2 TAWARIKH 6
6
I Tomundo Salomo binapedatumo hi aha mian da'isan
(1Raj. 8:12-21)
1I Tomundo Salomo binalado'amo,
“O Tumpu, belento lebe mongka'ima'i jojoong i kundom anu pintung.
2Aiya aku nombaumo Laigan anu daka' hondo ka' ma'ima' obee' hi belento da bau kajojoongan nu
Belento sampe toka sidu-sidutu'.”
3Noko lapas na binalado'a, i Tomundo nosiloimo nontoa mian da'isan iwi-iwi', anu hau-haunyo tinjo-tinjo i kiijo', lantas ia binalado'amo nomoita da aha obalakati. 4-6#2Sam. 7:1-13, 1Taw. 17:1-12 Ia notatae, “U'utu mae belento Tumpu binalajanji'mo hi Daud tuumangku sumo uuka, ‘Salatanmo pe'e Aku nomboamo mian anu pinalesayamo hi belengku nosabatmo nompala'imo Mesir sampe sinaa aiya, i lipu' Israel madi' ko kota maumo sa'angu' na anu pinile'an-Kumo da bau tampat pombauan-Ku laigan da bau ponsomban Aku, ka' maumo ola samian madi' ko anu pinile'ankumo da timbali polaya' nu mian Israel anu pinalesayamo hi belengku. Panyo uuka aiya Aku nompile'imo Yerusalem salaku bau tampat ponsomban Aku. Ka' beleyum, Daud, pinile'an-Kumo da mompalentah mian anu pinalesayamo hi belengku.’ O puji' na Tumpu Allah nu Israel anu mongganapimo janji'-Nyo aijo'.”
7I Salomo po'ule' mule' notatae, “Tuumangku i Daud nontanga'imo da mombaumo laigan tampat ponsomban Tumpu Allah Israel. 8Panyo Tumpu nompoto'imo hi ia, ‘Kahanda' nu beleyum aijo' ma'ima'. 9Panyo, misa' beleyum, anak nu beleyumje ahi' na mombau Laigan-Ku aijo'.’
10Uuka aiya Tumpu nongganapimo janji'-Nyo. Aku tinimbalimo Tomundo nu Israel nombolosakonmo tuumangku, ka' mule' aku nombaumo laigan bau tampat ponsomban Tumpu, Tumpu Allah nu Israel.
11I uno nu Laigan nu Tumpu aijo' pinosadiangkumo na tampat bau pompokokoan Peti' Palajanjian anu koisinyo batu palajanjian nu Tumpu hi aha mian nu Israel.”
Do'a i Salomo
(1Raj. 8:22-53)
12-13I Salomo nombaumo tampat katinjoan tambaga na binau i totonga' nu popasan, i Laigan nu Tumpu. Komantannyo ka' kobolaanyo 2,2 na meten, ka' kotangkasnyo 1,3 na meten. I ahop nu mian da'isan anu sinihuk aijo' noliba'mo na i Salomo i tampat katinjoan aijo', ka' nongahopi mezbah. Iwi-iwi' na mian nontoa ia. Lapas aijo' ia tinolopodadupumo, lantas i hangkatnyomo nokiita' i langit ka' binalado'amo na ia, 14“O, Tumpu, Tumpu Allah nu Israel! Aita' i langit kabai aiya i tano' madi' ko anu sumo belento! Belento nongganapimo janji' nu Belento ka' nompotoamo kalibosan nu Belento hi mian anu pinalesayamo hi belento, anu mohongo-hongo ka' tulu-tulutan lengkat i konyonyoanyo anu totu-totu'u hondo hi belento. 15Belento nongganapimo janji' nu Belento hi tuumangku i Daud. Apaa na anu jinanji'mo nu Belento aijo' binaumo nu Belento sinaa aiya. 16-17#1Raj. 2:4 Belento nojanji'mo hi tuumangku tukoonto, de lee'nyo totu-totu'u tulu-tulutan hi atulan nu Belento sumo ia, saba' sampe toka sidu-sidutu', samian na lee'nyo mae mompalentahje salaku tomundo i Israel. Uuka aiya, o Tumpu Allah Israel, ganapimo mae iwi-iwi' apaa na anu jinanji'mo nu belento hi tuumangku i Daud, posaihon nu belento aijo'.
