Roma 6
6
Nokomi pohintuwuꞌta hante hi Yesu, tepohentemoki ka kuasaꞌ dosa
1Hapo tene to wadi hingkiꞌ totiꞌi? Ane Pueꞌ Ala moꞌampuni dosanta alaꞌ kopopuhiꞌna laliNa i ingkiꞌ, ba moromiꞌ ane mowaliki nturusi dosa hingkeꞌna pedeꞌ terononihi kopopuhiꞌne lalina Pueꞌ Ala moꞌampuniki? 2Mononto hawaꞌi moromiꞌ! Ane mahiki moꞌawa hante Kerisitu, palaihana: peleihana lalinta mowali dosa hangangaa mahi woꞌo, hei hamboaꞌmo makuasaꞌ i ingkiꞌ. 3Hawaꞌireꞌi ibahaꞌkei, ikoniriunta mopalaiha ingkiꞌ mohintuwuꞌmoki hante Yesu Kerisitu ikomahina? 4Ikoniriunta tiꞌo, hibaliki toaꞌ to mahi hei nitawu moꞌawa hante Kerisitu. Kerisitu nipatuwuꞌ huliꞌ ka komahia alaꞌ kuasaꞌna Pueꞌ Ala Umoꞌta, hingkeꞌna tuwuꞌki i duniaꞌ hante lala ngkotuwuꞌ to wolaꞌ.
5Mewaliꞌ, alaꞌ pohintuwuꞌta hante hi Yesu i lali komahiNa, Pueꞌ Ala hingkiꞌ mampotuwuꞌki woꞌo huliꞌ hibali hante hi Yesu. 6Alaꞌ tobahaꞌ, i tempona Kerisitu nirokoꞌ i loti momehulepe, kotuwuꞌta hampiha nirokoꞌ woꞌo moꞌawa hante Io. Mewaliꞌ kuasaꞌ dosa i lali kotuwuꞌta moholi, koꞌukoana hamboaꞌmoki nopohawiꞌ dosa. 7Alaꞌ hihimolu to mahi moꞌawa hante Kerisitu, himpolohoꞌmo ka kuasaꞌ dosa. 8Mewaliꞌ, alaꞌ mahimoki moꞌawa hante Kerisitu, topoꞌohi hingkiꞌ tuwuꞌki moꞌawa hante Io. 9Alaꞌ tobahaꞌ, Kerisitu nipatuwuꞌ huliꞌ, hei uko tiꞌo, hawaꞌi uwaꞌ kuasaꞌ to wadi morokoꞌ Pueꞌ Yesu, alaꞌ Io tuwuꞌ nturusi wute nantolou-louna. 10Io hampihalu mahi monani kuasaꞌ dosa wute nantolou-louna. Hinewowoꞌena Io tuwuꞌ moꞌawa hante Pueꞌ Ala. 11Hatoꞌo woꞌo ingkiꞌ, hangangaa totiꞌi i lalinta: Mahiꞌa moꞌawa hante Yesu Kerisitu; hamboaꞌmoꞌa mohintuwuꞌ hante dosa, angkana tuwuꞌa hingkeꞌna motuntuniꞌa peleihana Pueꞌ Ala alaꞌ pohintuwuꞌku hante Yesu Kerisitu.
12Iomo horiana kupaꞌanikei lolita halali-halali, inioꞌ nipotedehi dosa mokuasaꞌi kotuwuꞌmi i duniaꞌ hieꞌe hingkeꞌna hawaꞌkei mampetuntui peleihane lalimi to kodake. 13#Rm. 12:1, 2; 13:12Wotami inioꞌ ipakeꞌkei mowali dosa hante walia to kodake. Aginamo nipepolintaroki kotuwuꞌmi pe Pueꞌ Ala, alaꞌ himpolohoꞌmokei ka kotuwuꞌmi hampiha hei ihuamokei kotuwuꞌ to wolaꞌ. Hangangaa nipewei wotami pe Pueꞌ Ala hingkeꞌna Nopakeꞌkei mowali walia to moromiꞌ. 14Hamboaꞌmokei motuntuni Aturana hi Musa, horiana hamboaꞌmokei nokuasaꞌi dosa, alaꞌ mantorimomokei kopopuhiꞌna lalina Pueꞌ Ala.
Hangangaa mewaliki hawiꞌna Pueꞌ Ala
15Mewaliꞌ, ane hamboaꞌmoki motuntuni Aturana hi Musa, alaꞌ mantorimomoki kopopuhiꞌna laliNa pueꞌ Ala, hapo to hangangaa towali? Ba mowaliki nturusi dosa? Hawaꞌi! 16Ibahaꞌlukei, ane rapaꞌna mengkoruꞌkei i haduo toaꞌ hei ipetuntuikei hawaꞌne, hawiꞌnakei toaꞌ tiꞌo. Ane ipetuntuikei nturusi peleihane lalimi to kodake, hingkiꞌ mewalikei hawiꞌna dosa, to mokaꞌakei ka Pueꞌ Ala wute nantolou-louna. Angkana ane mampetuntuikei peleihana Pueꞌ Ala, mewalikei hawiꞌNa, hei mohaꞌanukei huliꞌ hante Io.
17Hampiha, ikohandoaꞌami tene mampoꞌohi hi Yesu, nopohawiꞌkei tene dosa. Angkana kutiꞌi woriꞌ komoromiꞌne Pueꞌ Ala, alaꞌ hinewowoꞌena mengkoruꞌkei pe Pueꞌ Ala ka lalimi mpololeke alaꞌ motuntunikei poturuꞌ to nipowutekimokikei. 18Mewaliꞌ himpolohoꞌmokei ka konopohawiꞌmi dosa, hei mewalimokei hawiꞌna Pueꞌ Ala to motuntuni peleihaNa. 19Pandiriꞌ tiꞌo kupakeꞌ hingkeꞌna hantouꞌ ibahaꞌkei tungkaihane poturuꞌku hieꞌe. Hampiha nopohawiꞌkei dosa, alaꞌ wotami nipotedehi motuntuni peleihana lalimi to kodake hante to hawaꞌi hintotoꞌ, koꞌukoana tetambai kokodakene waliami. Mewaliꞌ hinewowoꞌena, hangangaa ipeweikei wotami pe Pueꞌ Ala hingkeꞌna mewalikei hawiꞌNa hei mononto mpololeke waliami hingkeꞌna mangkolehi kotuwuꞌmi.
20Hampiha, tempomi tene nopohawiꞌ dosa, hawaꞌkei mampetuntui peleihana Pueꞌ Ala. 21Pebarakati haporeꞌi to ihuakei ka kotuwuꞌmi to hampiha tiꞌo? Lekiꞌ-lekiꞌna tiꞌo mampoꞌuwaꞌlu komohilimi hinewowoꞌena, alaꞌ waliami tiꞌo koꞌukoana mangkomikei pe komahia to mokaꞌakei ka Pueꞌ Ala. 22Angkana hinewowoꞌena, himpolohoꞌmokei ka kuasaꞌ dosa, hei mewalimokei hawiꞌna Pueꞌ Ala, koꞌukoana mangkolehi kotuwuꞌmi, hei hingkiꞌ pahuakei kotuwuꞌ to wolaꞌ wute nantolou-louna. 23Howonina dosa iomo komahia, angkana alaꞌ kopopuhiꞌna lalina Pueꞌ Ala, Nopaꞌanikiki ntooꞌ-ntooꞌ kotuwuꞌ to wolaꞌ to hawaꞌi mokoꞌukoa, moliu pohaꞌanunta hante Pueꞌta Yesu Kerisitu.
Currently Selected:
Roma 6: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
