Wahiu 1
1
1I lali suraꞌ hieꞌe, Pueꞌ Ala morumbaꞌ hi Yesu Kerisitu hingkeꞌna Io mampowute pe hawiꞌ-hawiꞌNa, hapo to hangangaa hohiꞌ mewali. Hi Yesu morumbaꞌ malaꞌekaNa nolou mampetidoꞌki lekiꞌ-lekiꞌna to hingkiꞌ mewali tiꞌo pe hi Yohanes, hawiꞌNa. 2Lekiꞌna to noꞌokiꞌ hi Yohanes noꞌukiꞌ hingkeꞌna nopowutekiki pohawaꞌne Pueꞌ Ala hante hapo to notidoꞌkiꞌi hi Yesu Kerisitu. 3Motanaꞌ toaꞌ to mampobasakihi suraꞌ hieꞌe to mampowute hapo to hingkiꞌ mewali, hei motanaꞌhi woꞌo to mampehoromua hei mampetuntui hapo to teꞌukiꞌ i lali suraꞌ hieꞌe, alaꞌ hamboaꞌmo morue lekiꞌ-lekiꞌna hieꞌe hangangaa mewali.
Tabea
4Suraꞌ hieꞌe ka aku hi Yohanes, kupakatukihi tosarani to meꞌohaꞌ i pitu jumaꞌa to uwaꞌ i poropensi Asia. Hinamo Pueꞌ Ala mobarakatikei hante Rima ngkotuwuꞌ hei romiꞌ ngkotuwuꞌ. Kuperapiꞌ hingkeꞌna ihuakei pebarakati hieꞌe ka Pueꞌ Ala to uwaꞌmo umbiꞌ ka uluꞌ-uluꞌna, hei to uwaꞌ hinewowoꞌena, hei to hingkiꞌ uwaꞌ wute nantolou-louna. Hei pebarakati hieꞌe ihuakei woꞌo ka Inohaꞌna Pueꞌ Ala to pitu,#1:4 Yes. 11:2; Sak. 4:2, 10; Wah. (3:1, 4:5, 5:6). I lali pohawaꞌna Pueꞌ, angkaꞌ pitu nipakeꞌ hibali tandaꞌ to mangkolehi. Angkana toaꞌ, iomo oni. to uwaꞌ i hinarona pahura kodatuana Pueꞌ Ala, 5hei ka hi Yesu Kerisitu to uluꞌ-uluꞌna nipopeꞌaro ka lumbuna toaꞌ to mahi. Hi Yesu Kerisitu iomo to nipoꞌohi i lali lekiꞌna to notiꞌi noniuꞌ Pueꞌ Ala, hei Iomo Tadulako to moparentai lekiꞌ-lekiꞌna datu i duniaꞌ. Hei Io to mampokarimaki, hante mampewei wotaNa nirokoꞌ hingkeꞌna tepohenteki ka pehuku dosa, 6hei Nopopewaliki toaꞌNa i lali poparentaNa hingkeꞌna mewaliki tadulako mpenomba pe Pueꞌ Ala, UmoꞌNa. Hi Yesu Kerisitumo to manobaꞌ tuwuꞌNa hei to makuasaꞌ wute nantolou-louna. Amin!
7 #
Dan. 7:13
Iꞌele romokei! Ane hi Yesu mehupaꞌ humei noputuꞌ kini,
lekiꞌ-lekiꞌna toaꞌ hingkiꞌ pangkiꞌI,
wute-wute i toaꞌ to mohakuꞌI hampiha.
Hei lekiꞌ-lekiꞌna toaꞌ i duniaꞌ
hingkiꞌ meꞌolahi alaꞌ koꞌIona.
Tiꞌomo to hingkiꞌ mewali! Amin!
8Notiꞌi Pueꞌ Ala, “Akumo hieꞌe Alpa hei Omega. Akumo pepongkana hei koꞌukoana. UwaꞌmoꞌA umbiꞌ mepongka ka uluꞌ-uluꞌna, uwaꞌA hinewowoꞌena, hei bateꞌna hingkiꞌ uwaꞌA nturusi wute nantolou-louna. Kodeꞌ kuasaꞌKa ka lekiꞌ-lekiꞌna.”
