Pewaliana 37
37
Hi Yusuf hante halali-halalinahi
1Hi Akoꞌ meꞌohaꞌ lebaꞌ i woiꞌ Kanaꞌa, i peꞌohaꞌana umoꞌna. 2Hieꞌemo lolita muleꞌna hi Akoꞌ.
I tempona hi Yusuf, anaꞌna hi Akoꞌ, moꞌumuruꞌ hampuluꞌ pitu ntoꞌa, io molambaꞌ bekeꞌ hante gimba, moꞌawa-awa hante kokaꞌnahi, iomo anaꞌna hi Bilaꞌ hante hi Silipaꞌ to noropaꞌhi hi Akoꞌ. Hi Yusuf morapoꞌ waliana kokaꞌnahi to kodake pe umoꞌra.
3Hi Akoꞌ mampotundeꞌ hi Yusuf ka halalinahi, alaꞌ io to nipoꞌanaꞌki i komotodiana umoꞌna hei iomo horiana nipowaliki baduꞌ to maranga mpololeke. 4Roꞌele hi Yusuf nipototundeꞌ ntaniꞌ ka iohi, katoꞌo mowahiꞌhi pe hi Yusuf, iomo horiana mololitahi kahohurua pe io.
5I tempo wini hi Yusuf mepototuru, hei pototuruna tiꞌo nololitaki halalinahi, katoꞌo pedeꞌ liuka womo korokabiriꞌne hi Yusuf. 6Notiꞌi, “Ipehoromuakei hingkeꞌna kulolitaꞌi pepototurungka. 7Waheꞌe pepototurungka ingkiꞌ lekiꞌta kolentuꞌanta i kineteꞌ mohiluꞌ kina, katoꞌo kinangku metotiꞌi mononto, katoꞌo kinami metotiꞌi motuleliꞌi kinangku hei menomba pe kinangku.”
8Notiꞌi halalinehi pe hi Yusuf, “Kodokoꞌmuluto mewali datu to makuasaꞌ pe ingka!” Mepongka katoꞌo halalina pedeꞌ mowahiꞌ lekemohi pe io alaꞌ pepototuruna to nololita. 9Katoꞌo hi Yusuf mepototuru womo, hei nololitaki womo pe halalinahi notiꞌi, “Mepototuru womoꞌa. Kuꞌokiꞌ ando, hante wula hei hampuluꞌ isaꞌ betueꞌ menomba pe aku.”
10Pepototuruna tiꞌo nololitaki woꞌo umoꞌna, katoꞌo umoꞌna mokamoroki hante notiꞌi, “Pepototuru hapohi woꞌoto? Pekirimu, aku hante inoꞌmu hei halalimuhi hingkiꞌ melingkotuꞌ hei menomba pe ingko?” 11Mowahiꞌhi mpololeke halalinehi pe hi Yusuf, angkana umoꞌra mampoꞌilali pototuruna hi Yusuf tiꞌo.
Hi Yusuf nibaluꞌ hei nikomi pe woiꞌ Masiri.
12I hampiha tempo kokaꞌnehi hi Yusuf nolouhi molambaꞌ bekeꞌ hante gimbana umoꞌra dodungku bolaꞌ Sike. 13Notiꞌi hi Akoꞌ pe hi Yusuf, “Noloumoko pe kokaꞌmuhi to molambaꞌhi bekeꞌ hante gimba dodungku i Sike.”
Hi Yusuf mehoniꞌ, “Ioꞌ, umoꞌ.” 14Notiꞌi umoꞌne, “Nolouko mampeꞌele kokaꞌmuhi, bekeꞌ hante gimbara, honiꞌi mahuliꞌko humei, mampetiꞌiki koꞌuwaꞌara.” Noloumo mpuꞌu hi Yusuf mampolihi ngamba Herebo.
Matengkaꞌmo hi Yusuf wute i bolaꞌ Sike. 15Kolentuꞌana matengkaꞌ nolou humei i popada, mampohidupaꞌki haduo toaꞌ tomaꞌani to meꞌitano pe io, “Ehapo to ipaliꞌo?”
16Mehoniꞌ hi Yusuf, “Aku mampaliꞌa halalingkuhi to molambaꞌ bekeꞌ hante gimba iseꞌe, ibahaꞌ ba i imbohi?”
17Notiꞌi toaꞌ tiꞌo, “Iohi molai ka seꞌe. Kuhori rotiꞌi hingkiꞌ nolouhi pe Dota.” Katoꞌo noloumo hi Yusuf motuntuni kokaꞌnahi hei nohuamohi mpuꞌu i Dota.
