2 Korintus 8
8
Perapiꞌna hi Paulu hingkeꞌna toKorintus morampuhi doiꞌ pesulungi
1Kololiuhana halali-halali, kikodokoꞌi kitiꞌikikei hapo to mewali iseꞌe i poropensi Makedonia. Kodeꞌ rimane Pueꞌ pe jumaꞌa-jumaꞌa i Makedonia. 2Kehapohi pahua komaporiꞌ to madori mpololeke, angkana i lali komaporiꞌ tiꞌo, tontoralu motanaꞌ mpololeke. Hei kehapoꞌi merima-rima mpololeke tuwuꞌre, angkana woriꞌ pampeweire hingkeꞌna mosulungihi halali hampepoꞌohira. 3Kuꞌokiꞌ hohumbo komoromiꞌne lalira mampewei doiꞌ. Mampeweihi i hukaꞌna pebiaꞌra, hei meliu mpuꞌu ka tiꞌo. Hawaꞌi uwaꞌ to moparukuhi, ropewei ka kopopuhiꞌna lalira. 4Roperapiꞌ mpololeke pe ingka hingkeꞌna wadihi mampewei doiꞌ pe toaꞌna Pueꞌ Ala i kota Yerusale.#8:4 uwaꞌ woꞌo tungkaihane hi Paulu mosulungi toSarani i kota Yerusale to merima-rima tuwuꞌra. Basa Rm. 15:25-26; 1Kor. 16:1-4. 5Kopopuhiꞌna lalira tiꞌo meliu ka hapo to kipohinaru. Handoꞌiolu doiꞌ to ropewei, angkana kotuwuꞌra dulu to ropewei pe Pueꞌ Ala. Mengkoruꞌhi pe Pueꞌ, hei nokomi peleihana Pueꞌ Ala, mengkoruꞌhi woꞌo pe ingka. 6Nokomi komoromiꞌna lalira toMakedonia tiꞌo, iomo horiana kirumbaꞌ hi Titus nolou pe ingkei i Korintus. Iomo to uluꞌ-uluꞌna mosulingikei morampu doiꞌ to hingkiꞌ ipakatukei pe jumaꞌa-jumaꞌa to merima-rima tuwuꞌra. Mewaliꞌ, iomo horiana kirumbaꞌ womo nolou pe ingkei mampololiu jama to moromiꞌ tiꞌo i lumbumi.
7 #
Mat. 6:25-34; Eps. 1:3-8 Halali-halali, lekiꞌ-lekiꞌna to iparaluꞌikei uwaꞌmo i ingkei: maroho pepoꞌohimi, ibahaꞌkei poturuꞌ to tuꞌu, mapandekei mepoturuꞌ, woriꞌ mpihakei mosulungi halalimi, hei kodeꞌ komarimami pe ingka. Halali-halali, iomo horiana kuperapiꞌ hingkeꞌna inioꞌ uwaꞌ komakuraꞌmi i lali pajamami mosulungi halalimi to merima-rima tuwuꞌra.
8To kutiꞌikikei tiꞌo handoꞌio hawaꞌ. Kuponobahaꞌikei noniuꞌ i toMakedonia, hingkeꞌna mewalihi pandiri'. Tungkaihangku kupampeꞌeleikei, hingkeꞌna kubahaꞌi hohumbo komarimami pe hangko awami. 9#Plp. 2:5-11Halali-halali, ibahaꞌmokei kokodeꞌne rimana Pueꞌta Yesu Kerisitu pe ingkiꞌ. Lekiꞌ-lekiꞌna to uwaꞌ i suruga, Io tumpune, angkana alaꞌ kokodeꞌna rimaNa pe ingkiꞌ, Io mewali hibali haduo toaꞌ to merima-rima tuwuꞌNa, hingkeꞌna ingkiꞌ mewaliki sugiꞌ i peꞌoꞌelena Pueꞌ Ala. 10-11Mewaliꞌ, hieꞌemo lolitangka pe ingkei halalingku toKorintus: aginamo ipololiukei jamami to ipelukakei toꞌa to liu, alaꞌ ingkeimo to ulu-uluꞌne mampekiri noniuꞌ i porampu doiꞌ to nipoposulungi halalimi to uwaꞌ i komakuraꞌa. Mewaliꞌ hapo to irampukei uluꞌana, hangangaa ipololiukei nturusi wute uko. Aginamo mampeweikei ka kopopuhiꞌ lalimi motuntuni pebiaꞌmi haduo-haduo. 12Alaꞌ ane mampeweiki pesulunginta ka kopopuhiꞌna lalinta, Pueꞌ Ala hingkiꞌ mantorimo hapo to topewei tiꞌo. Hawaꞌi Noperapiꞌ pe ingkiꞌ hingkeꞌna mampeweiki meliu ka pebiaꞌta.
