Kolose 2
2
1Kukodokoꞌi hingkeꞌna ibahaꞌkei hohumbo komadorine pajamangku pe ingkei hei pe toaꞌ to i kota Laodikia hei pe lekiꞌ-lekiꞌna toaꞌ to handoaꞌi tene pobahaꞌa.#2:1 Laodikia: Iomo haꞌanu kota dodungku i Kolose. Basa Kol. 4:16. 2Tungkaihangku hieꞌe, hingkeꞌna maroho lekiꞌ-lekiꞌna lalimi hei momepokarimakei, alana mohintuwuꞌkei haduo hei haduo. Peleihangku, hingkeꞌna ipoꞌohikei hei ibahaꞌkei mpololeke tungkaihana Pueꞌ Ala to tewuni hampiha. Iomo hingkeꞌna ibahaꞌkei kohihimona Kerisitu tiꞌo, 3alaꞌ Kerisitu tiꞌo to mampokononto lalinta hingkeꞌna tobahaꞌ lekiꞌ-lekiꞌna kopebahaꞌ hante pekiri to ka Pueꞌ Ala to tewuni hampiha. 4Lekiꞌ-lekiꞌna hieꞌe kutiꞌikikei, hingkeꞌna hawaꞌkei nopokonawuꞌ toaꞌ to moꞌakalaikei moliu lolitara to hawaꞌi tuꞌu. 5Alaꞌ kehapoꞌi moꞌelaꞌa ka ingkei, angkana lalingku uwaꞌlu nturusi moꞌawa hante ingkei. Motanaꞌa mpololeke pahori komarohona pohintuwuꞌmi hante pepoꞌohimi pe Kerisitu.
Walianta hangangaa hintotoꞌ hante pepoꞌohinta
6Halali-halali, alaꞌ itorimokei Yesu Kerisitu mewali Pueꞌmi, waliami ando-ando hangangaa motuntuni peleihaNa, alaꞌ mohaꞌanumokei hante Io. 7Mewaliꞌ, hangangaa moꞌuwakakei hei tuwuꞌkei i lali Io. Ipokarohokei pepoꞌohimi, hibali to nipoturuꞌkikei. Hei itiꞌikei nturusi woriꞌ komoromiꞌ i Pueꞌ Ala.
Inioꞌki nipokonawuꞌ hante poturuꞌ to hawaꞌi mehupaꞌ ka hi Yesu Kerisitu
8Majaga-jagakei, hingkeꞌna hawaꞌi uwaꞌ toaꞌ to mampomonawuꞌkei hante moparukukei motuntuni poturuꞌra guru-guru agama to salaꞌ hante to hawaꞌi modumbuꞌ. Alaꞌ poturuꞌra tiꞌo iomo poturuꞌ to mehupaꞌlu ka pekiri toaꞌ, horiana ropoturuꞌkei motuntuni adaꞌ hante atura ngkoduniaꞌ. Poturuꞌra tiꞌo mosisalaꞌ hante poturuꞌ to tuꞌu to mehupaꞌ ka Kerisitu. 9Mewaliꞌ, inioꞌkei nipokonawuꞌ, alaꞌ lekiꞌ-lekiꞌna kuasaꞌna Pueꞌ Ala hante lekiꞌ-lekiꞌna pambiaraNa uwaꞌmo umbiꞌ i Kerisitu, hei hawaꞌi uwaꞌ komakuraꞌne. 10Mewaliꞌ, ane mohintuwuꞌkei hante Kerisitu, lekiꞌna Nopoganaꞌi moliu i Io, alaꞌ Io to makuasaꞌ mpololeke ka lekiꞌ-lekiꞌna to makuasaꞌ hei to meparenta.
11Alaꞌ pohintuwuꞌmi hante Kerisitu, hibalimokei to nibulabaꞌ. Konibulabaꞌmi tiꞌo, handoꞌio pebulabaꞌ to nowali toaꞌ, angkana pebulabaꞌ to nowali Kerisitu i lalimi. Palaihana, Io mampohintemokei ka kuasaꞌ dosa to uwaꞌ i lalimi. 12I tempomi niriu, ingkei hibali toaꞌ to mahi hei nitawu moꞌawa hante Kerisitu. Hei ikoniriumi tiꞌo, ingkei mewali hibali toaꞌ to nipotuwuꞌ huliꞌ moꞌawa hante Io, alaꞌ pepoꞌohimi i kuasaꞌna Pueꞌ Ala to mampotuwuꞌ huliꞌ hi Yesu ka komahia.
