Pilipi 3
3
Inioꞌki mampokokodeꞌ nokomi komoromiꞌna walianta ba petuntuta i atura agama
1Mewaliꞌ halali-halali, hangangaa motanaꞌkei alaꞌ pohintuwuꞌmi hante Pueꞌ.
Hawaꞌi kupomadori moꞌukiꞌ huliꞌ hapo to kupoturuꞌkimokei, alaꞌ ane ipetuntuikei poturuꞌka tiꞌo, hingkiꞌ maroho pepoꞌohimi. 2Majaga-jagakei i toaꞌ to mowalia ngkodake, toaꞌ tiꞌohi masipatoꞌhi nitiꞌi ahu. Iohi to meparuku hingkeꞌna nibulabaꞌkei. 3Angkana kotuꞌuana to mononto i peꞌoꞌelena Pueꞌ Ala iomo ingkiꞌ, handoꞌio iohi, alaꞌ Inohaꞌna Pueꞌ Ala morandaki hingkeꞌna wadiki menomba pe Pueꞌ Ala. Mepoꞌohiki pe Yesu Kerisitu, handoꞌio pe adaꞌ to rowalilu toaꞌ.
4Kotuꞌuana, ane kuleiꞌi, kewadiꞌa woꞌo mohinaru i lekiꞌ-lekiꞌna adaꞌ tiꞌo. Ane uwaꞌ toaꞌ to mampekiri uwaꞌ lalane mohinaru i pampetuntuina adaꞌ, hapo tene aku! Woriꞌ mpololeke podumbuꞌane aku wadiꞌa mohinaru i adaꞌ ba waliangku: 5I kowalu andona tinuwuꞌka, nibulabaꞌmoꞌa motuntuni hawaꞌna hi Musa. Aku toIbaraniꞌa, hei todulungku lekiꞌ-lekiꞌra toIbaranihi. Pemuleꞌana toSaraeli ka tinona hi Benami. Ikohandoaꞌangku tene mepoꞌohi pe Pueꞌ Yesu, kupetuntui mpololeke hawaꞌne hi Musa alaꞌ aku toParisiꞌa. 6I tempo tiꞌo, kutuntuni lekiꞌne atura agama, iomo hinaꞌ kupopoꞌioꞌiohi toaꞌ to mepoꞌohi pe hi Yesu. Modotoꞌa mpololeke mampetuntui lekiꞌ-lekiꞌna hawaꞌ to teꞌukiꞌ i lali hawaꞌna hi Musa. Hawaꞌi uwaꞌ howeꞌ haduo toaꞌ to mosalaꞌiꞌa.
7Hampiha lekiꞌ-lekiꞌna tiꞌo kurekeꞌ kuporasiꞌa. Angkana hinewowoꞌena kubahaꞌmo lekiꞌ-lekiꞌne tiꞌo hawaꞌi modumbuꞌ. Bateꞌna Kerisitu to kupohinaru. 8Hawaꞌi iolu, hinewowoꞌena kubahaꞌmo: lekiꞌ-lekiꞌna tiꞌo hawaꞌi modumbuꞌ i aku, alaꞌ uwaꞌ to meliu komoromiꞌne, iomo pohintuwuꞌku hante Pueꞌku Yesu Kerisitu. Iomo horiana kupohentemo lekiꞌ-lekiꞌne to kuwali hampiha, kurekeꞌmo hibali kora to hangangaa nitube, hingkeꞌna mohintuwuꞌa hante Kerisitu, 9hei mewali toaꞌNa. Pueꞌ Ala morekeꞌa mononto i pampeꞌeleNa, handoꞌio alaꞌ petuntuku i hawaꞌna hi Musa, angkana nokomi pepoꞌohingku pe Kerisitu. Mewaliꞌa mononto i peꞌoꞌelena Pueꞌ Ala nokomi kopopuhiꞌna laliNa, alaꞌ mepoꞌohiꞌa pe Kerisitu. 10Tungkaihangku hingkeꞌna kubahaꞌ mpololeke Kerisitu. Kukodokoꞌi kuhoriki kuasaꞌ to mampopeꞌaroꞌI ka komahia. Timomoluꞌa pahua komaporiꞌ hibali to nohua hi Yesu, hei mewali hibali hante Io to timomomo maporiꞌ wute mahi. 11Kukodokoꞌi lekiꞌ-lekiꞌna tiꞌo mewali hingkeꞌna aku woꞌo hingkiꞌ tuwuꞌa huliꞌ ka komahia.