18 #
2Taw. 2:6
Panyo, o Tumpu Allah, pa' totu-totu'u ahi' na belento sanang na jojoong i dunia aiya hi kami manusia? Langit iwi-iwi' ma di' sukup na ko ewanyo bau kajojoongan nu Belento, ka' aiyaje laigan anu kuba-kubau aiya ponsomban belento tantu lebe madi' sukup! 19O Tumpu, Tumpu Allah-ku aku posaihon nu Belento! Panyo maumo sumo aitu potombihingakon mae kaase' na do'angku, ka' talimakon mae na poitaonku. 20-21#Ul. 12:11 Ku taha'imani da sinaa ka' malom belento monjagai mae laigan aiya anu pinile'anmo nu Belento salaku tampat bau ponsoban belento kita Tumpu. Ku taha'imani da kiita' mae i tampat kajojoongan nu Belento i suluga' belento mohongo mae ka' mongampuni aku ka' mule' mian nu Israel, mian anu pinalesayamo hi belento aijo', de kami tokamo mae i laigan aiya, ka' balado'amo hi belento.
22De daagi' ko mian anu osangka nombaumo kasala'an hi mian sangga'at ka' oboamo i mezbah nu Belento i uno nu Laigan nu Belento aiya kahanda' basumpa' tukoonyo ia madi' ko sala'nyo, 23o Tumpu potombihingakon ahi' mae nu Belento kiita' i suluga' ka' putusiakon mae na palakala nu to posa-posaihon nu Belento aiya. Hukumo na anu ko sala'nyo, ka' pobebasmo na anu madi' ko sala'nyo.
24De mian nu Israel anu pinalesayamo hi belento nupatundu'mo nu sampo bali' nu aha kalana aha binaladosa'mo, lantas mompele-pele'mo ka' po'ule'mo mongadati belento salaku Tumpu, lapas aijo' tokamo mae i Laigan nu Belento aiya ka' balado'amo momoita ampun hi belento, 25ku taha'imani da belento mompotombihingakon mae kiita' i suluga'. Ku taha'imani da belento mongampuni dosa' nu mian anu pinalesayamo hi belento aiya, ka' mule' momboa aha i lipu' anu binee'mo nu Belento hi aha ka' hi mompolee' nu aha.
26De mian anu pinalesayamo hi belento baladosa'mo hi belento ka' belento mohukumo aha, madi'mo montudunakon ujan, lantas aha madi'mo mombau dosa' nu aha ka' mongadatimo belento salaku Tumpu, lapas aijo' tokamo mae i Laigan nu Belento aiya ka' balado'amo hi belento, 27O Tumpu i suluga', potombihingakon mae na aha. Ka' ampuniakon mae na dosa' nu to posa-posaihon nu Belento mian nu Israel. Pokinde'iakon mae na aha da mombau anu madi' sala' Lapas aijo', o Tumpu, tudunakonmo mae na ujan i lipu' nu Belento aiya, lipu' anu binee'mo nu belento hi mian anu pinalesayamo hi belento da ahamo na tumpunyo sampe toka sidu-sidutu'.
28De lipu' aiya kakulanganmo i anu o kaan kabai panyakit anu molele tokamo mae i lipu' aiya, kabai tempo' nu posinaa tokamo sahingga anu osu'an ola manggas, kabai koe', kabai kihi-kihi', kabai de mian anu pinalesayamo hi belento aiya nutumbuhimo mae nu sampo bali', kabai nutokamo mae nu panyakit, 29ku taha'imani da belento mompotombihingakon mae do'a nu aha. De daagi' ko anu aijo' hi mian nu Israel anu pinalesayamo balado'a ka' montutuhakonmo kasusa'annyo ka' ia monsimpalaakonmo limanyo mompatui mae Laigan aiya, 30de timbali da belento i uno nu kajojoongan nu Belento i suluga' mohongo mae ka' mongampuniakon mae aha. Ola belento na monsumbu' isi nu kinyonyoa nu manusia. Kalana aitu pokonai hukuman na mian sitimbang tiba apa na anu binaunyomo, 31da mian anu pinalesayamo hi belento mabuhuk ka' saja' tulu-tulutan hi belento samantala aha jojoong i lipu' anu binee'mo nu Belento hi mompolee' mami.
