1 KORINTUS 9
9
Anu tionyo nubau nu to rasul-rasul
1Te misa' aku mian anu bebas? Te misa' aku rasul? Te aku ma'isa toho' nontoa i Yesus, Tumpunto? Te komiu misa' hasin nu kalajangku da palesaya hi Tumpu? 2Mau mule' to mia-mian sangga'at madi' mongka'oho' mongakui aku salaku rasul, panyo komiu mau sangki-sangkidingmo mongakui aijo'! Kalana kantumuu'an miu salaku mian Kristen timbalimo sa'angu' na bukuti' taalu' aku rasul.
3De mian mompisala'i aku, kutaamije sumo uuka: 4Te aku madi' ko hak mongala kaanon ka' anu o inum kalana kalaja anu binaungkumo? 5Te aku madi' ko hak momboa samian na bengkele' Kristen mojajalan tiba aku, momoya susumo anu binaumo nu to Utu-utus i Tumpu Yesus ka' to rasul-rasul sangga'atannyo, sagala i Petrus? 6Kabai ola i Barnabas ka' aku na anu tionyo mosi lio kaanon? 7Madi' ko suludadu anu mongongkosi posi butongnyo hi aha anu montinjohakon pahampatean! Madi' ko mian topo ale' anu mosu'an anggur i ale'nyo, lantas madi' mongkaan hasin nu anggur i ale' aijo'! Madi' ko polaya' domba anu mompotuu' domba, ka' madi' monginum susu nu domba-dombanyo haha aijo'!
8Aku monsisikakon aijo' misa' ola mintoong i anu saja'mo obau sansina-sinaa, panyo kalana Kitab nu Tumpu na anu nonsisikakonmo hahan aijo' suele. 9#Ul. 25:4, 1Tim. 5:18 I uno nu Kitab i Musa tinulis, “Sapi' anu hau-haunyo opake mongutut gandum aijo' da mo hudu' aijo' ikoengannyo boli ahi' osoku' na nganga'nyo.” Te sapi' na nupatui nu potatae nu Tumpu Allah? 10Kabai aijo' makisutnyo kona hi kita? Memang aijo' tuli-tulis kona hi kita. Kalana mian anu mombau ale' tiba mian anu mompobelesi'i gandumnyo memang pantasnyomo na mokalaja kalana montaha'imani da mohumpak sambagian hasin nu kalajanyo. 11#Rm. 15:27 Kami nonsaumo bine' nu santuu' i uno nu kantumuu'an miu. Jadi de kami mompadakmo te balakat sumo to bala-balang hi komiu, te aijo' kami monggaganmo talalo manjoo' hi komiu? 12De to mia-mian sangga'at ko hak montaha'imani aiya lengkat hi komiu, te misa' kami ahi na lebe ko hak molingkudui aha?
Panyo aku ma'isa monggunakon hak aijo'. Ola ahi' aku lebe mongka'ima'i montanggung iwi-iwi' apaa, asan boli monsaduakon han anu molewot Lele Ma'ima' mongkona i Kristus obebakon. 13#Ul. 18:1 Kita Utus tantu monsumbu' saba' te mian anu mokalaja i Laigan nu Tumpu mohumpak kaanon nu aha lengkat i Laigan nu Tumpu. Ka' to mia-mian anu mongkalesang tampat nu ponsombahkonan koloban, mohumpak sambagian koloban anu osombahkon i kiijo'. 14#Mat. 10:10, Luk. 10:7 Sumo aitu mule' na Tumpu nontantukanmo, te mian anu mompolele Lele Ma'ima' aijo' tionyo mohumpak kaanon lengkat i kalaja mompolele aijo'.
