Epesu 1
1
Suraꞌna hi Paulu Pe jumaꞌa Epesu
1Suraꞌ hieꞌe ka aku, hi Paulu surona Yesu Kerisitu, motuntuni peleihana Pueꞌ Ala. Hei suraꞌ hieꞌe kupokatu pe ingkei toaꞌna Pueꞌ Ala to uwaꞌ i kota Epesu to tungkuꞌ pe Yesu Kerisitu. 2Tabea ka aku! Mekokaeꞌa hingkeꞌna Pueꞌ Ala Umoꞌta hante Pueꞌ Yesu Kerisitu mobarakatikei hei mampaꞌanikei Romiꞌ Ngkotuwuꞌ.
Pueꞌ Ala mobarakatiki alaꞌ petuntuta pe hi Yesu Kerisitu
3Topokodeꞌmo Pueꞌ Ala, Umoꞌna Pueꞌta Yesu Kerisitu,
alaꞌ Nobarakatiki hante lekiꞌ-lekiꞌna pebarakati to moromiꞌ ka suruga
nokomi pohaꞌanunta hante Kerisitu.
4Pebarakati tiꞌo waheꞌe: mepongka handoaꞌi tene Nowali duniaꞌ hieꞌe,
Noꞌuwiꞌmoki hingkeꞌna mohaꞌanuki hante Kerisitu,
horiana mewaliki toaꞌNa to mangkolehi
hei hawaꞌi uwaꞌ salaꞌte i pampeꞌeleNa.
5 #
Rm. 8:29-30; 1Ptr. 1:1-2 Alaꞌ komarimana pe ingkiꞌ,
ka uluꞌ-uluꞌna
Nopokonontomo umbiꞌ
hingkiꞌ Noꞌuwiꞌki mewali anaꞌNa
moliu Yesu Kerisitu.
Nowali hatoꞌo alaꞌ tiꞌomo tungkaihane,
hei tiꞌo to Nopomotanaꞌ.
6Iomo horiana masipatoꞌ mpololeke Pueꞌ Ala topokodeꞌ,
alaꞌ kopopuhiꞌna laliNa pe ingkiꞌ,
moliu hapo to nowali hi Yesu,
anaꞌNa to Nopokarima.
7Alaꞌ kopopuhiꞌna lalina Pueꞌ Ala pe ingkiꞌ,
Nohompoꞌmoki ka pehuku dosanta,
hei Noꞌampunimoki ka dosanta
moliu komahina hi Yesu.
8KomarimaNa pe ingkiꞌ
hawaꞌi mokoꞌukoa,
hante kopebahaꞌ to Nopaꞌanikiki.
9-10 #
Kol. 1:16-18
Motuntuni peleihaNa,
Noponobahaꞌimoki tungkaihaNa to moruemo tewuni.
Tungkaihana tiꞌo hingkeꞌna hinangkana to uwaꞌ,
moromiꞌ to i suruga moromiꞌ to i duniaꞌ
hingkiꞌ Nopohaꞌanu,
hei Kerisitu hingkiꞌ moparentai hinangkana.
Pueꞌ Ala mampokononto tungkaihaNa
to hingkiꞌ Nobuhoꞌi moliu Kerisitu,
hei tungkaihaNa tiꞌo bateꞌna hingkiꞌ Nopopewali
ane hupaꞌmoꞌi tempone.
11Pueꞌ Ala mowali lekiꞌ-lekiꞌna tiꞌo
motuntuni peleihaNa hei pobutusiNa hadoduoNa.
Noꞌuwiꞌmoki
hei Nopokononto koꞌingkiꞌnemo to mewali toaꞌNe
alaꞌ pohaꞌanunta hante Kerisitu.
12Nowali hatoꞌo
hingkeꞌna ingka toYahudi
to uluꞌ-uluꞌna mohinaru pe Kerisitu
mamperenaki hei mampokodeꞌ Pueꞌ Ala.
13Hatoꞌo woꞌo ingkei to handoꞌio toYahudi.
