Matius 8
8
Hi Yesu mampokoꞌoriꞌ haduo tokusta
(Mrk. 1:40-45; Luk. 5:12-16)
1Koꞌukonalu hi Yesu mepoturuꞌ, Io mengkohou ka biri, hei woriꞌ toaꞌ metuntu pe Io. 2I tempo tiꞌo, hupaꞌmo haduo toaꞌ tokusta hei melingkotuꞌ i hinarona hi Yesu, notiꞌi, “Tua, ane hiniꞌKo, Ipokoꞌoriꞌa kaiaꞌ!”
3Mehoniꞌ Yesu, “HiniꞌluꞌA. Katoꞌo Noperoramamo hi Yesu toaꞌ tiꞌo hei notiꞌi, Moꞌoriꞌmoko!” Tempo tiꞌo, hakiꞌna kaliuꞌ moꞌoriꞌ. 4#Im. 14:1-12; Ul. 24:8Uko tiꞌo, notiꞌi womo hi Yesu pe io, “Inioꞌ dulu ilolitaꞌi pe hihimo hapo to mewali i ingko. Noloumoko dulu pe tadulako mpenomba, ipetidoꞌkimo wotama hingkeꞌna noꞌokiꞌi komoꞌoriꞌmamo, hei mampeweiko popenombamu motuntuni hawaꞌ to teꞌukiꞌ i lali Aturana hi Musa, hingkeꞌna mombaha i lekiꞌ-lekiꞌna toaꞌ komoꞌoriꞌmamo.”
Hawiꞌna tadulako surodadu toRoma nopokoꞌoriꞌ hi Yesu
(Luk. 7:1-10; Yoh. 4:46-53)
5Uko tiꞌo, hi Yesu nolou pe bolaꞌ Kapenau. PekahiNalu itoꞌo, hupaꞌ haduo tadulako surodadu toRoma mampohidupaꞌki hi Yesu hei merapiꞌ sulungi, 6notiꞌi, “Tua! Hawiꞌku turulu nturusi i tambi alaꞌ mohakiꞌi wute kohu hei maporiꞌ mpololeke nohori.”
7Notiꞌi hi Yesu, “Hingkiꞌ nolouꞌA mampokoꞌoriꞌi.”
8-9Nohoniꞌ tadulako surodadu tiꞌo, “Tua, hawaꞌa masipatoꞌ mantorimoKo i tambingku.#8:8 Motuntuni atura toYahudi, hawaꞌhi wadi mohintuwuꞌ hante toaꞌ to handoꞌio toYahudi. Alaꞌ ropokomaꞌi. Angkana kehapoꞌi Itiꞌiluꞌi hamokuꞌ lolita, hawiꞌku tiꞌo bateꞌna hingkiꞌ moꞌoriꞌ. Aku haduo tadulako surodadu. Uwaꞌ to i wowomboꞌka, hei uwaꞌhi woꞌo to i wowoiꞌku. Ane rapaꞌna kupohawaꞌkiꞌi haduo surodadu, kutiꞌiki, ‘Nolouko!’ Bateꞌna nolou. Ane kuwowoiꞌi surodadu to ntaniꞌna, ‘Humeiko!’ Bateꞌna humei. Ane kutiꞌiki hawiꞌku, ‘Iwali tiꞌo!’ bateꞌna nowali. Hatoꞌo woꞌo kokupoꞌohine kuasaꞌne lolitaMu.”
10Hoko hi Yesu pahori lolitana tadulako surodadu tiꞌo. Iomo horiana mehahiliꞌ pe toaꞌ to metuntu i Io, Notiꞌi, “Tuꞌu to Kutiꞌikikei, i lumbumi toSaraeli, handoaꞌi tene uwaꞌ ka Kuhua howeꞌ haduo to maroho pepoꞌohine hibali pepoꞌohina toaꞌ hieꞌe to handoꞌio toSaraeli.
11Mewaliꞌ, hingkeꞌna ibahaꞌkei: woriꞌ toaꞌ to handoꞌio toYahudi hingkiꞌ mewali toaꞌna Pueꞌ Ala. Hingkiꞌ hupaꞌhi ka humanele duniaꞌ, mahurahi hei mangka i komotanaꞌ-tanaꞌ i lali kodatuana Pueꞌ Ala moꞌawa hante hi Burahima, hi Isaki hei hi Akoꞌ. 12Kotuꞌuana, ingkei wae toSaraeli to masipatoꞌ mewali toaꞌna Pueꞌ Ala i lali kodatuaNa. Angkana ingkei to hingkiꞌ nitube pe lali peꞌohaꞌa to mokorindi mpololeke, moꞌela ka Pueꞌ Ala. Itoꞌo, hingkiꞌ meꞌolakei hei maporiꞌ ihorikei.” 13Uko tiꞌo, notiꞌi hi Yesu pe tadulako surodadu tiꞌo, “Mahuliꞌmoko, alaꞌ hapo to ipoꞌohi, bateꞌna hingkiꞌ mewali.” Tempo tiꞌo woꞌo, moꞌoriꞌmo mpuꞌu hawiꞌne to kolentuꞌana mohakiꞌ i tambina.
Ponianana hi Peturuꞌ nopokoꞌoriꞌ hi Yesu
(Mrk. 1:29-34; Luk. 4:38-41)
14Uko tiꞌo, hi Yesu nolou pe tambina hi Peturuꞌ. Itoꞌo, Noꞌokiꞌ ponianane hi Peturuꞌ towoweꞌe turu alaꞌ mohakiꞌi hoholeꞌ. 15Konotikonalu hi Yesu korawene towoweꞌe tiꞌo, kaliuꞌ moꞌoriꞌ. Katoꞌo, io meꞌaromo honiꞌi mampatimomoki pangkana hi Yesu.
