Markus 7
7
Hi Yesu mokamoroki toParisi hante guru-guru agama Yahudi
(Mat. 15:1-20)
1Hampiha tempo, uwaꞌhi toParisi hante guru-guru agama toYahudi to ka Yerusale nolou mampohidupaꞌki hi Yesu. 2Hei pangkiꞌhi haꞌumbora topeguruna hi Yesu mangka, angkana hawaꞌhi mewaheꞌ motuntuni adaꞌra toYahudi.#7:2 Motuntuni adaꞌra toYahudi hangangaa mewaheꞌhi hingkeꞌna hawaꞌhi mekododokui. 3ToParisi hante toYahudi ntaniꞌna, maroho mpololeke pampetuntuire adaꞌ tododulura. Rapaꞌna, hawaꞌhi wadi mangka ane handoaꞌhi tene mewaheꞌ motuntuni adaꞌra, 4hei ane mahuliꞌhi ka pobaluꞌ-baluꞌa, hangangaa mewaheꞌhi duluna. Hei woriꞌ tene adaꞌ to rotorimo ka tododulura to ropetuntui mpuꞌu, to hibali adaꞌ mowaheꞌ sangkiriꞌ, kiri hante mowaheꞌ woꞌo parewa ntaniꞌna to rowali ka tembaga. 5Iomo horiana toParisi hante guru-guru agama tiꞌo meꞌitanohi pe hi Yesu, rotiꞌi, “Mahamporeꞌi topeguruMa hinaꞌ hawaꞌhi mampetuntui adaꞌra tododulunta? Mangkahi, angkana hawaꞌhi duluna mewaheꞌ.”
6Notiꞌi hi Yesu, “Mampetoromiꞌlukei! Tuꞌu mpololeke lolitane nabi Yesaia hampiha noniuꞌ ingkei to mantiꞌi waheꞌe:
Notiꞌi Pueꞌ Ala:
‘Toaꞌ tiꞌohi, iꞌomeꞌralu mampokodeꞌA,
angkana lalira moꞌela ka Aku.
7Hawaꞌi modumbuꞌ penombare pe Aku,
alaꞌ poturuꞌ to ropepoturuꞌki ka toaꞌlu,
handoꞌio poturuꞌ to ka Aku.’ (Yes. 29:13)
8Hatoꞌo woꞌo ingkei. Maroho potikomio adaꞌ, angkana hawaꞌna Pueꞌ Ala hawaꞌkei ipetuntui.”
9Uko katoꞌo, notiꞌiki womohi hi Yesu, “Ingkei, mapandekei mpololeke mohoha hawaꞌna Pueꞌ Ala ka kotuwuꞌmi hingkeꞌna mampokaroholukei adaꞌmi hadoduomi. 10Rapaꞌna, i lali hawaꞌna hi Musa teꞌukiꞌ waheꞌe: ‘Hangangaa iꞌadaꞌi umoꞌmu hante inoꞌmu.’ Hei teꞌukiꞌ woꞌo: ‘Himo to motundaꞌ umoꞌna ba inoꞌna io hangangaa mahi.’ 11-12Angkana pepoturuꞌmi waheꞌe: wadikei mantiꞌi pe tomotodimi: ‘Hapo tene to kupaꞌanikei, ukomo kupopenomba pe Pueꞌ Ala.’ Hante poturuꞌmi tiꞌo mopalaiha toaꞌ hawaꞌi paralu mosulungi tomotodira. 13Mewaliꞌ, alaꞌ adaꞌ to itorimokei ka tododulumi ipepoturuꞌkikei i toaꞌ to woriꞌ, mopalaiha ipahimokei pohawaꞌne Pueꞌ Ala. Hei woriꞌ tene poturuꞌmi to hibali tiꞌo to ipepoturuꞌkikei.”
Handoꞌio pangka to mampomokomaꞌ toaꞌ i peꞌoꞌelena Pueꞌ Ala
(Mat. 15:10-20)
14Uko tiꞌo, hi Yesu mowowoi womo toaꞌ to woriꞌ, Notiꞌikihi, “Ipehoromuakei moromiꞌ-romiꞌ hingkeꞌna ibahaꞌkei. 15Handoꞌio hapo to mekahi pe wotanta to mampomokomaꞌki angkana hapo to mesuwu ka wotanta to mampomokomaꞌki. [16Moromiꞌ mpololeke ane ingkei mampoꞌilali hapo to ihorikei!]”
17Uko katoꞌo, hi Yesu mampolihi toaꞌ to woriꞌ, honiꞌi mekahi pe lali tambi. Meꞌitanohi topeguruNe pe Io ba hapo palaihane pandiriꞌ tiꞌo to Nopowute hingkenia. 18Notiꞌikihi, “Howeꞌ rope woꞌo ingkei hawaꞌkei ibahaꞌ palaihane? Handoꞌio pangka to mekahi i omeꞌta to mampomokomaꞌki i peꞌoꞌelena Pueꞌ Ala, 19alaꞌ pangka hawaꞌi mekahi pe lali pekirinta, angkana mekahilu i hinaꞌinta, honiꞌi mesuwu.” Moliu lolita tiꞌo, hi Yesu mampokononto kohawaꞌnamo uwaꞌ pangka to nikopali. 20Notiꞌikihi womo hi Yesu, “Angkana walianta to kodake to mesuwu ka lalinta, tiꞌo wae to mampomokomaꞌki i peꞌoꞌelena Pueꞌ Ala, 21alaꞌ ka lalina toaꞌ, mehupaꞌ lekiꞌ-lekiꞌna pekiri to kodake, alana:
uwaꞌhi to mowali walia to mekokomaꞌi,
uwaꞌhi to manako,
to merorokoꞌ,
22to mebualosi,
to mebagiuꞌ,
hei to mowali mampopengaa to kodake.