15Panyo ma'isa toho' aku nompake hak haha aijo' mau pe'e sangahan. Ka' aku nontulis sulat aiya misa' mule' ko kahanda' da anu haha aijo' obee'mo uuka hi belengku. Lebe ma'ima' aku silaka ka' de mule' ola talabakas na anu ku kabubuulakon aijo'. 16Kalana de aijo' ola han mompolele Lele Ma'ima' lengkat mae hi Tumpu, tantu aku madi' ko hak kobubuun, kalana Tumpu nompalentahmo aku, da mompojalan aijo'. Silaka na aku de aku madi' mompolele Lele Ma'ima' aijo'! 17Bisuannyo aku mompojalan kalaja aijo' ola posi kahanda'ku, tantu aku timbali montaha'imani da mohumpak tambo. Panyo aku mompolele Lele Ma'ima' aijo' ola ahi' kalana pinokaumo nu Tumpu Allah da mompojalan kalaja aijo'. 18Desumo aijo', tambongku apaa? Aiya na tambonyo: aijo'mo aku moko ala mompolele Lele Ma'ima' aijo' madi' pilenje mompiboati samian pe'e da mongongkosi aku, kalana aku madi' mompagala momoita te hak ku salaku anu mompolele Lele Ma'ima' aijo'.
19Aku aiya misa' posaihon pa' ihe; aku bebas. Mau mule' sumo aitu, aku mompotimbalimo butongku aiya posaihon toka hi iwi-iwi' na mian. Kubau na aijo' da aku moko ala mohumpak manjoo' na mian palesaya hi Kristus. 20Toka hi aha mian nu Yahudi, aku sumo mian nu Yahudi, da aku moko ala mohumpak mian nu Yahudi palesaya hi Kristus. Toka hi to mia-mian anu tumuu' mombatuki atulan i Musa, aku montiho susumo au'aitu aku mintoong i atulan aijo', mau mule' aku sabenannyo madi' ahi' mompintoongi atulan aijo'. Kubau na aijo' da aku timbali mongendei aha mombatuki i Kristus. 21Toka hi mian anu misa' Yahudi, aku montiho susumo samian anu misa' Yahudi, anu tumuu' i sambiha'nyo nu atulan i Musa. Kubau na aijo' da aku timbali moko ala mongendei aha mombatuki i Kristus. Panyo aijo' misa' alati'nyo saba' aku madi'mo mohongo-hongo palentah haha aijo' nu Tumpu; aku na kinuasanmo ahi' nu palentah haha aijo' i Kristus. 22Hi aha to mia-mian anu kapalesaya'annyo madi' mahoson, aku mule' montiho sumo samian anu kapalesaya'annyo madi' mahoson, da aku timbali moko ala mongendei aha da timbali mombatuki i Kristus. Memang, aku tinimbalimo sumo anu iwi-iwi' aijo', kalana kapalaluan nu iwi-iwi' mian da mau mule' mosiamo na jalan timbali na aku momposalamat sambagian na aha.
23Iwi-iwi' aijo' kubau kalana Lele Ma'ima' lengkat mae hi Tumpu aijo', da aku suele nu balakati. 24Kita Utus tantu monsumbu' saba' i uno nu pailomban mopadeka', iwi-iwi' na mian mopadeka', panyo ola samian na mohumpak tambonyo. Mokonyo aijo' popadeka'mo hoso-hoson sahingga kita Utus mohumpak tambonyo. 25Ihehe na mian anu hau-haunyo opogulu', tionyo sabaan i han iwi-iwi'. Nubau na aijo' kalana ia mongkahanda'i da opo'olo'i bunga, olo' nu kamenangan, aijo'mo bunga anu sampa magayou. Panyo kita aiya monsabaanakon lupa-lupa, kalana kita mongkahanda'i da opo'olo'i bunga, olo' anu madi' magayou. 26Mokonyo aijo' aku mopadeka ko kahanda' anu natantumo. Sumo anu bakutanding mahanjagun, madi' asan kujagunmo. 27Kubee' na butongku opogulu' totu-totu'u, sahingga aku monsumbu' hondo-hondo. Kubau sumo aijo', kalana aku madi' mongka'oho' boli-boli salatan aku mongende mian sangga'at da mombatuki bakutanding pailomba aijo', yo aitu aku na madi' ahi' opobee' pailomba.
Currently Selected:
1 KORINTUS 9: LAILOE
Highlight
Copy
Compare
Share
Want to have your highlights saved across all your devices? Sign up or sign in
