2 TAWARIKH 12
12
Mesir nontumbuhimo Yehuda
(1Raj. 14:25-28)
1Salatan i Rehabeam nompalentah salaku tomundo nahosonmo, ia ka' iwi-iwi' na mian da'isan aha Israel madi'mo nompajuli atulan nu Tumpu, 2ka' madi'mo nontuluti ia. Kalana aijo' Tumpu nohukumo aha. I taun ko olima'nyomo na i Rehabeam nompalentah i Sisak tomundo nu aha Mesir nontumbuhimo Yerusalem, 31.200 na kareta anu bau pahampate, 60.000 na suludadu anu nonsake'i ajahan ka' suludadu anu madi'mo pinoko bilang na konjoo'nyo, tibamo gombuan nu suludadu Libia, Suki ka' Sudan. 4Ia nompatundu'mo iwi-iwi' na kota' anu ko bentengnyo i Yehuda lantas i lau-lausmo sampe tinoka i Yerusalem.
5Tempo'nyo aitu i Tomundo Rehabeam ka' to pola-polaya' nu Yehuda sinilimu'mo i Yerusalem kalana nopalaimo mae nabuhukmo hi Sisak. I Nabi Semaya tinokamo hi aha ka' nompoto'i, “Sumo uuka na koonyo nu Tumpu, ‘Belemiu nohikumo Aku, jadi uuka aiya Aku suele mohikumo belemiu sahingga belemiu nu kuasaimo i Sisak.’ ”
6I Tomundo ka' to pola-polaya' nongakuimo tukoonyo nu aha, aha binaladosa'mo. Aha notataemo, “Apaa na anu binaumo nu Tumpu aijo' memang adin.”
7Salatan tinoamo nu Tumpu na aha nongakuimo kasala'an, ia po'ule'mo notatae hi Semaya, tukoo-Nyo, “Kalana aha nongakuimo dosa' nu aha, jadi Aku madi'mo monsilakai aha. Ku jagaimo na aha da boli ko anu mompoposia; Yerusalem madi'mo o'idei. Maumo sumo aijo', i Sisak, 8mongkuasaimo aha da nusumbu' nu aha na pompahasala'annyo, palesaya hi belengku ka' palesaya hi anu ola mongkuasai dunia aiya.”
9 #
1Raj. 10:16-17, 2Taw. 9:15-16 Sahingga tinokamo na i Tomundo Sisak nontumbuhi kota Yerusalem ka' nompahuhuakonmo to bala-balang anu mahan na olinyo anu kiijo' i Laigan nu Tumpu ka' anu kiijo' i laigan nu tomundo, ka' suele iwi-iwi' na kanta mosoni' anu binau i Tomundo Salomo. 10Salaku bolosnyo, i Rehabeam nombaumo to kanta-kanta tambaga, ka' pino'una'nyo hi to sulu-suludadu anu matangkas na pangkatnyo anu monjagai sabatan daka' nu laigan i tomundo. 11De i tomundo mambamo i Laigan nu Tumpu, aha to mia-mian anu monjagai momboamo mae kanta haha aijo', lapas aijo' po'ule'mo osule'akon i salipi' anu ponjaga'an. 12Kalana i Tomundo nongakuimo kasala'an hi Tumpu, ka' mule' kalana daagi' ahi' ko hahan anu ma'ima' i Yehuda sahingga madi'mo Tumpu nontambuha'i i Rehabeam ka' madi'mo ahi nonsilakai ia.
Sisikon tempo'nyo i Rehabeam nompatei kinodo'anmo
13I Rehabeam nompalentah i Yerusalem ka' kakuasa'annyo lebemo nompaka daka'. Umunnyo 41 taunmo tempo'nyo ia tinimbali tomundo ka' nompalentahmo 17 na taun na kinopinyo i Yerusalem, kota' anu pinile'anmo nu Tumpu i da'erah nu Israel songko-songko da bau tampat ponsomban Ia. Tina i Rehabeam i Naama mian nu lipu' Amon. 14I Rehabeam nombaumo anu ma'idek kalana ia madi' binala'usaha mombau anu nuka'ima'i nu Tumpu.
15Sisikon mongkona i Rehabeam lengkat pe'e momonanyo ia binaumo tomundo sampe ia madi'mo binau tomundo, sisikonnyo tinulismo i kitab sisikon Nabi Semaya ka' i kitab Sisikon Nabi Ido. I Rehabeam ka' i Yerobeam saja' nahampate. 16I Rehabeam sinilakamo ka' i lamunmo i pinolamunan to tomu-tomundo i kota Daud. I Abia anaknyo momo'ane na nombolosakon ia binau tomundo.
Currently Selected:
2 TAWARIKH 12: LAILOE
Highlight
Copy
Compare
Share
Want to have your highlights saved across all your devices? Sign up or sign in