Hi Paulu mopari-pari metuntu pe Kerisitu
12 #
Plp. 2:5
Halali-halali, hawaꞌi Kutiꞌi kuhuamo tungkaihangka. Hawaꞌi hatoꞌo. Angkana kupari-pari hingkeꞌna hibaliꞌa hante Yesu Kerisitu, alaꞌ iomo tungkaihaNe mowowoiꞌa mewali toaꞌNa. 13-14Halalingku, kupangakuꞌ handoaꞌi tene kuhua tungkaihangka tiꞌo. Iomo hinaꞌ kupari-pari hibali toposilumba. Hamboaꞌmo nopekiri hapo to liumo, alaꞌ nohohiꞌi menonto pe tungkaihana. Hatoꞌo woꞌo komagegangka hingkeꞌna kuhuaꞌi howonine i suruga, alaꞌ hatoꞌomo pewowoine Pueꞌ Ala hingkeꞌna mohintuwuꞌa hante Yesu Kerisitu.
15Mewaliꞌ, ingkiꞌ to maroho pepoꞌohinta, hangangaa hampekokiriki mowali hibali to kuꞌukiꞌmo. Angkana ane uwaꞌ tene to ntaniꞌna to nipekiri, Pueꞌ Ala to hingkiꞌ mampokonontokikei hapo to tuꞌu. 16To hangangaa topohimpodulu, iomo mampetuntuiki peleihana Pueꞌ Ala motuntuni hapo to tobahaꞌmo.
Majaga-jagakei i toaꞌ to kodake waliara
17Halali-halali, kolentuꞌangki tene moꞌawa-awa hante ingkei, kiponoꞌokiꞌimokei walia to moromiꞌ. Mewaliꞌ kuperapiꞌ hingkeꞌna lekiꞌ-lekiꞌmi mampetuntui waliangku, alaꞌ tiꞌo mewali pandiri' i ingkei. Hei hangangaa ipoꞌilalikei toaꞌ to mampetuntui waliangki, hei ipetuntuikei woꞌo pandiriꞌre. 18Alaꞌ hibali to poko kutiꞌikikei hampiha, hei kutiꞌikikei womo hinewowoꞌena: woriꞌhi toaꞌ to mosapuakahi tungkaihana komahina Kerisitu i loti momehulepe. Lalingku handondoiha mpololeke mampenondihakihi. 19Toaꞌ to hatoꞌo bateꞌra hingkiꞌ pahua pehuku i lali naraka. Nokuasaꞌihi peleihana wotara hadoduora. Mamperenakiluhi waliara to mepokohili, hei mampohimpodulu kotuwuꞌra i duniaꞌ hieꞌe. 20Angkana ingkiꞌ halali-halali, hawaꞌi hatoꞌo waliante, alaꞌ ingkiꞌmo hieꞌe tumpu suruga. Hei motanaꞌki mpuꞌu mampekau kohupaꞌna huliꞌ Pueꞌta Yesu Kerisitu ka suruga. Iomo Topohompoꞌ dosanta. 21#1Kor. 15:42-44Ane temponamoꞌi mehupaꞌ huliꞌ, Io hingkiꞌ mowolihi wotanta to moledeꞌ hieꞌe hingkeꞌna hibali hante wotaNa to manobaꞌ mpololeke. Hingkiꞌ Nowali hatoꞌo alaꞌ Io to makuasaꞌ, hei hinangkana to uwaꞌ mengkoruꞌ pe Io.
Currently Selected:
Pilipi 3: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