13Hawaꞌi uwaꞌ tungkaihangkaꞌ hingkeꞌna mampomaporiꞌ kotuwuꞌmi hei mampomorasiꞌ toaꞌ ntaniꞌna. Angkana hingkeꞌna nohibali kotuwuꞌte. 14Hinewowoꞌena, alaꞌ koworiꞌnamo rasiꞌ to ihuakei, ingkei to hangangaa mampoganai komakuraꞌra jumaꞌa-jumaꞌa to uwaꞌ i Yerusale. Hei ane rapaꞌna uwaꞌ woꞌo komakuraꞌmi i ando to hingkiꞌ dongkaꞌ, iohi woꞌo hangangaa mampoganai hapo to makuraꞌ i ingkei. Ane momerewahikei hatoꞌo, hawaꞌi hingkiꞌ uwaꞌ komakuraꞌmi. 15Hibali to teꞌukiꞌ i lali Suraꞌ Mangkolehi:
“Toaꞌ to morampu woriꞌ,
hawaꞌi woꞌo nokomelobii.
Hei toaꞌ to morampu hangkiuꞌlu,
hawaꞌi woꞌo nokomakuraꞌi.”#8:15 Pebarakati hieꞌe noniuꞌ i roti manna tempora toSaraeli uwaꞌ i popada lori; Kel. 16:18.
Hi Titus hante roduo awana nirumbaꞌhi mowona doiꞌ pesulungi
16Kutiꞌi woriꞌ komoromiꞌ i Pueꞌ Ala to mampopengkaduiꞌ lalina hi Titus horiana nolei mosulingikei. Peleihana hi Titus tiꞌo, hibali woꞌo hante peleihangki, 17iomo horiana io kirumbaꞌ nolou pe Korintus mosulungikei mangkolodohi doiꞌ to irampukei. Hei io motanaꞌ mpololeke alaꞌ kotuꞌuana, uwaꞌmo woꞌo tungkaihane dokoꞌ nolou mololoꞌokei. 18Kirumbaꞌ woꞌo haduo halalinta nolou pe ingkei moꞌawa hante hi Titus. Io niꞌadaꞌi lekiꞌ-lekiꞌna jumaꞌa alaꞌ pajamana mampowute Kareba Moromiꞌ. 19Io noꞌuwiꞌ lekiꞌ-lekiꞌna jumaꞌa iseꞌe hingkeꞌna mampoꞌawaka i patengkaꞌki ako mangkomi doiꞌ pesulungimi pe halali hampepoꞌohinta to uwaꞌ i lali komakuraꞌ. Tungkaihana patengkaꞌki hieꞌe, hingkeꞌna konaꞌna Pueꞌ ropokodeꞌ, hei hingkeꞌna tongawa kotuꞌutuꞌune rimangki mesulungi.
20Tungkaihangki morumbaꞌ halalinta hieꞌe nolou moꞌawa hante hi Titus, hingkeꞌna hawaꞌi uwaꞌ to moraiꞌka i pangkomingki doiꞌ to woriꞌ. 21Kipombombaha komonontone waliangki, handoꞌiolu i pampeꞌelena Pueꞌ, angkana i pampeꞌelena woꞌo toaꞌ.
22Uwaꞌ tene haduo toaꞌ to kirumbaꞌ nolou pe ingkei moꞌawa hante iohi. Kibahaꞌ komodotone mepororui i lali jamana Pueꞌ, alaꞌ kiꞌokiꞌmo mata waliane i lali langkaꞌ-langkaꞌna to nojama. Hei hinewowoꞌena, dokoꞌ mpololeke mosulingikei, alaꞌ nopohinaru mpololeke ingkei toKorintus hingkiꞌ morampu doiꞌ pesulungimi. 23Noniuꞌ hi Titus, io awangku majama to kurumbaꞌ nolou mosulingikei. Ane awana to roduo, iohi toaꞌ to rorumbaꞌ jumaꞌa-jumaꞌa iseꞌe hingkeꞌna nolouhi mosulungikei. Toaꞌ to roduo tiꞌo mangkomihi kokodeꞌana konaꞌna Kerisitu. 24Mewaliꞌ, kuperapiꞌ hingkeꞌna nitorimohi moromiꞌ, hingkeꞌna mombaha komarimami i iohi, hei lekiꞌ-lekiꞌna jumaꞌa hingkiꞌ pobahaꞌ kotuꞌuna lolitangki mamperenakikei.
Currently Selected:
2 Korintus 8: LAILJE
Highlight
Copy
Compare
Share
Want to have your highlights saved across all your devices? Sign up or sign in
2017 Indonesian Bible Society (Lembaga Alkitab Indonesia)