Ikoꞌihorinamokei kareba to tuꞌu,
mepoꞌohimokei i Kareba Moromiꞌ tiꞌo,
hei Nopaꞌanikei Inohaꞌ Mangkolehi
to Nodandi hampiha.
Inohaꞌ Mangkolehi tiꞌo iomo tandaꞌ koꞌingkeinamo toaꞌne Pueꞌ Ala.
14Pueꞌ Ala mampaꞌaniki Inohaꞌ Mangkolehi
hingkeꞌna mampokaroho dandiNa pe ingkiꞌ,
hingkeꞌna mononto i ingkiꞌ,
lekiꞌ-lekiꞌna to Nodandikiki hingkiꞌ Nopobuhoꞌi i tempo koNohompoꞌna toaꞌNa.
Iomo horiana masipatoꞌ mpololeke Pueꞌ Ala niperenaki hei nipokodeꞌ.
Hi Paulu mekokae hingkeꞌna tosarani pobahaꞌ lekiꞌ-lekiꞌna pebarakati to nopatimomokihi Pueꞌ Ala
15-16Kuhori kareba noniuꞌ pepoꞌohimi pe Pueꞌ Yesu, hei hohumbo komarimami pe lekiꞌ-lekiꞌna toaꞌna Pueꞌ Ala. Iomo horiana kutiꞌi woriꞌ komoromiꞌ i Pueꞌ Ala alaꞌ ingkei, hei kuponindikei nturusi i lali pekokaengku. 17Mekokaeꞌa pe Pueꞌ Alana Pueꞌta Yesu Kerisitu iomo UmoꞌNa to manobaꞌ. Kuperapiꞌ hingkeꞌna Inohaꞌ Mangkolehi mampomobaro lalimi, hingkeꞌna Pueꞌ Ala ibahaꞌkei mpololeke. 18Hei kuperapiꞌ pe Pueꞌ Ala hingkeꞌna Io mampaꞌanikei pekiri, hingkeꞌna ibahaꞌkei hohumbo komoromiꞌne pebarakati to ipohinarukei hingkiꞌ itorimokei ka Pueꞌ Ala, alaꞌ Io to moꞌuwiꞌkei mewali anaꞌNa. Kuperapiꞌ woꞌo hingkeꞌna ibahaꞌkei mpololeke kokodeꞌne pebarakati to Nopatimomomo umbiꞌ i lekiꞌ-lekiꞌna toaꞌNa, 19-20hei hingkiꞌ ibahaꞌkei woꞌo kokodeꞌne kuasaꞌna Pueꞌ Ala pe ingkiꞌ to mepoꞌohi pe Io. Kuasaꞌna tiꞌo hibali hante komarohona kuasaꞌNa i tempona mampopeꞌaro Kerisitu ka komahia hei Nopopahura tinaꞌ i kuanaNa i suruga. 21Kuasaꞌ to Nopaꞌaniki Pueꞌ Ala pe Kerisitu tiꞌo, meliu komarohone ka kuasaꞌra lekiꞌ-lekiꞌna topoparenta, lekiꞌ-lekiꞌna tadulako, lekiꞌ-lekiꞌna to makuasaꞌ. Maroho mpololeke kuasaꞌNe Kerisitu ka lekiꞌ-lekiꞌna to pahua pahura to teꞌadaꞌi, moromiꞌ to tuwuꞌ i tempo hinewowoꞌena, moromiꞌ to tuwuꞌ i tempo to hingkiꞌ dongkaꞌ. 22#Mas. 8:7Hei Pueꞌ Ala mampopengkoruꞌ hinangkana to uwaꞌ i kuasaꞌna Kerisitu, hei mohini Kerisitu mewali Tadulako to moparentai lekiꞌ-lekiꞌna toaꞌ to mepoꞌohi pe Io. 23To mepoꞌohi pe Io, wadi nipandiriꞌ hibali Wotana Kerisitu to Nopoganaꞌi, hei mampoganai woꞌo hinangkana.
Currently Selected:
Epesu 1: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
