2 TAWARIKH 17
17
I Yosafat tinimbalimo tomundo
1I Yosafat tinimbalimo tomundo nu aha Yehuda nombolosakonmo tuumanyo i Asa, ka' ia binala'usahamo da mahoson na mongewa Israel. 2Ia nompaha pojoongmo suludadu i iwi-iwi' na kota' anu ko bentengnyo i da'erah Yehuda ka' i to kota-kota' anu i sambiha' nu kota Yehuda, ka' mule' i to kota-kota' anu ingalamo nu tuumanyo i da'erah Efraim. 3Tumpu nombalakatimo i Yosafat kalana apaa na anu binaumo nu tuumanyo aijo'mo na binaunyo; ia madi' monsombah Baal, 4panyo monsombah Tumpu Allah. Ia montuluti iwi-iwi palentah nu Tumpu Allah, ka' kantumuu'annyo madi' sumo to tomu-tomundo nu Israel. 5Tumpu nombalakatimo i Yosafat sahingga nahosonmo na ia salaku tomundo i Yehuda. Iwi-iwi' na mian da'isan nombee'imo palasen hi ia sahingga ia kinayamo ka' ingangga'anmo nu mian. 6Daka-daka' hondo na kinyonyoanyo montuluti palentah nu Tumpu ka' nongideimo tampat ponsomban pilogot ka' iwi-iwi' na patong Pilogot Boune Asyera kiijo' i Yehuda.
7I taun kototolu'nyomo na ia nompalentah, ia nompalentahmo to mia-mian anu ko pangkatnyo matangkas da mompogulu' to atu-atulan nu Tumpu hi songko-songko na kota Yehuda. Aha aijo'mo: i Berhail, i Obaja, i Zakharia, i Netaneel ka' i Mikha. 8Aha sinangaluan nu mian Lewi aha osio', ka' ua'aha na imam. Mian nu Lewi haha aijo' aijo'mo, i Semaya, i Netanya, i Zebaya, i Asael, i Semirabot, i Yonatan, i Adonia, i Tobia, tiba i Tob-Adonia. Ua'aha na imam aijo', aijo'mo: i Elisama, tiba i Yoram. 9Aha namba noyaya nomboamo kitab Atula nu Tumpu nu aha, binoa i iwi-iwi' na kota i da'erah Yehuda ka' nompogulu'mo mian da'isan kiijo' mae.
Kakuasa'an i Yosafat
10Binaumo nu Tumpu na kalaja'an iwi-iwi' anu mompaha'ohani Yehuda da nabuhukmo na mahampate mongewa i Tomundo Yosafat. 11Lengkat mae hi aha mian nu Filistin ia nohumpakmo manjoo' hondo na salaka ka' palasen sangga'at, ka' anu lengkat mae hi aha mian nu Arab 7.700 na domba ka' 7.700 na mee'. 12Sumo aijo' na i Yosafat sansinaa toka sansinaa mompaka pintuangmo na kakuasa'annyo. I songko-songko na Yehuda pinaha bauannyomo benteng ka' to kota-kota' ponguna'an anu o kaan. 13Tinambunnyomo na anu o kaan manjoo' hondo i kota haha aijo'.
I Yerusalem pinojoongnyomo na to sulu-suludadu anu toto tangka-tangkas na pangkatnyo ka' to babaani, 14toto samian ko posi to sulu-suludadunyo anu ingala mae i sa'angu' na tulunan nu aha sa'anakan. I Adna talenga' nu suludadu anu lengkat mae hi aha sa'anakan tulunan i Yehuda. Ia mongkapalai aha 300.000 na suludadu. 15Ko ohua'nyo i Yohanan; ia mongkapalai aha 280.000 na suludadu. 16Ko totolu'nyo i Amazia anak i Zikri; ia mongkapalai aha 200.000 na suludadu. (I Amazia mian anu ola montulu-tulungi panyo palesaya hi Tumpu.) 17Anu mongkapalai aha mae sa'anakan to tulu-tulunan mae nu bansa Benyamin aijo'mo, i Elyada, suludadu anu baani hondo. Ia mongkapalai 200.000 na suludadu, iwi-iwi' ko pana' ka' kanta, 18ko ohua'nyo aijo'mo i Yosabad; ia mongkapalai aha 180.000 na suludadu ka' iwi-iwi' na aha ko toongon bau pahampate. 19Ahamo na binee'an kalaja jojoong i Yerusalem. Ka' mule' i tomundo nompojoongmo to sulu-suludadu sangga'at i benteng haha aijo' anu i da'erah Yehuda.
Currently Selected:
2 TAWARIKH 17: LAILOE
Highlight
Copy
Compare
Share
Want to have your highlights saved across all your devices? Sign up or sign in
