1 TAWARIKH 27
27
Anu ko pangkatnyo suludadu ka' anu ko pangkatnyo pamalentah
1-15Ulusan mompalentah kalaja'an nu Israel, nu atun nu to tu'a-tu'anyo nu auwan, to pola-polaya' mae nu aha anu i sa'anakan. Sataun toka sataun o atun toto sa'angu' na tompukan nu mian na anu obee'i kalaja mobolo-bolos kopinnyo sambitu'on, samian na kapala na anu mongatun. Toto sa'angu' na tompukan aha 24.000 na mian.
Aiya na sanggo nu to kapa-kapala toto sa'angu' na tompukan nu mian anu obee'i kalaja toto sambitu'on na kopinnyo.
Bitu'on momona: i Yosabam anak i Zabdiel (ia mian aha sa'anakan mae i Peres anu minsoop tulunan nu bansa Yehuda.)
Bitu'on ko ohua'nyo: i Dodai, lee' mae i ahoni, wakinnyo i Miklot.
Bitu'on ko totolu'nyo: i Benaya, anak i Imam Yoyada; ia polaya' nu “Tumpukan nu Tridasawira” (i Amizabad anaknyo na wakinnyo.)
Bitu'on ko opatnyo: i Asael utus i Yoab (anu nombolosakon aijo'mo i Zebaya, anaknyo.)
Bitu'on ko olima'nyo: i Samhut, lee' mae i Yizrah.
Bitu'on ko anomnyo: i Ira, anak i Ikes, anu lengkat mae i kota' Tekoa.
Bitu'on ko popitu'nyo: i Heles, lee' mae i Efraim lengkat mae i kota' Peloni.
Bitu'on ko ualu'nyo: i Sibkhai, anu lengkat mae i kota' Husa (ia sa'anakan mae i Zerah, tulunan mae nu bansa Yehuda.)
Bitu'on ko osio'nyo: i Abiezer, anu lengkat mae i kota' Anatot i da'erah tulunan nu bansa Benyamin.
Bitu'on ko sampulu'nyo: i Maharai, lee' mae i Zerah anu lengkat mae i kota' Netofa.
Bitu'on ko sampulu'nyomo ka' sa'angu': i Benaya, anu lengkat mae i kota' Piraton i da'erah tulunan mae nu bansa Efraim.
Bitu'on ko sampulu'nyomo ka' ohua': i Heldai lee' mae i Otniel anu lengkat mae i kota' Netofa.
To kapa-kapala nu tulunan mae nu bansa Israel
16-22Aiya na daputan nu to kapa-kapala nu tulunan mae nu bansa Israel.
| Tulunan mae nu bansa | Kapalanyo |
|---|---|
| Ruben | i Eliezer anak i Zikhri |
| Simeon | i Sefaca anak i Maakha |
| Lewi | i Hasabya anak i Kemuel |
| Harun | i Zadok |
| Yehuda | i Elihu sala' samian utus i Tomundo' Daud |
| Isakhar | i Omri anak i Mikhael |
| Zebulon | i Yismaya anak i Obaja |
| Naftali | i Yerimot anak i Azriel |
| Efraim | i Hosea anak i Azazya |
| Manasye anu i sasu kinsoban Kaunyo Yordan | i Yo'el anak i Bedaya |
| Manasye anu i sasu kabete'an Kaunyo Yordan | i Yido anak i Zakharia |
| Benyamin | i Yaasiel anak i Abner |
| Dan | i Azareel anak i Yeroham. |
23 #
Kej. 15:5, 22:17, 26:4 I tomundo' Daud madi' nombilang to mia-mian anu ma'isa nontokai 20 na tau mokiita' na umun nu aha, kalana jinanji'mo nu Tumpu da oponjoo'mo na bansa Israel susumo mandala' i langit. 24#2Sam. 24:1-15, 1Taw. 21:1-14 I Yoab anak i Zeruya nontampu'unimo nombilang, panyo madi' pinomingkotnyo, kalana Tumpu Allah nohukumo mian nu Israel sinaduakon nu nombilang aijo'. Kalana aijo' konjoo'nyo nu aha madi' tinulis i uno nu kitab i Tomundo' Daud.
Anu mongulus halata' i tomundo'
25-31Aiya na daputan nu to mia-mian anu mongulus halata' i tomundo':
To guda-gudang anu i laigan nu tomundo' ka' anu i Yerusalem: I Azmawet anak i Adiel
To guda-gudang anu misa' i Yerusalem i Yonatan anak i Uzia
To mia-mian anu mokalaja ale': i Ezri anak i Kelub.
Iwi-iwi' na ale' nu anggur: i Simei mian nu kota' Rama
Iwi-iwi' na tampat pompo'una'an anggur: i Zabdi mian nu kota' Syifmi
Kau' zaitun ka' kau' Ara (i tengkenyo nu bungkutnyo sasu kinsoban): i Baal-Hanan mian nu kota' Gederi
Iwi-iwi' na tampat pompo'una'an lanya' nu zaitun: i Yoas.
Potuu'on anu pinotuu' i Padang Saron: i Sitria mian nu kota' Saron
Unta: i Obil lee' mae i Ismael
Keledai: i Yehdaya mian nu kota' Meronot
Domba ka' mee': i Yazis, mian nu Hagri.
To mia-mian anu lewa' mombee'i pokinde' i Daud
32Babo' i Tomundo' Daud sanggonyo i Yonatan, anu lewa' mombee'i pokinde' ka' pande hondo ka' ko sikolah. Ia tiba i Yehiel anak i Hakhmoni binee'an kalaja momposikolah to ana-anak mo'ane i tomundo'. 33I Ahitofel suele anu lewa' mombee'i pokinde' i tomundo' tiba i Husai mian nu Akri, suele anu lewa' mombee'i pokinde' anu mompaha bela' hondo i tomundo'. 34Salatan i Ahitifel sinilakamo, ia binolosakonmo i Abyatar tiba i Yoyada anak i Benaya. Talenga' nu to sulu-suludadu i uno nu kalaja'an aijo'mo i Yoab.
Currently Selected:
1 TAWARIKH 27: LAILOE
Highlight
Copy
Compare
Share
Want to have your highlights saved across all your devices? Sign up or sign in
