2 Tesalonika 2
2
Kobuntoꞌa ikohandoaꞌana mehupaꞌ Pueꞌ
1Noniuꞌ pehupaꞌna Pueꞌta Yesu Kerisitu hei koterampuanta hante Io kipowute pe ingkei, halali-halali, 2Inioꞌkei hohiꞌ motehuꞌ ba wewoꞌ hei masusa lalimi, ane pahorikei toaꞌ mantiꞌi Pueꞌ mehupaꞌmo huliꞌ. Kehapoꞌi rotiꞌi, robahaꞌ ka Inohaꞌ Mangkolehi, ba rohori ka toaꞌ ntaniꞌ ba rotiꞌi suraꞌ ka ingka, inioꞌkei ipoꞌohi, alaꞌ lekiꞌna tiꞌo hawaꞌi tuꞌu. 3Inioꞌkei hiniꞌ lalimi ropowewoꞌ hante hohumbo lala to rowali! Alaꞌ ikohandoaꞌana ando tiꞌo mehupaꞌ hingkiꞌ uwaꞌ to mewali medulu, woriꞌ toaꞌ to buntoꞌ, maꞌoruꞌ hei meꞌewa pe Pueꞌ Ala. Hei haduo toaꞌ to kodake waliana hingkiꞌ mampomombaha wotana hei io to monontomo nipelubaꞌ pe naraka. 4Alaꞌ Iomo poniꞌ to mampokokodeꞌ. Io mahura i Tambina Pueꞌ Ala hei hingkiꞌ mangakuꞌ io Pueꞌ Ala. 5Hawaꞌkeireꞌi ikolowoi tiꞌo, woriꞌ mpihamo kutiꞌikikei, i tempoku tene moꞌawa-awa hante ingkei? 6Hinewowoꞌena ibahaꞌmokei hapo to motaha lekiꞌna hapo to hingkiꞌ mewali, io hingkiꞌ mampotongawa kuasaꞌna i tempo to nopakatantumo Pueꞌ. 7Hei tempo hieꞌe, kuasaꞌna to kodake menele ngkandiiꞌ-ndiiꞌ i duniaꞌ. Angkana io handoaꞌi tene hupaꞌ, alaꞌ uwaꞌ tene to motahaꞌi. Mewaliꞌ, ane to motaha tiꞌo maweaꞌmo, 8i tempo tiꞌomola to mepobuntoꞌ hingkiꞌ mampembombaha wotana, angkana Pueꞌ Yesu hingkiꞌ morokoꞌi hante Inohaꞌ ka omeꞌNa hei hingkiꞌ mamporopuꞌi, ane Io mehupaꞌ huliꞌ. 9Toaꞌ to kodake tiꞌo hingkiꞌ hupaꞌ hei hingkiꞌ mopakeꞌ kuasaꞌna Belisiꞌ mowali woriꞌ langkaꞌna tandaꞌ to mepohele to mepomonawuꞌ. 10Lekiꞌ-lekiꞌna akalana to kodake hingkiꞌ nopakeꞌ mampokonawuꞌhi toaꞌ to monontomo horewuꞌ, alaꞌ hawaꞌhi hiniꞌ motuntuni pohawaꞌna Pueꞌ to mamposalamaꞌhi ka pehuku salaꞌra. 11Iomo horiana Pueꞌ Ala mowali kowuliana pekirira, horiana mampoꞌohihi tota tuꞌu, 12hingkeꞌna nihukuhi lekiꞌne toaꞌ to hawaꞌhi mepoꞌohi i komaniuꞌa hei paleihi walia to kodake.
Niꞌuwiꞌ hingkiꞌ niposalamaꞌ
13Angkana ingka hangangaa poko moꞌawerasiꞌka pe Pueꞌ Ala, alaꞌ ingkei poko halali, to Nopokarima Pueꞌ Ala. Uluꞌana Noꞌuwiꞌmokei Pueꞌ Ala, hingkiꞌ Noposalamaꞌ i lali Inohaꞌna Pueꞌ Ala to mampomangkolehikei hei i lali komaniuꞌa to ipoꞌohikei, 14Io mowowoikei i tempomi mampehoromua Kareba Moromiꞌ to kipowutekikei hingkeꞌna pahuakei dolaꞌmi i wantana Pueꞌta, Yesu Kerisitu. 15Metotiꞌimokei maroho hei motuntuni poturuꞌ-poturuꞌ to itorimomokei ka ingka, moromiꞌ wiharo, ba to teꞌukiꞌ. 16-17Pueꞌ Ala mampetidoꞌki rimana, hei Nopokaroho lalinte wute nantolou-louna, hei Nopaꞌaniki pepohinarua to moromiꞌ alaꞌ kopopuhiꞌna laliNa. Iomo hinaꞌ mekokaeka pe Pueꞌta, Yesu Kerisitu, hei Pueꞌ Ala, Umoꞌta, hingkeꞌna Nopokaroho hei Nopololebaꞌ lalimi, hingkeꞌna moromiꞌ lekiꞌ-lekiꞌna pololitami hante waliami.
Currently Selected:
2 Tesalonika 2: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