Woriꞌ toaꞌ to nopokoꞌoriꞌ hi Yesu
16Ikopentoriꞌnalu ando, woriꞌ toaꞌ nolou pe hi Yesu mangkomi to mohakiꞌ hante to nopekahii tokodake. Hi Yesu mampopolai tokodakehi tiꞌo moliu lolitaNa, hei lekiꞌna toaꞌ to mohakiꞌ Nopokoꞌoriꞌhi woꞌo. 17Lekiꞌ-lekiꞌna to nowali hi Yesu hieꞌe mobuhoꞌi lolitana nabi Yesaia hampiha to mantiꞌi:
“Iomo to malentu komoledeꞌta hei mampokoꞌoriꞌ hakiꞌta.” (Yes. 53:4)
Toaꞌ to mangkodokoꞌi metuntu pe hi Yesu
(Luk. 9:57-62)
18Hampiha tempo, toaꞌ woriꞌ motuleliꞌi hi Yesu. Konoꞌokiꞌnalu hi Yesu woriꞌ toaꞌ motuleliꞌiꞌI, Norumbaꞌmohi topeguruNe mewute nolou tinaꞌ i hanupe rano. 19Angkana hupaꞌmo haduo guru agama toYahudi, mampatiꞌiki hi Yesu, “Guru, pe imbo koꞌakoaMu, tolouꞌa woꞌo metuntu!”
20Notiꞌi hi Yesu, “Serigala uwaꞌ woloꞌ peꞌohaꞌare, hei tinti uwaꞌ horare, angkana Anaꞌ Manusiaꞌ, hawaꞌi uwaꞌ tambi peꞌohaꞌaNe.”
21Uko tiꞌo, uwaꞌ woꞌo haduo toaꞌ to metuntu pe Io to mantiꞌi, “Pueꞌ, Ipoliuꞌa dulu nolou motawu umoꞌku.”
22 #
Luk. 15:24, 32; Eps. 2:1 Angkana notiꞌi hi Yesu pe io, “Tedehimohi to mahi morewahi hangko tomahira. Angkana Ingko, metuntumoko Aku!”
Hi Yesu mampopeꞌohaꞌ mata mparowo
(Mrk. 4:35-41; Luk. 8:22-25)
23Katoꞌo mehendeꞌmo hi Yesu hante topeguruNahi pe lali duanga, honiꞌi molaimohi meduanga mewute i rano Galilea. 24Hangkaꞌ-hangkaꞌ romo mata mparowo to makaja i rano, horiana duangara hingkiꞌ mentoriꞌ alaꞌ norumpahi balumba. I tempo tiꞌo, hi Yesu kolentuꞌana leꞌo. 25TopeguruNahi moluke hi Yesu rotiꞌi, “Pueꞌ! Sulungika! Hingkiꞌ horewuꞌki!”
26Hi Yesu mampatiꞌikihi, “Ingkei to mororangko pepoꞌohimi. Mahamporeꞌi hinaꞌ morokaꞌkei?” Meꞌaromo hi Yesu honiꞌi mokamoroki parowo hante balumba tiꞌo. Kaliuꞌ lebaꞌ mpololeke rano tiꞌo.
27Ropolemenia topeguruNa, hei rotiꞌi, “Hihimoreꞌito toaꞌ hieꞌe? Hingkoweꞌ parowo hante balumba motuntuni hawaꞌNa!”
Hi Yesu mampokoꞌoriꞌ roduo toaꞌ to nopekahii tokodake
(Mrk. 5:1-20; Luk. 8:26-39)
28Wutemo hi Yesu hante topeguruNahi i hanupe rano i woiꞌ Gadara. Itoꞌo uwaꞌ meroduo toaꞌ to nopekahii tokodake, meꞌohaꞌhi i petowua. Molaihi ka petowua tiꞌo, ako mampohidupaꞌkihi hi Yesu. Toaꞌ to roduo tiꞌo mekororokaꞌihi mpololeke, iomo horiana hamboaꞌmo uwaꞌ toaꞌ to podehoꞌ moliu itoꞌo. 29Moloaꞌ-loaꞌhi toaꞌ to roduo tiꞌo, rotiꞌi, “AnaꞌNa Pueꞌ Ala! Hingkiꞌ Ipohampoka? Ba hingkiꞌ Ipoperima-rimaka, kehapoꞌi handoaꞌi tene hupaꞌ tempone Ando Pobutusi?”
30Hawaꞌi moꞌela katoꞌo, uwaꞌhi boeꞌ to morombonga kolentuꞌara mahuge. 31Tokodake to mekahi i toaꞌ tiꞌo merapiꞌ pe Yesu, rotiꞌi, “Ane Ipopolaika kaseꞌe, Ipopekahika pe boeꞌ to woriꞌ tiꞌo.”
32Notiꞌi hi Yesu, “Toloumokei!” Molaimohi mpuꞌu tokodake tiꞌo, hei mekahihi pe boeꞌ. Boeꞌ tiꞌo mehilaihi wute i tua to i bota rano hei monawuꞌhi i tua pe uwai horiana mahihi podu.
33Toaꞌ to mampoꞌodaꞌ boeꞌ tiꞌo pangkiꞌ hapo to pewali i boeꞌra hei hapo to pewali i toaꞌ to nopekahii tokodake tiꞌo. Mehilaimohi nolou pe bolaꞌ mampowute lekiꞌ-lekiꞌna to mewali. 34Iomo horiana tumpu bolaꞌ nolouhi mangkohidupaꞌki hi Yesu. Roperapiꞌ mpololeke hingkeꞌna molaiꞌI ka woiꞌra.
Currently Selected:
Matius 8: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
