1 KORINTUS 11
11
1 #
1Kor. 4:16, Flp. 3:17 Obatuki na sonto'ku, sumo aku suele nombatukimo sonto' i Kristus.
Han okukumbungi na ubak de mogalejamo
2Kupuji' na komiu kalana komiu saja' monginau' aku, ka' mohongo-hongo pokinde' anu binee'kumo hi komiu. 3Panyo ku indi da komiu monsumbu' sa'angu' na han mule', aijo'mo saba' anu mongkapalai aha to momo'ane, aijo'mo i Kristus; anu mongkapalai bengkele' aijo'mo langkai'nyo, ka' anu mongkapalai i Kristus aijo'mo Tumpu. 4De samian na mo'ane balado'a kabai tempo'nyo monsisikakon lele lengkat hi Tumpu i ahop nu mian da'isan, okukumbungi na ubak, saba' mian aijo' mongambangi i Kristus. 5Ka' de samian na boune balado'a kabai tempo'nyo monsisikakon lele lengkat mae hi Tumpu i ahop nu mian da'isan madi' okukumbungi na ubak, saba' boune aijo' mongambangi langkai'nyo anu mongkapalai butongnyo. Aijo' pokakanamo ubak nu boune aijo' sumo anu kinismo. 6Kalana de samian na boune madi' mongka'oho' mongkukumbungi ubak, sahanyo ubaknyo o gunting. Panyo de samian na boune o kis na ubaknyo kabai o gunting na ubaknyo, aijo' sa'angu' na ka' ambangan hi ia. Mokonyo aijo' lebe ma'ima' ia mompake kukumbung nu ubak. 7#Kej. 1:26-27 Mo'ane madi' pilenje mompake kukumbung nu ubak, kalana ia sumo mongkitaan pontoaan butong ka' kadaka'an nu Tumpu. Panyo boune sumo mongkitaan pontoan katalasanggoan nu mo'ane. 8#Kej. 2:18-19 Kalana mo'ane misa' boune na pinotimbali, mo'ane ahi' na pinolengkatannyo boune pinotimbali. 9Mo'ane madi' pinotimbali da bau kapentingan nu boune, panyo boune pinotimbali da bau kapentingan nu mo'ane. 10Kalana aijo' da bau pomposanang to mala-malaikat, samian na boune tionyo mompake kukumbang nu ubak salaku tanda saba' ia ta'aluk i kakuasa'an nu langkai'nyo. 11Mau mule' sumo aitu i uno nu kantumuu'anto susumo mian Kristen, boune madi' mosi tinjo sausa', manilapas i mo'ane, ka' mo'ane mule' madi' mosi tinjo sausa', manilapas i boune. 12Kalana mau mule' boune anu momonanyo pinotimbali lengkat i mo'ane, panyo lapas aijo' mo'ane pinohampemo nu boune; ka' iwi-iwi' na apaa, nolengkat mae hi Tumpu.
13Soba to Utu-utus posi popikilakon na han aiya: Pa' ma'ima' samian na boune balado'a hi Tumpu i ahop nu mian da'isan madi' mongkukumbungi ubak? 14Nusumbu' nu mian da'isan komiu pinogulu'mo, taalu' de mo'ane mingubak mantan, aijo' sa'angu' na han anu madi' patut. 15Panyo hi boune hambahan nu ubak binee' hi ia da bau pongkukubi ubaknyo, ka' ubak mantan aijo' timbali kasanangannyo. 16Jadi de daagi' ko anu mongka'oho' painggaga mongkona han aiya, sala' sa'angu' na kutaloakon aijo'mo saba' mau mule' kita, mau mule' to jama-jama'at nu Tumpu sangga'at, kanjoo'annyo ola sa'angu' na kabiasa'an anu daagi' i uno nu jama'at; de sangga-sangga'atnyo aijo' madi'mo.