Hawaꞌhi pangkororeina,
momaꞌani deleꞌ hei mohantambi deleꞌ,
mowahiꞌhi,
to mepomonawuꞌ
mampokokodeꞌhi,
hei hawaꞌhi hiniꞌ nipoturuꞌ.
23Lekiꞌ-lekiꞌna walia to kodake tiꞌo mehupaꞌ ka lalina toaꞌ. Tiꞌomo to mampomokomaꞌ toaꞌ i peꞌoꞌelena Pueꞌ Ala.”
Towoweꞌe to handoꞌio toYahudi mepoꞌohi pe hi Yesu
(Mat. 15:21-28)
24Uko katoꞌo, molaimohi hi Yesu hante topeguruNa ka woiꞌ Galilea nolou pe woiꞌ to dodungku i kota Tiru, hei kaliuꞌhi mekahi pe lali tambi. Tungkaihana hi Yesu hingkeꞌna hawaꞌi robahaꞌ toaꞌ kohupaꞌNe, angkana kohupaꞌNa tiꞌo hawaꞌi hohumbo niwowuni. 25-26I bolaꞌ tiꞌo, uwaꞌ haduo towoweꞌe. Anaꞌna towoweꞌe tiꞌo nopekahii lomoa. Kopahorinalu kareba kohupaꞌna hi Yesu, kaliuꞌ ako mangkohidupaꞌkiꞌI honiꞌi melingkotuꞌ i kapuꞌNa merapiꞌ sulungi, notiꞌi, “Pueꞌ, Ipopolaikiꞌa kaiaꞌ to mampekahi anaꞌka!” Towoweꞌe tiꞌo handoꞌio toYahudi, io toPenisia to ka woiꞌ Siria.
27Angkana nohoniꞌ hi Yesu, Notiꞌi, “HumeiꞌA duluna mosulungi oꞌanaꞌ. Hawaꞌi moromiꞌ moroa pangkana oꞌanaꞌ, honiꞌi nipaꞌaniki ahu.”#7:27 I lali pandiriꞌ hieꞌe, toYahudi nipandiriꞌ hibali oꞌanaꞌ, to handoꞌio toYahudi nirekeꞌhi hibali ahu. TungkaihaNa hawaꞌi mampokokeniꞌa towoweꞌe tiꞌo.
28Mehoniꞌ towoweꞌe tiꞌo, notiꞌi, “Tuꞌu mpololeke Pueꞌ, angkana ahu to uwaꞌ i luaꞌ meja kopangkaha, mangkahi woꞌo rupuꞌ pangkana oꞌanaꞌ to monawuꞌ ka womboꞌ meja.”
29KonohoriNalu lolitane tiꞌo, notiꞌi womo hi Yesu, “Mombaha ka pehoniꞌmu komarohone pepoꞌohimu. Mewaliꞌ mahuliꞌmoko, alaꞌ mesuwumoꞌi lomoa to mampekahi anaꞌmu.” 30Mahuliꞌmo mpuꞌu towoweꞌe tiꞌo. Hupaꞌ i tambina, noꞌokiꞌ anaꞌne toturu i koturuana, hei moꞌoriꞌmo alaꞌ lomoa to mekahi i anaꞌna tiꞌo mesuwumo.
Hi Yesu mampokoꞌoriꞌ toaꞌ to bonoꞌ hei hawaꞌi hohumbo mololita
31Uko katoꞌo, hi Yesu hante topeguruNa mampolihimohi kota Tiru mampololiu patengkaꞌra, hei mantuleliꞌhi ka kota Sido hante woiꞌ Dekapoli, nolou pe rano Galilea. 32I Dekapoli, uwaꞌ haduo toaꞌ tobebe. Toaꞌ tiꞌo bonoꞌ hei hawaꞌi hohumbo mowiharo. Io rokomi nolou pe hi Yesu hei roperapiꞌ hingkeꞌna Noperamaꞌi. 33Hi Yesu mampohida toaꞌ tiꞌo ka lumbura toaꞌ to woriꞌ, Koꞌukona Nopohohida, Nopopekahimo kororapuꞌNe pe lali tolinana toaꞌ to bonoꞌ tiꞌo. Honiꞌi meliku hei momonto woꞌo lilaꞌna toaꞌ tiꞌo. 34Uko tiꞌo, hi Yesu menoaꞌmo pe laniꞌ, moruiꞌ peꞌinohaꞌNa, alaꞌ komarimaNa, honiꞌi Notiꞌi, “Efata!” Palaihana Tebungkahimo! 35Pohorimo mpuꞌu toaꞌ tiꞌo, hei mololueꞌmo lilaꞌne. Moromiꞌmo pololitane. 36Uko tiꞌo, Noꞌopihi hi Yesu toaꞌ to woriꞌ hingkeꞌna inioꞌ ropololita pe himolu hapo to mewali. Angkana kehapohi Noꞌopi, kareba tiꞌo bateꞌna ropowutelu nturusi. 37Hokohi mpololeke toaꞌ to woriꞌ, rotiꞌi “Lekiꞌ-lekiꞌna to Nowali, moromiꞌ. Toaꞌ to bonoꞌ, pohorimo! Toaꞌ to hawaꞌi hohumbo mololita, mololitamohi!”#7:37 Waliana hi Yesu hieꞌe mampopebahaꞌ koꞌionamo Datu Topohompoꞌ to ropekau toYahudi. Yes. 29:18-19, 35:3-6, 42:6-7, 61:1.
Currently Selected:
Markus 7: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
