' boli ma'ambang na mombee'i katalangan mongkona Tumpunto, ka' boli mongka'ambangakon aku, anu tinalungku' kalana Ia. Panyo ahi' tionyo beleyum tiba kahosona anu lengkat mae hi Tumpu suele mongoa'i sansala kalana Lele Ma'ima' aijo'. 9Tumpu momposalamat kita ka' molaga kita da timbali mian-Nyo anu palesayamo. Binaunyo na aijo' misa' mintoong i apaa na anu binauntomo, panyo mintoong i posi kahanda'-Nyo tiba balakat-Nyo. Ia mombee'i kita balakat-Nyo nontulu hi Kristus Yesus ma'isa pe'e dunia aiya pinotimbali. 10Ka' uuka Tumpu nompotoamo balakat-Nyo aijo' hi kita, kalana nompotokamo mae Tomundo anu Momposalamat kita, i Kristus Yesus. I Yesus nompokalamo kuasa nu kapatean ka' nomboamo mae kantumuu'an anu sampe toka sidu-sidutu' montului Lele Ma'ima' aijo'.
11 #
1Tim. 2:7
Da Lele Ma'ima' aijo' opolele Tumpu nohangkatmo aku da tinimbali rasul ka' gulu'. 12Mokonyo aijo' aku nongoa'imo kasansala'an iwi-iwi' aiya, panyo aku tataap palesaya totu-totu'u, kalana kusumbu' ihe na anu ku palesaya. Ku palesaya totu-totu'u saba' apaa na anu pinalesayakon-Nyomo hi belengku Ia sanggup ahi' na monjagai sampe toka i Sinaa Kakiamatanmo. 13Otuluti hondo-hondo na pangajalan anu totu'u anu binee'kumo hi beleyum. Ka' tionyo ahi' beleyum tataap mintoong i kapalesaya'an ka' kalibosan anu tinimbalimo anunto saba' nosa'angu'mo tiba i Kristus Yesus. 14Kalana tulungan nu Roh nu Tumpu anu tinumuu'mo i uno nu kantumuu'anto, tionyo ahi' nu jagai nu beleyum ima-ima' na hahan anu ko halaga'nyo, anu pinalesayakonmo hi beleyum.
15Nusumbu' saba' iwi-iwi' na mian i da'erah nu Asia nompala'imo aku, tibamo i Figelus ka' i Hermogenes. 16Panyo aha sa'anakon i Onesiforus noko to pimpi-pimpianmo ahi' na nompolame' kinyonyoangku. O'amalakon da Tumpu timbali mompotoa kalibosan-Nyo hi aha. Mau mule' aku i uno nu talungku', i Onesiforus madi' mongka'ambangakon i kantumuu'anku aiya. 17Salatan tinokamo i Roma, ia lau-laus binala usahamo nolio aku sampe ia siningkabot tiba aku. 18Ka' beleyum nonsumbu'mo saba' kiijo' mae i Efesus ia saja'mo hondo nontulungi mae aku. O'amalakon Tumpu mompotoa kalibosannyo hi ia, detakamo i sinaanyo na Tumpu momputusimo iwi-iwi' na mian.
Currently Selected:
2 TIMOTIUS 1: LAILOE
Highlight
Copy
Compare
Share
Want to have your highlights saved across all your devices? Sign up or sign in