32De daagi' ko mian anu i salipu'an anu kiijo' mae i lipu' anu majo'on mohongo mae katalasanggoan ka' kamampuan nu belento, ka' belento saja' montulungi, lantas ia toka mo mae i Laigan nu Belento aiya da balado'a hi belento, 33ku taha'imani da kiita' mae i kajojoongan nu Belento i suluga', belento monpotombihingakon mae do'anyo ka' mombee' apaa na anu pinoitanyomo. Tiba jalan anu sumo aijo' iwi-iwi' na bansa anu i songko-songko na dunia mongakuimo belento ka' tulu-tulutanmo hi belento susumo mian nu Israel anu pinalesayamo hi belento. Nusumbu'mo nu aha taalu' laigan anu binaungkumo aiya, aiyamo na tampat bau ponsomban belento.
34De belento mompalentah mian anu palesayamo hi belento mamba mahampate mongewa sampo bali', lantas maumo pa' iya mae na kajojoongan nu aha, aha mo'ahop mae i kota anu pinile'anmo nu Belento aiya ka' balado'a mo'ahop mae i laigan anu binaungkumo bau kajojoongan nu Belento, 35ku taha'imani da kiita' mae i suluga' belento mompotombihingakon mae do'a nu aha aijo', ka' mombee'i ka'untungan de aha mahampate.
36De mian anu pinalesayamo hi belento baladosa'mo hi belento – memang madi' ko samian pe'e na anu madi' baladosa' – lantas kalana pusamo na belento opojohokmo nu belento na aha da nu patundu'mo nu sampo bali' ka' oboamo salaku mian anu i hakopmo ka' oboamo i sala'sa'angu' na lipu' anu majo'on kabai ohani, 37ku taha'imani da belento mompotombihingakon mae do'a nu aha. De i lipu' aijo', nupala'imo nu aha na dosa' nu aha iwi-iwi', ka' balado'amo hi belento, ka' nu akuimo nu aha, na dosa' nu aha tukoonyo aha binaladosa'mo ka' nombaumo anu ma'idek, potombihingakon mae na do'a nu aha, o Tumpu. 38De anu i lipu' aijo', aha halala'mo ka' tou-totu'u mompala'imo dosa' nu aha iwi-iwi', ka' balado'amo hi belento mo'a-'ahop i lipu' aiya anu binee'mo nu Belento hi mompolee' mami ka' mompatuimo kota anu pinile'anmo nu Belento ka' laigan bau ponsomban anu binaungkumo da kajojoongan nu Belento. 39Jadi' kiita' mae i kajojoongan nu Belento i suluga' tionyo ahi' opotombihingakon mae na do'a nu aha ka' okalibosiakon na aha. Ampuniakon na dosa' iwi-iwi' nu mian anu pinalesayamo hi belento.
40Uuka aiya, O Tumpu Allah-ngku, toakon mae na kami ka' potombihingakon mae na do'a iwi-iwi' anu pinotokamo hi belento lengkat i tampat aiya. 41#Mzm. 132:8-10 Tinjomo uuka aiya, o Tumpu Allah! Ka' tiba Peti' Palajanjian, anu bau pontanda'i kakuasaan nu Belento, tionyo ahi' belento mompinsoopimo Laigan nu Belento aiya ka' jojoongmo aiya sampe toka sidu-sidutu'. Balakatiakon iwi-iwi' na kalaja nu to ima-imam nu Belento, ka' ku taha imani da iwi-iwi' na mian anu pinalesayamo hi belento timbali bilahi kalana belento manonong hi aha. 42O Tumpu Allah, boli oka'ideki nu Belento na tomundo anu pinile'anmo nu Belento aiya. Inau'akon na kalibosan nu Belento hi Daud posaihon nu Belento.”
Currently Selected:
2 TAWARIKH 6: LAILOE
Highlight
Copy
Compare
Share
Want to have your highlights saved across all your devices? Sign up or sign in
