Galatia 1
1
Tabea
1-2Suraꞌ hieꞌe ka aku hi Paulu, surona Pueꞌ Yesu. Kupokatu suraꞌ hieꞌe pe ingkei lekiꞌ-lekiꞌmi jumaꞌa-jumaꞌa i Galatia. Aku hante lekiꞌ-lekiꞌna halali hampepoꞌohingku to uwaꞌ iseꞌe mampowuteka tabeangki!
Hingkeꞌna ibahaꞌkei halali-halali, handoꞌio toaꞌ to morumbaꞌa, hei handoꞌio woꞌo toaꞌ to moꞌuwiꞌa mewali suro, angkana hi Yesu Kerisitu hante Pueꞌ Ala Umoꞌta to mampotuwuꞌ huliꞌ hi Yesu ka komahia, to moꞌuwiꞌa mewali suroNa.
3Mekokaeꞌa pe Pueꞌ Ala Umoꞌta hante pe Pueꞌta Yesu Kerisitu hingkeꞌna Nobarakatikei hei mampaꞌanikei Romiꞌ Ngkotuwuꞌ. 4Nokomi komadosanta, Pueꞌ Yesu mampewei wotaNa nirokoꞌ hingkeꞌna tepohenteki ka kuasaꞌ duniaꞌ to kodake hieꞌe. Nowali hatoꞌo alaꞌ tiꞌomo peleihane Pueꞌ Ala Umoꞌta. 5Topokodeꞌ Pueꞌ Ala wute nantolou-louna. Amin.
Hi Paulu mokamoroki toGalatia alaꞌ hamboaꞌmohi motuntuni Kareba Moromiꞌ
6Kupowuli mpololeke, halali-halali! Handoaꞌkei tene morue nowowoi Pueꞌ Ala alaꞌ kopopuhiꞌna lalina Kerisitu hingkeꞌna mampoꞌohikei Kareba Moromiꞌ, angkana hinewowoꞌena tewolihimo hamboaꞌmokei mengkoruꞌ pe Pueꞌ Ala, wuliha motuntunikei poturuꞌ to ntaniꞌna to rotiꞌi toaꞌ “Kareba Moromiꞌ” woꞌo. 7Tiꞌo handoꞌio kareba moromiꞌ, alaꞌ mehupaꞌhi i lumbumi mampowulilukei moliu poturuꞌra to salaꞌ. Rokodokoꞌi mowolihi Kareba Moromiꞌ noniuꞌ i Kerisitu. 8Angkana kutiꞌikikei, hihimolu to mampowute kareba moromiꞌ to mosisalaꞌ hante Kareba Moromiꞌ to kipowutekimokikei, bateꞌna nohukuhi Pueꞌ Ala! Howeꞌlu ingka hante malaꞌeka ka suruga, bateꞌki nohuku Pueꞌ Ala! 9Kitiꞌikimokikei hampiha i tempoki tene moꞌawa-awa hante ingkei, hei hinewowoꞌena kutiꞌikikei womo hampiha: ane uwaꞌ toaꞌ to mampowute kareba moromiꞌ to mosisalaꞌ hante to itorimomokei, bateꞌna nohukuhi Pueꞌ Ala!
10Mewaliꞌ, halali-halali! Uwaꞌ to mantiꞌi hingkeꞌnalu noperenakiꞌa toaꞌ, hantaro kotuꞌuana, to kukodokoꞌi pepokodeꞌ ka Pueꞌ Ala. Uwaꞌ woꞌo to mantiꞌi hingkeꞌna mampomotanaꞌluꞌa lalira toaꞌ. Angkana ane tiꞌo peleihangka, palaihana, aku hieꞌe handoꞌio hawiꞌna Kerisitu.
Hi Paulu mantorimo Kareba Moromiꞌ ka Pueꞌ Yesu
11Hingkeꞌ ibahaꞌkei halali-halali, Kareba Moromiꞌ to kukomi handoꞌio ka pekirina toaꞌ. 12Kareba Moromiꞌ tiꞌo, hawaꞌi kutorimo ka toaꞌ, hawaꞌi woꞌo uwaꞌ toaꞌ to mampoturuꞌkiꞌa, angkana hi Yesu Kerisitu hadoduona to mampokononto Kareba Moromiꞌ tiꞌo pe aku.
