Pewaliana 47
47
Hi Akoꞌ nolou mehinaro pe datu Masiri
1-2Katoꞌo hi Yusuf mangkomi limo duo ka halalinehi ako mehinaro pe datu. Notiꞌi, “Umoꞌku hei halali-halalingkuhi mehupaꞌmohi ka Kanaꞌa hante lekiꞌna bekeꞌ, gimba, gapiꞌ hei lekina lumara. Hinewowoꞌena uwaꞌmohi i woiꞌ Gose.”
3Datu meꞌitano pe halali-halalinahi hi Yusuf, “Hapo jamamio?”
Mehoniꞌhi, “Ingka hieꞌe topolambaꞌka hibali tododulungki. 4Kohupaꞌki humeika lebaꞌ i woiꞌ hieꞌe, alaꞌ i woiꞌ Kanaꞌa kobilora makaja, horiana hamboaꞌmo uwaꞌ kora to noꞌoka bekeꞌ hante gimba. Ane ipoꞌioꞌi datu, hingkiꞌ meꞌohaꞌka i woiꞌ Gose.” 5Katoꞌo notiꞌi datu pe hi Yusuf, “Hinewowoꞌena umoꞌmu hante halali-halalimu uwaꞌmohi i hieꞌe. 6Ipohibalimo woiꞌ Masiri hieꞌe hibali woiꞌmu hadoduomu. Ipotedehimohi lebaꞌ i woiꞌ Gose, woiꞌ to moromiꞌ mpololeke i woiꞌ hieꞌe. Hei ane uwaꞌi i lumbura toaꞌ to nipoꞌohi hei matikaꞌ, irumbaꞌmohi hingkeꞌna molambaꞌhi woꞌo pinatuwuꞌku.” 7Hi Yusuf woꞌo mampopebahaꞌ umoꞌna pe datu. Katoꞌo hi Akoꞌ mobarakati datu, 8hei datu meꞌitano pe io, “Haꞌumbomo tinuwuꞌma umoꞌ?” 9Mehoniꞌ hi Akoꞌ “Aku tuwuꞌa 130 ntoꞌa mewaliꞌa topolilo. Kotuwuꞌku buhaꞌ komaporiꞌ hante tinuwuꞌku hangkokotu ane topohibobaliꞌi hante kotuwuꞌna tododulungki topolilo.” 10Uko tiꞌo hi Akoꞌ mesabiꞌmo hingkeꞌna ropokaꞌamo hei noperapiꞌ pe Pueꞌ mobarakati datu, 11uko katoꞌo, hi Yusuf mosulungi umoꞌna hei halali-halalinahi nopopeꞌohaꞌ i woiꞌ Masiri, nopaꞌanimohi woiꞌ to molompoꞌ mpololeke mewali dolaꞌra dodungku i bolaꞌ Ramese, hintotoꞌ hante parentana datu. 12Hei hi Yusuf mampatimomokihi lekiꞌna kopongkonana umoꞌna hei halalinahi wute i anaꞌ-anaꞌra.
