2 TAWARIKH 22
22
I Ahazia tomundo nu aha Yehuda
(2Raj. 8:25-29, 9:21-28)
1Daagi' kino minsan sanggombu mae na aha Arab nontumbuhimo, iwi-iwi' na anak i Yehoram anu to momo'ane pinaha pateanmo me i Ahazia anu tatampalui' na lipatnyo. Kalana aijo' to mia-mian nu Yerusalem nohangkatmo i Ahazia binau tomundo nombolosakon tuumanyo. 2-3I Ahazia tinimbalimo tomundo, tempo'nyo aitu umunnyo 22 mo na taun, ka' nompalentahmo na ia i Yerusalem sa'angu' na taun na kinopinnyo. Kantumuu'an i Ahazia suele pokakanamo susumo aha sa'anakan i Tomundo Ahab, kalana i Atalya tinanyo na nompokinde'i da mombau anu ma'idek. I Atalya anak boune i Tomundo Ahab makumpu i Omri tomundo nu Israel. 4I Ahazia binaladosa'mo hi Tumpu susumo aha sa'anakan i Ahab, kalana ahamo na lewa' nompokinde'i salatan tuumanyo sinilakamo. To mia-mian haha aijo' anu lewa' nompokinde'i, aijo'mo na nonsaduakon ia da nonta'up kasilakan. 5Kalana pokinde' nu aha, ia nosa'angu'mo tiba i Yoram tomundo nu Israel da mahampatemo mongewa i Hazael tomundo nu Siria. Aha nahampatemo i Ramot da'erah Gilead. Aha nahampate aijo' i Yoram binelaonmo, 6lantas ia sinule'akonmo i kota Yizreel da opakuli'i, jadi i Ahazia nambamo nontoa ia kiijo' mae.
I Ahazia pinateanmo i Yehu
7Tinantukanmo nu Tumpu Allah na ajan i Ahazia silakamo de ia mambamo montoa i Yoram. Tempo'nyo namba nontoa aijo', i Ahazia tiba i Yoram tinumbuhanmo mae nu mo'ane samian sanggonyo i Yehu anak i Nimsi, anu pinile'anmo nu Tumpu da mompatei aha sa'anakan i Tomundo Ahab. 8Hau-haunyo i Yehu nompojalanmo hukuman nu Tumpu hi aha sa'anakan aijo', ia siningkabotmo tiba aha sanggombu mae na to mia-mian daka' i Yehuda ka' to ponu-ponuanakon i Ahazia anu nombatuki mae nontoa anu masakit. Sahingga aha pinaha pateanmo i Yehu iwi-iwi'. 9Lapas aijo' pinokilionyomo mae na i Ahazia anu tempo'nyo aitu natisulukmo kiijo' mae i Samaria. Salatan i Ahazia i humpakmo, binoamo mae nu aha lantas pinateanmo i Yehu.
Maumo sumo aijo' ia suele ahi' i lamunmo nu aha kalana aha mongadati i Tomundo Yosafat, kai'nyo anu palesaya hondo hi Tumpu totu-totu'u na kinyonyoanyo. Hi aha sa'anakan mae i Ahazia madi'mo ko anu tinimbali i hangkat binau pamalentah.
I Atalya tomundo boune nu Yehuda
(2Raj. 11:1-3)
10Salatan sinumbu'mo i Atalya na i Tomundo Ahazia anaknyo sinilakamo, pinalentahnyomo da iwi-iwi' na aha sa'anakan mae nu tomundo Yehuda opaha pateimo. 11I Ahazia ko utusnyo samian na boune sanggonyo i Yoseba anu ingosoan nu samian na imam sanggonyo i Yoyada. Pinohowini i Yoseba na nogala samian na anak mo'ane i Ahazia sanggonyo i Yoas. Anak aijo' sala'samian to ana-anak i Tomundo anu kahanda'mo nu patei i Atalya. Anak aijo' tibamo anu bau pontamongi pinosuluknyomo i sa'angu' na salipi' kiijo' i Laigan nu Tumpu. Sumo aijo' na i Yoseba nompotumuu' anak aijo' sahingga madi' pinatean i Atalya. 12Anom na taun na kinopinnyo na i Yoas pinosuluk i uno nu Laigan nu Tumpu tempo'nyo i Atalya nompalentah salaku tomundo boune.
Currently Selected:
2 TAWARIKH 22: LAILOE
Highlight
Copy
Compare
Share
Want to have your highlights saved across all your devices? Sign up or sign in