Palajamuan nu Tumpu
17Mongkona anu susumo aiya, aku madi' mompuji' komiu. Singkabot na komiu mogaleja misa' mohasinakon anu ma'ima', panyo anu madi' ma'ima'. 18Momona ihongongku tukoonyo i uno nu kasingkabotan-kasingkabotan daagi' ko toto sanggombu na mian anu mompaha pisa-pisala'i. Ka' kututugi sangkiding kabai manjoo' na lele aijo' tantu totu'u. 19Memang konamo na ko poga'a-ga'atan itina' hi komiu da otoaje saidi' mae ihehe na mian Kristen anu totu-totu'u. 20Panyo tempo'nyo komiu silimu' anu obau miu misa' Palajamuan nu Tumpu. 21Kalana de mongkaanmo, komiu toto samian gago'mo mongala posi kaanonnyo, sahingga daagi' ko anu madi' mohumpak apa-apaa, panyo sangga'at malangumo. 22Kadaka' sumo aitu? Te madi' kita Utus ko laigan ahi'? Kita Utus timbali mongkaan ka' monginum i kiijo'! Kabai o kita Utus mongka'oho' mompopo'ise' jama'at nu Tumpu, ka' mongambangi to mia-mian kasiasi? Apaa na anu tionyo kutaloakon hi komiu? Pa' tionyo aku mompuji' komiu? Madi'! I madi' hondo-hondo aku mompuji' komiu.
23Kalana pinogulu'akonkumo hi komiu, aijo' ihumpaku lengkat mae hi Tumpu: aijo'mo pihi-pihi salatan i Yesus, Tumpunto kinabisa'anmo, Ia nongalamo roti, 24ka' noko taloakon na Ia talima kaseh hi Tumpu mongkona roti aijo', pinuge-puge-Nyomo na roti aijo' nu lima-Nyo, ka' notatae, “Aiyamo na butong-Ku anu binee'mo kalana komiu. Bau na aiya salaku ponginau' Aku.” 25#Kel. 24:6-8, Yer. 31:31-34 Sumo aitu mule' salatan noko kaan, ingalanyomo na galas nu anggur lantas notatae, “Anggur aiya anu sala'je jinanji'akon nu Tumpu, sinela' nu baso'-Ku. De komiu monginumo aiya, obau na aiya bau ponginau' Aku.” 26Memang de komiu mongkaanmo roti ka' monginumo anggur aiya, komiu nompolelemo kapatean i Tumpu, sampe Ia toka.
27Mokonyo aitu, mian anu mongkaan roti nu Tumpu kabai monginum anggur nu Tumpu tiba jalan anu madi' patut, mian aijo' baladosa' hi Tumpu anu nongkolobanakonmo butong-Nyo tiba baso'-Nyo. 28Jadi batu-batu mian tionyo mompalesa pe'e butongnyo, atina'je ka' ia timbali mongkaan roti ka' monginum anggur aijo'. 29Kalana de mian mongkaan roti ka' monginum anggur, panyo madi' mongangga'i palajamuan aijo' mongkona butong nu Tumpu, mian aijo' mongkaan ka' monginum da mohumpak hukuman nu Tumpu i posi butongnyo. 30Mokonyo aijo' manjoo' anu itina' hi komiu masakit ka' madi'mo mahoson, ka' mule' ko anu sinilakamo. 31Panyo de kita mompalesa pe'e butongto momona, kita madi' nu hukum nu Tumpu. 32Panyo de kita nu hukum nu Tumpu, Ia mondoke kita, da kita boli nukona nu hukuman mohingga-hinggat dunia aiya.
33Mokonyo aitu, to Utu-utus, de komiu silimu' da mongkaan i palajamuan nu Tumpu, komiu tionyo ahi' mompaha tanda-tanda'i. 34De daagi' ko anu mo'ohop, ia tionyo ahi' mongkaan pe'e i laigan. De komiu mongangga'i han aiya, pompahasingkabotan miu mogaleja madi' mompodaagi' hukuman lengkat mae hi Tumpu i posi butongum. Mongkona hahan sangga'at kututuhakonje hi komiu de aku po'ule'mo toka mae.
Currently Selected:
1 KORINTUS 11: LAILOE
Highlight
Copy
Compare
Share
Want to have your highlights saved across all your devices? Sign up or sign in