Tempo kobiloraha
13Kobilora tiꞌo monono mpololeke, horiana i imbo-imbo hamboaꞌmo uwaꞌ kopongkona. Toaꞌ toMasiri hei toaꞌ toKanaꞌa molaumohi ala kobiloraha. 14I piha-pihana toaꞌ to mehili Kina, hi Yusuf morampu doiꞌ hilina kina honiꞌi noporia i tambi kodatuana Pirao. 15Ukomo doiꞌne toMasiri hante toKanaꞌa, katoꞌo hupaꞌmo toMasiri pe hi Yusuf hei rotiꞌi, “Ipaꞌanika wongkenaꞌ pangkaki! Hawaꞌka ipotedehi mahi. Alaꞌ doiꞌki ukomo.” 16Mehoniꞌ hi Yusuf, “Ane ukomoꞌi doiꞌmi, ipaꞌaniꞌakei pinatuwuꞌmi, hingkeꞌna kupaꞌanikei kopongkonami.” 17Katoꞌo pinatuwuꞌra ropeweimo mpuꞌu pe hi Yusuf ropopotopu kopongkonara hingkeꞌna hi Yusuf mampaꞌanihi kopongkonara topuna, nara, bekeꞌ, gapiꞌ hei kalide. Noꞌuwaꞌ ropotuwuꞌ i lalina hantoꞌa. 18I korontoꞌana mehupaꞌ womohi pe io hei mantiꞌi, “Hamboaꞌmo kiwowuni pe tua koꞌukone doiꞌki hei pinatuwuꞌki iꞌompui. Hamboaꞌmo uwaꞌ hapo-hapongki to hohumbo kipewei pe tua, ukona wotangki hadoduongki hei woiꞌki. 19Hawaꞌka ipotedehi mahi! Hei inioꞌ ipotedehiꞌi kineteꞌkio hawaꞌi tetudoꞌi. Wotangki hei woiꞌki ihilimo hante kina. Ingka hei woiꞌki kipeweimo mewaliꞌ hawiꞌna datu. Ipaꞌanimoka kina hingkeꞌna moꞌumpuꞌi tuwuꞌki hei tinudaꞌ to hingkiꞌ kihawori i kineteꞌki!” 20Katoꞌo hi Yusuf mehili lekiꞌna woiꞌ i Masiri mewali woiꞌna datu. Nokomi komakajana kobilora tiꞌo, lekiꞌna toMasiri mampobaluꞌmohi woiꞌra pe io. Watoꞌomola lalane Pirao moꞌompui lekiꞌna woiꞌ Masiri. 21Lekiꞌra toaꞌ toMasiri mewali hawiꞌna hi Yusuf i Masiri. 22Woiꞌna romo tadulako mpenomba to hawaꞌi nohili hi Yusuf, alaꞌ koparaluara hante kopongkonara nopatimomokihi datu. Io hinaꞌ hawaꞌhi paralu mampobaluꞌ woiꞌra. 23Notiꞌi hi Yusuf pe toaꞌ to woriꞌ tiꞌohi, “Elekei, ingkei hei woiꞌmi kuhilikimo datu. Hieꞌemo tinudaꞌmio hingkeꞌna ihaworikei i kineteꞌmi. 24I tempomi mekina, hangangaa dolaꞌ limona ipepaꞌanikikei pe datu. Pelobiana iomo to iꞌokakei hantino hei iwalikei tinudaꞌmi.” 25Mehoniꞌhi, “Moꞌawerasiꞌka alaꞌ iposalamaꞌka. Hinamoie mewalika hawiꞌna datu.” 26Uko tiꞌo nowalimo hi Yusuf atura i woiꞌ Masiri, iomo dolaꞌ limona ka paꞌintuꞌra hangangaa mewaliꞌ dolaꞌna datu. Wute hinewowoꞌena atura tiꞌo ropopatengkaꞌ tene. Woiꞌna romo tadulako mpenomba to hawaꞌi mewali dolaꞌna datu.
Perapiꞌna hi Akoꞌ ikoꞌukuana
27Katoꞌo lebaꞌmohi toSaraelihio i woiꞌ Masiri, i woiꞌ Gose. Iohi mewalimohi sugiꞌ hei moꞌanaꞌ-anaꞌmohi wute memuleꞌmohi itoꞌo. 28Hi Akoꞌ tuwuꞌ tene hampuluꞌ pitu ntoꞌa i woiꞌ Masiri, wute tinuwuꞌna 147 pitu ntoꞌa. 29Katoꞌo dodungkumo tempone hingkiꞌ mahi, mowowoimo hi Yusuf anaꞌna, hei notiꞌi pe io, “Luleꞌi korawema i kohelaꞌna paꞌangku hei mosumpako, hawaꞌa hingkiꞌ itawu i woiꞌ Masiri hieꞌe, 30alaꞌ aku dokoꞌa lebaꞌ moꞌawa-awa hante tododulungku. Io horiana ikomi wotalokaꞌka intu kaseꞌe hei itawu i lali petowuara.” Katoꞌo mehoniꞌ hi Yusuf, “Umoꞌ hingkiꞌ kuwali, hapo to itiꞌikiꞌa.” 31Notiꞌi hi Akoꞌ, “Mosumpako pe aku.” Katoꞌo mosumpamo mpuꞌu hi Yusuf pe io. Katoꞌo melingkotuꞌmo hi Akoꞌ i tinaꞌ petutuꞌana, menomba pe Pueꞌ Ala.
Currently Selected:
Pewaliana 47: LAILJE
Highlight
Share
Compare
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