18Ka moꞌela roꞌokiꞌmo hi Yusuf, handoaꞌi tene hupaꞌ pe iohi, hampekokirimohi halalinehio hingkiꞌ morokoꞌi. 19Rotiꞌi haduo hei haduo, “Elekei to poko mepototuru mehupaꞌmo. 20Hohumbo ane torokoꞌmoꞌi? Honiꞌi toꞌonoꞌaki wotalokaꞌne pe lali woloꞌ bubu to mobanimo. Hei totiꞌi intu nojangku pinatuwuꞌ to meꞌoꞌoka. Hei toꞌele pewaliane intu pototuruna.”
21Hi Rube pahori pangkoliwora tiꞌo, honiꞌi io magega hingkiꞌ mamperorui hi Yusuf hante notiꞌi, “Inioꞌiae torokoꞌi! 22Tonowuꞌaki wae pe woloꞌ bubu to uwaꞌ i popada hieꞌe. Angkana anioꞌ tokondo ba tobeloi wotane.” I tempo tiꞌo, notiꞌi hi Rube alaꞌ pekirina hingkiꞌ mamposalamaꞌ hi Yusuf honiꞌi nokomi mahuliꞌ pe umoꞌra. 23Ikohupaꞌnalu hi Yusuf i halalinahi, liu rohokiꞌ hante rowula baduꞌne to manobaꞌ. 24Honiꞌi roruiꞌ ako ronowuꞌaki pe woloꞌ bubu to mobanimo. 25Uko tiꞌo mahuramohi mangka, ikolentuꞌara mangka roꞌokiꞌ toaꞌ toSumaeli to mobaluꞌ-baluꞌ, to ka Media kolentuꞌara matengkaꞌ ka Gilea pe Masiri. Untara ropopatekeꞌi dupaꞌ hante rampa-rampa to masuliꞌ. 26Notiꞌi hi Yehuda pe halalinahi, “Ehapo dumbuꞌne mokondoki hineeꞌta honiꞌi hawaꞌi totiꞌi-tiꞌi koꞌingkiꞌne morokoꞌi? 27Aginamo topobaluꞌ pe toSumaeli. Anioꞌi topokolalo alaꞌ io hineeꞌta.” Halalinahi mampoꞌioꞌ lolita tiꞌo. 28I kolentuꞌana moliu topobaluꞌ-baluꞌ tiꞌo, hi Yusuf roꞌoreꞌ ka bubu, honiꞌi ropobaluꞌ pe topobaluꞌ-baluꞌ tiꞌo hante hilina rompuluꞌ doiꞌ peraꞌ, katoꞌo hi Yusuf nokomi topobaluꞌ-baluꞌ tiꞌo pe Masiri.
29Hi Rube hawaꞌi nobahaꞌ korobaluꞌne hineeꞌra. Ipahuliꞌna hi Rube, liu ako mampepanto woloꞌ bubu, noꞌele hi Yusuf himboaꞌmo uwaꞌ itoꞌo. Katoꞌo nohepaꞌ-hepaꞌ baduꞌne alaꞌ hanondoihaꞌi. 30Io mahuliꞌ pe halalinahi hei mantiꞌi, “Hi Yusuf hamboaꞌmo uwaꞌ i lali bubu! Hapo to hingkiꞌ kupoꞌintuꞌa hinewowoꞌena?”
31Katoꞌo morokoꞌhi hambaꞌa bekeꞌ hei raꞌana ropolomiꞌi baduꞌna hi Yusuf. 32Uko tiꞌo baduꞌna to mokoraꞌa rokomi pe umoꞌra hante rotiꞌi, “Baduꞌ hieꞌe kihua. Iparesaꞌ ba baduꞌnaꞌi hi Yusuf anaꞌmu?”
33Ikonoparesaꞌnalu hi Akoꞌ baduꞌ tiꞌo io mantiꞌi, “Tuꞌu baduꞌ hieꞌe baduꞌna anaꞌku. Matantumo anaꞌku nojangku pinatuwuꞌ to meꞌoꞌoka hei noꞌoka.” 34Hi Akoꞌ mohepaꞌ-hepaꞌ baduꞌna alaꞌ hanondoihaꞌi, hante mopakeꞌ baduꞌ mperorima, haꞌumbora ando komoruene io handondoiha mamponindi anaꞌna. 35Lekiꞌna anaꞌna tomaꞌani hante towoweꞌe mehupaꞌ mampododoli lalina umoꞌra, angkana io hawaꞌi hiniꞌ nipododoli hei notiꞌi, “Wuteꞌa mahi tontona kupohanondoiha alaꞌ anaꞌku hi Yusuf.” Watoꞌomo hi Yusuf nopeꞌoloni umoꞌna.
36Kolentuꞌana tiꞌo, hupaꞌmohi toMedia i woiꞌ Masiri, hi Yusuf liu ropobaluꞌ pe Potipar tadulako to mampoꞌodaꞌ tambi kodatuana Pirao.
Currently Selected:
Pewaliana 37: LAILJE
Highlight
Share
Compare
Copy
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