13-14 #
Sur. 9:1-2
Ibahaꞌkei halali-halali, hohumbo kotuwuꞌka hampiha ikopetuntuku agama Yahudi. Wori' mpololeke awangka to motuntuni agama Yahudi, angkana akumo to maroho mpololeke metuntu i lekiꞌ-lekiꞌna atura agama, alaꞌ ka lalingku mpololeke mampetuntui adaꞌra tododulungkuhi.#1:13 Ikohandoaꞌanaꞌ tene mepoꞌohi pe Kerisitu, hi Paulu iomo haduo toParisi. Basa Sur. 22:3, 23:6. Hei i tempo tiꞌo kupoperima-rimahi lekiꞌ-lekiꞌne toaꞌna Pueꞌ Ala, alaꞌ kukodokoꞌihi kuporopuꞌ.
15-16Angkana i tempo tiꞌo, Pueꞌ Ala mampokonontokiꞌa kohihimona AnaꞌNe, hingkeꞌna kupowute kareba noniuꞌ i AnaꞌNa tiꞌo pe toaꞌ to handoꞌiohi toYahudi, alaꞌ Pueꞌ Ala moꞌuwiꞌa ikohandoaꞌangku tene nipoꞌanaꞌki. Alaꞌ kopopuhiꞌna lalina Nowowoimoꞌa mewali suroNa i tempo to Nopokonontomo. IkoNowowoingku, hawaꞌi uwaꞌ toaꞌ to mampoturuꞌa. 17Hawaꞌa woꞌo nolou pe kota Yerusale meguru pe iohi to medulumohi mewali surona Pueꞌ Yesu, angkana nolouꞌa dulu pe woiꞌ Arab, honiꞌi mahuliꞌa nolou pe kota Damasi.
18 #
Sur. 9:26-28
Tolu ntoꞌa katoꞌo, honiꞌa nolou pe Yerusale hingkeꞌna mampohidupaꞌkiꞌa hi Peturuꞌ. Meꞌohaꞌa moꞌawa hante io hampuluꞌ limo ando. 19Tempo tiꞌo, kupohidupaꞌki woꞌo hi Yakobus hineeꞌna Pueꞌ Yesu.#1:19 hi Yakobus hineeꞌna Pueꞌ Yesu Basa Mat. 13:55; Mrk. 6:3. Hi Yakobus tiꞌo mewali tadulakora toSarani i Yerusale uko komahina hi Yakobus topeguruna hi Yesu. Basa Sur. 12:2, 17, 15:13, 21:18; Gal. 2:9, 12. Angkana surona Pueꞌ Yesu to ntaniꞌna, hawaꞌhi kupohidupaꞌki. To roduolu tiꞌo to kupohidupaꞌki. 20Hapo to kuꞌukiꞌ hieꞌe bateꞌna tuꞌu. Pueꞌ Ala to pobahaꞌ lalingku! 21Katoꞌo, nolouꞌa pe woiꞌ Siria hante woiꞌ Kilikia. 22Kolentuꞌangku inoꞌo hawaꞌa kahampiha nolou pe woiꞌ Yudea; iomo hinaꞌ toSarani i jumaꞌa-jumaꞌa tiꞌo handoaꞌi tene kahampiha kiꞌokiꞌ. 23Pahoriluhi lolitana awara to mantiꞌi, “Hampiha io mampoperima-rimaka hei hingkiꞌ mamporopuꞌ to mepoꞌohi pe Kerisitu. Angkana hinewowoꞌena io mampowutemo hapo to kipoꞌohi hampiha.” 24Iomo hinaꞌ mampokodeꞌmohi Pueꞌ Ala, alaꞌ pahorihi hapo to mewali i aku.
Currently Selected:
Galatia 1: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