13Hampiha ikohandoaꞌami tene mepoꞌohi pe Kerisitu, hibalikei tene toaꞌ to mahi, alaꞌ molungkaꞌikei hawaꞌna Pueꞌ Ala, Angkana kehapoꞌi hatoꞌo, Pueꞌ Ala mampotuwuꞌmokei moꞌawa hante hi Yesu, hei Noꞌampuni lekiꞌ-lekiꞌne dosanta. 14Pueꞌ Ala mopahi lekiꞌ-lekiꞌna salaꞌta moliu komahina hi Yesu i loti momehulepe, hei Nopohintemoki ka atura to tolungkaꞌi tiꞌo, horiana hamboaꞌmoki pahua pehuku. 15Ikomahina Kerisitu i loti momehulepe, Pueꞌ Ala monani lekiꞌ-lekiꞌna tokodake hei lekiꞌ-lekiꞌna to makuasaꞌ, hei koNonanira niꞌokiꞌ i humanele duniaꞌ.
Inioꞌki motuntuni adaꞌ ngkoduniaꞌ to hawaꞌi mehupaꞌ ka hi Yesu
16Iomo hinaꞌ anioꞌkei mampehoromua toaꞌ to mosalaꞌikei alaꞌ hawaꞌkei mampetuntui paliara i pangka hante i paꞌinu, ba rosalaꞌikei alaꞌ hawaꞌkei motuntuni adaꞌ ando ngkodeꞌ agamara toYahudi, rapaꞌna ando ngkodeꞌ moleaꞌ wula hei noniuꞌ jama i ando penombaha. Inioꞌ ipoꞌohikei toaꞌ tiꞌo, 17#Ibr. 8:5; 10:1-10alaꞌ hawaꞌi hatoꞌo tungkaihane Pueꞌ Ala noniuꞌ i lekiꞌ-lekiꞌna adaꞌ hante atura tiꞌo. Pueꞌ Ala mampaꞌaniki atura tiꞌo hampiha hibalilu pandiri' pe ingkiꞌ noniuꞌ pebarakati to hingkiꞌ tohua ka Kerisitu. 18Mewaliꞌ, ane uwaꞌ toaꞌ to mosalaꞌikei alaꞌ hawaꞌkei ipetuntui poturuꞌre, inioꞌkei ipoꞌohi. Toaꞌ tiꞌo mampokokodeꞌhi, rotiꞌi rohua poturuꞌre ka peponoꞌokiꞌi. Rotiꞌi hawaꞌkei hingkiꞌ notorimo Pueꞌ Ala ane hawaꞌkei mengkaꞌiwowoiꞌ hei menomba pe malaꞌeka. Inioꞌhi nipotedehi toaꞌ tiꞌo mosalaꞌikei. Hawaꞌi uwaꞌ kuasaꞌre mopagurukei, alaꞌ poturuꞌra tiꞌo mesuwulu ka lalira hadoduora to motuntunilu lala ngkoduniaꞌ hieꞌe. 19Toaꞌ-toaꞌ tiꞌo hamboaꞌmohi metatiko maroho i Kerisitu to mewali tutuꞌta. Ingkiꞌ lekiꞌ-lekiꞌna to mepoꞌohi pe Kerisitu nipandiriꞌ hibali wotaNa. Winoro tutuꞌ iomo to mokuasaꞌi wotalokaꞌ hei hinangkana to momeꞌumpuꞌ-umpuꞌ i wotanta, hatoꞌo woꞌo Kerisitu mampohintuwuꞌmoki hei morandaki hingkeꞌna komaroho-rohoa petuntute pe Io, motuntuni peleihana Pueꞌ Ala.
20 #
Rm. 6:1-11
Ingkiꞌ to mepoꞌohi pe Kerisitu wadi nipandiriꞌ hibali toaꞌ to mahi moꞌawa hante Kerisitu. Alaꞌ nokomi pohintuwuꞌta hante Io, tepohentemoki ka adaꞌ hante atura to i duniaꞌ hieꞌe. Hamboaꞌmoki mampetuntui adaꞌ hante atura tiꞌo {hingkeꞌna mewaliki mononto i pampeꞌelena Pueꞌ Ala.} Mewaliꞌ, ane mahikei moꞌawa hante Kerisitu, mahamporeꞌi hinaꞌ ipengkoruꞌikei atura to woriꞌ langkaꞌ tiꞌo, hibali toaꞌ to hawaꞌi tene mepoꞌohi pe Kerisitu. 21Mahamporeꞌi hinaꞌ ipetuntuikei aturare to mantiꞌi, Inioꞌkei motiko hieꞌe! Inioꞌkei mangka tiꞌo! Inioꞌkei moruntui hieꞌe ba tiꞌo! 22Alaꞌ atura tiꞌo noniuꞌlu i pangka hante parewa to wadi uko; hampaiꞌlu nipakeꞌ koꞌukoana nitube. Atura tiꞌo mesuwu ka hawaꞌ hei poturuꞌ toaꞌlu. 23Ane roꞌokiꞌi toaꞌ, atura tiꞌo moromiꞌ, alaꞌ toaꞌ to motuntuni atura tiꞌo, moꞌagamahi, mengkaꞌiwowoiꞌhi, hei mampoperima-rimahi wotara. Angkana atura tiꞌo hawaꞌi modumbuꞌ, alaꞌ hawaꞌi mampororuiki morii peleihana lalinta to kodake.
Currently Selected:
Kolose 2: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
