Kolose 4
4
1Ingkei to ropotua, hawiꞌmi ipaꞌanikei hapo to moromiꞌ hei to masipatoꞌ, alaꞌ ibahaꞌkei uwaꞌ woꞌo Tuami to i suruga.
Poturuꞌ noniuꞌ pekokae hei walianta pe toaꞌ to handoꞌiohi toSarani
2Mekokaekei nturusi, hei i lali pekokaemi hangangaa majaga-jagakei hei itiꞌikei woriꞌ komoromiꞌ i Pueꞌ Ala. 3Hei ipekokaekika woꞌo, hingkeꞌna Pueꞌ Ala mampaꞌanika lala mampowute kareba to mampololita tungkaihaNa to nopobuhoꞌi Kerisitu. Hampiha tungkaihaNa tiꞌo tewuni tene, angkana hinewowoꞌena kipowutemo kareba noniuꞌ Kerisitu. Iomo hinaꞌ nitarungkuꞌmoꞌa. 4Hei kuperapiꞌ hingkeꞌna ipekokaekiꞌakei, hingkeꞌna kubiaꞌ mampokononto kareba noniuꞌ i Kerisitu, ala iomo to hangangaa kuwali.
5Ane uwaꞌkei moꞌawa hante toaꞌ to handoꞌio hampepoꞌohimi, hangangaa timomo lalimi hante moromiꞌ hingkeꞌna modumbuꞌ mpololeke tempomi tiꞌo mampowutekikei lala mepoꞌohi pe Pueꞌ. 6Ane mololitakei moꞌawa hante toaꞌ to hawaꞌi mepoꞌohi, hangangaa ipomaꞌalusuꞌkei lolitami hei ipololitakei moromiꞌ hingkeꞌna teruiꞌ lalire. Hei ipekiri moromiꞌ hapo to hingkiꞌ ipowutekikei hingkeꞌna ibahaꞌkei mohoniꞌ peꞌitanore.
Tabea koꞌukoana
7Kurumbaꞌmo halalinte hi Tikiku nolou pe ingkei, hingkeꞌna nopowutekikei hapo to mewali i aku iseꞌe. Hi Tikiku tiꞌo iomo halalinta to topokarima hei awangku majama to nipoꞌohi mampopatengkaꞌ jamana Pueꞌ. 8Tungkaihangku morumbaꞌ hi Tikiku nolou mololoꞌokei, hingkeꞌna ibahaꞌkei hohumbo kotuwuꞌki hei hingkeꞌna maroho lalimi. 9Kurumbaꞌmo woꞌo hi Tikiku nolou moꞌawa hante hi Onesimu#4:9 hi Onesimu: Basa Pilemon lalana ka-10. halalinta ka lumbumi. Hi Onesimu tiꞌo to topokarima hei to nipoꞌohi. Iohi hingkiꞌ mampatiꞌikikei lekiꞌ-lekiꞌna to mewali iseꞌe.
10Hi Aritaku, to moꞌawa hante aku i lali tarungkuꞌ, mampowute tabeana pe ingkei. Hi Markus, halalina hi Baranaba, mampowute woꞌo tabeana. (Ipondindikei hapo to kuperapiꞌ hampiha hingkeꞌna ane mehupaꞌi hi Markus, itorimokei moromiꞌ!) 11Tabea woꞌo ka hi Yesu, to nikokeneꞌi woꞌo hi Yustu. Totoluhi hieꞌe hamoloꞌ toYahudihi. Hawaꞌi uwaꞌ toYahudi ntaniꞌna to majama moꞌawa hante aku mampowute kareba noniuꞌ i poparentana Pueꞌ Ala, hei poko mampokarohohi lalingku.
12Tabea woꞌo ka hi Epara, rumbaꞌana Yesu Kerisitu to ka lumbumi. Poko nopekokaekikei, hingkeꞌna maroho pepoꞌohimi hei hingkeꞌna ibahaꞌkei mpololeke hapo peleihane Pueꞌ Ala. 13Kubahaꞌ mpololeke komodotone hi Epara mampekokaekikei hei mampekokaeki woꞌo halalinta to i kota Laodikia hei i kota Hierapoli. 14Tabea woꞌo ka Sando hi Lukas to topokarima, hei ka hi Demaꞌ.
15Ipowutekei woꞌo tabeangki pe halali hampepoꞌohinta to i kota Laodikia. Tabeangki woꞌo pe hi Nimpa hei pe toSarani to menomba i lali tambina. 16Ane ukomoꞌi ibasakei suraꞌ hieꞌe, kuperapiꞌ hingkeꞌna nipakatukihi jumaꞌa-jumaꞌa to uwaꞌ i Laodikia hingkeꞌna robasaꞌi woꞌo i lumbura. Hei suraꞌku to kupakatukihi toLaodikia, ibasakei woꞌo i lumbumi. 17Ipowutekei pe hi Akipu hingkeꞌna io mampotutuha jama to nopaꞌanikiꞌi Pueꞌ!
18Tabea to koꞌukoana hieꞌe, kuꞌukiꞌ hante korawengku hadoduongku. Kuperapiꞌ hingkeꞌna ikolowoiꞌakei wokaiaꞌ alaꞌ nitarungkuꞌa tene. Pueꞌ Ala mobarakatikei lekiꞌ-lekiꞌmi.
Currently Selected:
Kolose 4: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
