2 TAWARIKH 26
26
I Uzia tomundo nu Yehuda
(2Raj. 14:21-22, 15:1-7)
1-3Salatan i Amazia sinilakamo, iwi-iwi' na mian da'isan nu aha Yehuda nompile'imo i Uzia anaknyo momo'ane na binau tomundo. Tempo'nyo aitu umunnyo 16 mo na taun. Sanggo nu tinanyo i Yekholya, boune mian nu aha Yerusalem.
I Uzia nompalentah I Yerusalem 52 na taun na kinopinnyo. Ia na nongala ka' po'ule' nombau kota Elot. 4I Uzia sumo tuumanyo saja' mombau anu momposanang kinyonyoa nu Tumpu. 5I Zakharia na saja' mompokinde'i de mongkona hahan agama. Tempo'nyo i Zakharia daagi' tutuu'. I Uzia daagi' saja' tulu-tulutan monsombah Tumpu, sahingga daagi' saja' nubalakati nu Tumpu.
6I Uzia nahampate nongewa mian nu aha Filistin. I hobo'akonnyo na pagan mesen iwi-iwi' nu kota Gat, Yabne, ka' Asdod ka' nombaumo to kota-kota' anu binentengan koko Asdod ka' da'erah sangga'at i Filistin. 7Tumpu Allah na nontulungi ia nompatundu' mian nu Filistin, ka' mian nu Arab anu jojoong i Gur-Baal ka' mian nu Meunim. 8Mian nu Amon mombayan hasin hi Uzia. Kakuasaannyo kino daka-daka'nyomo sahingga sanggonyo tinalasanggomo tinoka-tokamo i Mesir.
9Bau pompohoson kota' Yerusalem, i Uzia nompotinjomo laigan tangka-tangkas i Sabatan Daka' anu i Pasu'nyo, i Sabatan Daka' anu i Bangka'nyo ka' ipasu'nyo nu pagan mesen. 10Ia mule' nompotinjomo laigan toto tangka-tangkas anu binentengan i da'erah padang, ka' nongkekemo manjoo' hondo na bubung kalana manjoo' na potuu'onnyo mau anu aita' mae i bungkutnyo kabai i hatanyo sasu kinsoban. Kalana ia nompalahatikan hondo anu mombau ale' sahingga ia nompokalajamo mian manjoo' hondo anu mombau ale' nu anggur i da'erah bungkutnyo, ka' mombau ale' i da'erah anu toto ma'o-ma'omuk.
11I Uzia ko suludadu manjoo' hondo anu saja' mosadia mahampate. Aha binagi-bagi toto sanggombu, anu konjoo'nyo ua'aha na gulutulis nu tomundo na montulis, aijo'mo i Yeiel tiba i Maaseya, anu mongkapalai aha aiya i Hananya, sala samian anu mokalaja hi tomundo'. 12-13Iwi-iwi' na suludadu haha aijo' konjoo'nyo 307.500 na mian ka' anu mongkapalai 2.600 na suludadu anu toto tangka-tangkas na pangkatnyo. Aha iwi-iwi' timbali otaha'imani hondo na mahampate montulungi tomundo mompatundu' sampo bali'. 14I Uzia nomposadiaimo suludadunyo haha aijo', kanta, talombo', topi baja, baju' besak, pana' ka' hihisnyo ka' batu anu obunu'akon nu salambeta.
15I Yerusalem anu toto pande-pande mombau toongon bau pahampate nombaumo pana' anu timbali mompana'akon hihis ka' batu anu daka' lengkat mae aita' i laigan tangka-tangkas ka' lengkat mae i pasu'nyo nu pagan mesen nu kota'. I Uzia tinalasanggomo iyaya mae ka' ia binalakuasamo hondo kalana Tumpu Allah nontulungimo hondo ia.
I Uzia nohumpakmo hukuman, kalana ia sinombongmo
16Salatan i Tomundo Uzia dinaka'mo na kakuasaannyo, ia sinombongmo ka' aijo'mo na nonsaduakon sahingga ia sinilakamo. Ia nolanggaimo palentah nu Tumpu Allahnyo kalana nompinsopimo Laigan nu Tumpu ka' nompapuimo kamangian i mezbah i tampat nu kamangian. 17Panyo i Imam Azarya tiba aha 80 na mian sangga'at anu toto hoso-hoson ka' to babaani nompokiijo'imo ia, 18#Kel. 30:7-8, Bil. 3:10 ka' nontewamo apaa na anu binaunyomo aijo'. Aha notatae, “Kita Mian daka' Anu Tala sanggo! Kita Tomundo madi' ko hak mompapui kamangian osombahkon hi Tumpu. Aijo' kalaja nu to ima-imam lee' mae i Harun. Kalana ola ahi aha na samata-mata mombau kalaja aijo'. Pala'i na tampat aiya Tomundo kalana tampat aiya susi'! Kita Tomundo madi'mo mohongo-hongo Tumpu Allah, ka' madi'mo mae nusitujui nu Tumpu.”
19Tempo'nyo aitu i Uzia tinjo-tinjo koko mezbah nu kamangian i Laigan nu Tumpu ka' sulu' anu bau pompapui kamangian totoongmo i limanyo. Ia notambuha'mo hi imam haha aijo', ka' monti-montiik kinonamo nu panyakit kilit anu ma'idek hondo i siakannyo. 20I Azaria tiba to ima-imam sangga'at nontoamo ia ka' tinolokengkengmo, lantas sabole-bolemo sinai nu aha da mosabatmo na ia pala'imo na Laigan nu Tumpu. Ia sampamo nosabat kalana Tumpu nohukumo ia.
21Sangkutnyo i Tomundo Uzia sinilaka, panyakit aijo' madi'mo kino kapa'alinannyo. Ia pinosi pojoongmo i sa'angu' na laigan ka' madi'mo pinobee' minsoop i Laigan nu Tumpu. Ia madi'mo pinobee' mokalaja salaku tomundo, ka' i Yotamo anaknyo momo'ane na nompalentah salaku wakinnyo.
22Sisikon sangga'at mongkona i Tomundo Uzia nompalentah tinulismo i Nabi Yesaya anak i Amos. 23#Yes. 6:1 Salatan ia sinilakamo, i Uzia i lamunmo i tano' koko pinolamunan to tomu-tomundo, panyo madi'mo pinosa'angu' i lamunan aijo', kalana ia ko panyakit kilit anu ma'idek hondo. I Yotam anaknyo momo'ane na nombolosakon ia binau tomundo.
Currently Selected:
2 TAWARIKH 26: LAILOE
Highlight
Copy
Compare
Share
Want to have your highlights saved across all your devices? Sign up or sign in