PeponoꞌokiꞌiNa to uluꞌ-uluꞌna (1:9–3:22)
Hi Yesu matengkaꞌ i lumbuna pamporideꞌa huluꞌ to pitu onu
9Aku hieꞌe hi Yohanes halalimi i lali konaꞌna hi Yesu. Hibobali konipoperima-rimante alaꞌ hi Yesu mewali datunta, hibobali woꞌo kosabaraꞌte morii poperima-rima tiꞌo. Ane aku hieꞌe, nitubeꞌa i leowuta to nikokeneꞌi Patmos alaꞌ mampowuteꞌa pohawaꞌna Pueꞌ Ala hei mampowuteꞌa noniuꞌ hi Yesu. 10I ando penombaha, nokuasaꞌiꞌa Inohaꞌ Mangkolehi, hei kuhori loaꞌ i tunduku. Makaja mpololeke loaꞌ tiꞌo, hibali monina torompeꞌ. 11Notiꞌikiꞌa waheꞌe: “Hapo to iꞌokiꞌ, iꞌukiꞌmo i suraꞌ hei ipokatukihi pe pitu jumaꞌa iomo: Epesu, Simirna, Pergamus, Tiatira, Sardis, Piladepia hei Laodikia.”
12Mehahiliꞌa pe tundungku hingkeꞌna kuꞌokiꞌi himo to mololita pe aku, hei kuꞌokiꞌ pobuntahana huluꞌ to pitu onu to niwali ka bulawa. 13#Dan. 7:13I lumbuna pobuntahana huluꞌ tiꞌo, kuꞌokiꞌ haduo toaꞌ lentena hibali Anaꞌ Manusiaꞌ. Komandoena jubaNa wute i kapuꞌNa, hei bobariꞌNa nowiwiꞌ salupiꞌ bulawa. 14#Dan. 10:6WiloluNa bobala hibali wilolu gimba ba kapaꞌ. MataNa mewanta hibali makiꞌ api. 15KapuꞌNa manakiꞌ hibali tembaga to hongkoꞌ nihowui i lali makiꞌna api. LoaꞌNa makaja mpololeke hibali uwai to makehiꞌ. 16Korawe kuanaNa motiko pitu onu betueꞌ, hei ka omeꞌNa mesuwu hamato piho to motari motimali. LioNa mewanta hibali pewantana ando.
17Kokuꞌokiꞌna, kaliuꞌ hipotumpapaꞌa i kapuꞌNa, hibaliꞌa toaꞌ to mahi. Angkana Nolule korawe kuanaNe i wotangku hei Notiꞌikiꞌa, “Hampoliꞌmoko morokaꞌ. Akumo hieꞌe to Pepongkana hei to Koꞌukoana, 18hei to tuwuꞌ. Aku mahiꞌA hampiha, angkana iꞌokiꞌmo tuwuꞌA huliꞌ, hei hingkiꞌ tuwuꞌA nturusi wute nantolou-louna. Aku to motiko pegili to wadi moweaꞌ peꞌohaꞌana to mahi, hei mampopeꞌarohi huliꞌ. 19Io horiana, hinewowoꞌena hangangaa iꞌukiꞌmo hapo to iꞌokiꞌ hingkenia, hapo to mewali i tempo hieꞌe, hei hapo to hingkiꞌ mewali uko hieꞌe.
20Hingkiꞌ Kupokonontokiko palaihane pitu onu betueꞌ to iꞌokiꞌ i korawe koanangKu hante pobuntahana huluꞌ bulawa to pitu onu: betueꞌ to pitu onu tiꞌo, iomo malaꞌeka to morewahi to pitu jumaꞌa,#1:20 Malaꞌeka to morewahi to pitu jumaꞌa: Iomo, tadulakora tosarani ba suro to nirumbaꞌ nolou mampowute pohawaꞌna Pueꞌ Ala pe tosarani to meꞌohaꞌ i kota to pitu onu. Mopalaiha: tadolako ba rumbaꞌa. hei pobuntahana huluꞌ to pitu onu tiꞌo, iomo to pitu jumaꞌa.”
Currently Selected:
Wahiu 1: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
